ވިދިވިގެން ފަސްވަނަ ބައްޔާއެކު ޓޮޓްނަމް އަތުންވެސް މެންޗެސްޓަރ ސިޓީއަށް ބޮޑު ބައްޔެއް
ހޮނިހިރު ދުވަހު ޕްރިމިއަރ ލީގުގައި ޓޮޓްނަމްއިން މެންޗެސްޓަރ ސިޓީ 4-0 ން ބަލިކޮށްފިއެވެ. ސިޓީގެ އިއްތިހާދު ސްޓޭޑިއަމްގައި ކުޅުނު މެޗުން ބަލިވުމާއެކު ސިޓީ ވަނީ މި ސީޒަންގައި އެންމެ ފަހުން ކުޅުނު ފަސް މެޗުންވެސް ބަލިވެފައެވެ. އަދި މިއީ ކާމިޔާބު ކޯޗު ޕެޕް ގާޑިއޯލާގެ ކެރިއަރުގައިގައިވެސް ވިދިވިދިގެން ފަސް މެޗުން އޭނާގެ އިރުޝާދުގެ ދަށުން ކުޅުނު ޓީމެއް ބަލިވި ފުރަތަމަ ފަހަރެވެ.
މެޗުގައި ޓޮޓްނަމްގެ ފުރަތަމަ ދެ ގޯލްވެސް ކާމިޔާބުކޮށްދިނީ ޖޭމްސް މެޑިސަން އެވެ. 13 ވަނަ މިނިޓްގައި ލީޑު ނަގައިދިނުމަށް އެހީތެރިވީ ޑެގަން ކުލްވެސްކީއެވެ. ލީޑު ފުޅާކޮށްދިނުމަށް 20 ވަނަ މިނިޓްގައި އެހީތެރިވީ ސޮން ހިއުންގް މިން އެވެ. ތިންވަނަ ގޯލް ޑޮމިނިކް ސޮލާންކޭ ތަނަވަސްކޮށްދިން ފުރުޞަތެއްގައި 52 ވަނަ މިނިޓްގައި ކާމިޔާބުކޮށްދިނީ ޕެޑްރޯ ޕޮރޯ އެވެ. އަދި ޓޮޓްނަމްގެ ފަހު ގޯލް މެޗުގެ ފުރިހަމަ ވަގުތު ހަމަވެ, އިތުރު ވަގުތުގެ ތިންވަނަ މިނިޓްގައި ކާމިޔާބުކޮށްދިނީ ބްރެނަން ޖޯންސަން އެވެ. މިއީ ޓީމޯ ވާނަރ ތަނަވަސްކޮށްދިން ފުރުޞަތެއްގައި ކާމިޔާބުކޮށްދިން ގޯލެކެވެ.
މެޗުން ބަލިވި ނަމަވެސް ސިޓީ އަދި އޮތީ ތާވަލްގެ ދެވަނައިގައެވެ. 23 ޕޮއިންޓާއެކު ސިޓީ ދެވަނައިގައި އޮތީ އެއްވަނައިގައި އޮތް ލިވަރޕޫލްއަށްވުރެ ފަސް ޕޮއިންޓް މަދުކޮށެވެ. ހޮނިހިރު ދުވަހުގެ މޮޅާއެކު ޓޮޓްނަމްއިންވަނީ 12 ގޭމުން 19 ޕޮއިންޓް ހޯދާ ތާވަލްގެ ހަ ވަނަ އަށް ކުރިއަށް ޖެހިލާފައެވެ.
މެޗަށް ނިކުތުމުގެ 48 ގަޑިއިރުކުރިން ސިޓީގެ ކޮންޓްރެކްޓް އިތުރު ދެ އަހަރަށް އާކުރި ކޯޗު ޕެޕް ގާޑިއޯލާގެ އިރުޝާދުގެ ދަށުން ޖެހިޖެހިގެން މިހާ ގިނަ މެޗުން އޭނާގެ ޓީމެއް މީގެ ކުރިން ބަލިވެފައި ނުވާއިރު މިހާބޮޑު ފަރަގަކުން ބަލިވުމަކީވެސް ނުވާކަމެކެވެ. ފުޓްބޯޅާ ދިރާސާކުރާ ފަރާތްތަކުން ދެކޭގޮތުގައި ސިޓީގެ މި އަޑިއަޅާލުން އެންމެ ބޮޑަށް ގުޅިފައިވަނީ ޓީމުގެ އެންމެ އިތުބާރު މިޑްޕީލްޑަރު ރޮޑްރީއަށް އަނިޔާވެ ކުޅުމާ ދުރަށްދާންޖެހުނު ހިސާބުންނެވެ. ހުދު ގާޑިއޯލާވެސް ބުނެފައިވަނީ ރޮޑްރީ ނެތުމަކީ ބޮޑު ހުސްކަމެއް ކަމަށާއި, އެކަން ފޫބައްދަން ސިޓީއަށް ޙައްލެއް ބޭނުންވާ ކަމަށެވެ.
ރިއެކްޝަންސް
