ޤާނޫނުއަސާސީއަށް ގެނައި އިސްލާޙް ބާތިލްކުރަން ކުރީގެ މެމްބަރު ޢަލީ ޙުސައިން ސްޕްރީމް ކޯޓަށް

ޤާނޫނުއަސާސީއަށް ގެނައި އިސްލާހު ބާތިލްކުރަން ކެންދޫ ދާއިރާގެ ކުރީގެ މެމްބަރު އަދި ޤާނޫނީ ވަކީލް ޢަލީ ޙުސައިން ސްޕްރީމްކޯޓަށް ދުސްތޫރީ މައްސަލައެއް ހުށަހަޅައިފިއެވެ. ފާއިތުވެ ދިޔަ ބުދަ ދުވަހު ރައްޔިތުންގެ މަޖިލީހުން، ޤާނޫނު އަސާސީއަށް 6 ވަނަ އިސްލާޙް ގެނެސްފައިވަނީ ޤާނޫނު އަސާސީގެ 4, 8, 26, 75 އަދި 90 ވަނަ މާއްދާއާ ޚިލާފަށް ކަމަށް ޢަލީ ޙުސައިން އެކްސްގައި ކުރެއްވި ޕޯސްޓެއްގައި ވިދާޅުވިއެވެ.

ޢަލީ ހުސައިން ވިދާޅުވީ ބުދަ ދުވަހު ފާސްކުރި އިސްލާޙް ދިވެހި ޖުމްޙޫރިއްޔާގެ ޤާނޫނޫ އަސާސީގެ އޮނިގަނޑާވެސް ހިލާފް ކަމަށެވެ. އެ މައްސަލަ ބަލައިގަތުމާމެދު ސްޕްރީމް ކޯޓުން މިހާތަނަށް އަދި ވަކި ގޮތެއް ނުނިއްމައެވެ. 

ސަރުކާރުގެ ހިންގާ ޕާޓީ, ޕީއެންސީގެ އަގުލަބިއްޔަތުން ފާސްކުރި އިސްލާހުގައިވާގޮތުން ސިޔާސީ ޕާޓިއެއްގެ ފަރާތުން ރައްޔިތުންގެ މަޖިލީހުގެ އިންތިޚާބުގައި ވާދަކޮށް، އިންތިޙާބު ކާމިޔާބުކުރުމަށްފަހު, އެ ދައުރުގެ ތެރޭގައި އެ މެމްބަރު އިންތިޙާބުވި ޕާޓީން އިން އަމިއްލަ އަށް ވަކިވެއްޖެ ނަމަ, ނުވަތަ ފާޓީން އެމެމްބަރު ވަކިކޮށްފިނަމަ މެމްބަރުކަމުގެ ގޮނޑި ގެއްލޭނެއެވެ. އަދި އެހެން ސިޔާސީ ޕާޓީއެއްގެ މެމްބަރަކަށް ވީނަމަވެސް މެމްބަރުކަން ދެމި ނޯންނާނެއެވެ. 

ޢަލީ ހުސައިންގެ އިތުރުން ކުރީގެ އުއްތަމަ ފަނޑިޔާރު ޑރ. އަޙްމަދު ޢަބްދުالله ދީދީވެސް ވަނި މެމްބަރުކަން ގެއްލުވާލެވޭގޮތަށް ޤާނޫނޫ އަސާސީއަށް ގެނައި އިސްލާހަކީ ޤާނޫނު އަސާސީގެ 4 ވަނަ މާއްދާއިން ކަށާވަރުކޮށްދޭ ރައްޔިތުންގެ ބާރުގެއްލޭގޮތަށް ފަރުމާކޮށް ފާސްކޮށްފައިވާ އިސްލާހެއް ކަމަށް ބުނެފައެވެ. އަދި އެފަދަ އިސްލާޙަކަށް ޤާނޫނީ ބާރުވެރިކަން ނުލިބޭނެކަމަށްވެސް ކުރީގެ އުއްތަމަ ފަނޑިޔާރު ވިދާޅުވެފައިވެއެވެ.