އީސީން ވަކިކުރާ މެމްބަރުންނަށް ސިޔާސީ ގޮތުން މަސައްކަތް ކުރުމުގެ ތުހުމަތު!
އިލެކްޝަން ކޮމިޝަންގެ މެމްބަރުކަމުން ވަކިކުރަން ރައްޔިތުންގެ މަޖިލިހުގެ މިނިވަން މުއައްސަސާއިން ނިންމެވި މެމްބަރުންނަށް ސިޔާސީ ގޮތުން މަސައްކަތްތަކެއް ކުރިކަމުގެ ތުހުމަތު ކޮށްފިއެވެ.
މިނިވަން މުއައްސަސާތަކުގެ ކޮމިޓީން އެމައްސަލައިގެ ކޮމިޓީ ސިއްރުން ކުރިއަށް ގެންދިޔަސް, ކޮމިޓީގެ ރިޕޯރޓް މިއަދު ވަނީ މަޖިލިހުގެ ތަޅުމަށް އިއްވާފައެވެ. އެކޮމިޓީން ވަކިކުރަން ފާސްކުރި މެމްބަރުންނަށް ކުރަނީ ޑިމޮކްރެޓްސް އުފައްދަން ހުރަސް އެޅުމުގެ ތުހުމަތާއި, ރިޔާސީ އިންތިޚާބު އެމްޑީޕީއަށް ކާމިޔާބުކޮށްދޭން މަސައްކަތް ކުރި ކަމުގެ ތުހުމަތެވެ. އަދިވެސް އިތުރު ތުހުމަތުތައް ވަނީ ކޮށްފައެވެ.
އިލެކްޝަން ކޮމިޝަންގެ މެމްބަރުކަމުން ވަކިކުރަން ކޮމިޓީން ނިންމެވި މެމްބަރުންނަކީ އަލީ ނަޝާތު އާއި, މުހައްމަދު ޒާހިރު އާއި މުހައްމަދު އާސިފްއެވެ. މީގެތެރެއިން ދެވަނަ ދައުރެއްގައި ކޮމިޝަންގެ މެމްބަރުކަން ކުރައްވާ ނަޝާތު އަކީ ނައިބުރައީސް އެވެ. މިމެމްބަރުން ކޮމިޝަނަށް އައްޔަން ކުރެއްވީ މިދިޔަ ސަރުކާރުގައެވެ.
ނަޝާތުގެ މައްޗަށް ކުރާ އިތުރު ތުހުމަތު ތަކުގެ ތެރޭގައި ކޮމިޝަންގެ އަންހެން މެމްބަރުންނާ ނުރަނގަޅު ގުޅުން ބޭއްވުމާއި, ނުފޫޒު ފޯރުވުމުގެ ތުހުމަތު ހިމެނެއެވެ. ވިޔަފާރި ވަކި ކުންފުންޏަކާ ގުޅިގެން މުދާ ހޯދައިގެން, ކޮރަޕްޝަންގެ އަމަލު ހިންގާ ކަމުގެ ތުހުމަތުވެސް އެމެމްބަރުންނަށް ކުރެއެވެ.
ހާޒިރީއަށް މަކަރު ހެދުމުގެ ތުހުމަތާއި, ކޮމިޝަންގެ ރައީސްގެ އަގު ވައްޓާލަން މަސައްކަތް ކުރިކަމުގެ ތުހުމަތުވެސް ހިމެނެއެވެ. އެމެމްބަރުން ވަކިކުރުމާމެދު މިއަދު މަޖިލިހުގައި ވޯޓަށް އަހާނެއެވެ.
ރިއެކްޝަންސް
