އިޒްރާއިލްގެ ހަމަލާއެއްގައި ޒަޙަމްވެ ލުބުނާނުގެ އަރަމުން އަންނަ ފުޓްބޯޅަ ކުޅުންތެރިއަކު ކޯމާގައި
ލުބުނާނުގެ ފުޓުބޯޅައިގައި ވިދަމުން އަންނަ 19 އަހަރުގެ ސެލީން ހައިދަރް އިޒްރާއިލްގެ ވައިގެ ހަމަލާއެއްގައި ޒަޙަމްވެ ކޯމާގައި ފަރުވާދޭން ފަށައިފިއެވެ. ސެލީން ޒަޙަމްވެ ހާލަތު ސީރިއަސް ވެފައިމި ވަނީ ވެރިރަށް ބެއިރޫތްގެ ދެކުނުގައި އޭނާ ދިރިއުޅޭ ގެ ކައިރިއަށް އިޒްރާއިލްއިން ދިން ހަމަލާ ތަކެއްގައެވެ.
ސެލީން އަކީ އޭނާ މިހާރުވެސް އޭނާ ކުޅޭ ކްލަބްގެ ކެޕްޓަނެވެ. ސެލީން އާއެކު ލުބުނާނުގައި ބޭއްވި ވެސްޓް އޭޝިއާ ކަޕް 2022 ވަނަ އަހަރު ސެލީން ވަނީ ކާމިޔާބުކޮށްފައެވެ. ޤައުމީ ޔޫތް ޓީމުގެ 19 އަހަރުން ދަށުގެ ބައިގައި ދެފަހަރަށް ހިމެނި ލުބުނާން ތަމްސީލްކުރުމަށްފަހު ސެލީން މިހާރު އަންނަނީ ޤައުމީ އަންހެން ފުޓްބޯޅަ ޓީމުގައި ލުބުނާން ތަމްސީލްކުރުމަށް ތައްޔާރުވަމުންނެވެ. ކުރިއަށް އޮތީ އޭނާ އާއެކު ލުބުނާނުގެ އަންހެން ޤައުމީޓީމު ވެސްޓް އޭޝިއަން ޗެމްޕިއަންޝިޕްގައި ވާދަކުރާ ފުރަތަމަ މުބާރާތެވެ. ނަމަވެސް ސެލީން އަށް ލިބުނު ޒަޙަމްތަކާއެކު އޭނާގެ އުއްމީދު މިހާރު މިވަނީ ފުނޑުފުނޑުވެފައެވެ.
ހަމަލާތައް ހޫނުވެ ސެލީންގެ މައިންބަފައިން އެ ސަރަޙައްދު ދޫކޮށް އިރުމަތީ ބެއިރޫތް ފަރުބަދަމަތީ ހިސާބުތަކަށް ވަގުތީގޮތުން ބަދަލުވެފައިވީނަމަވެސް ސެލީން އޭނާގެ ގޭގައި މަޑުކުރީ ފަރިތަކުރުންތަކަށް ހުއްޓުމެއް އަޔަނުދިނުމުގެ ގޮތުންނެވެ. ސަރަޙައްދު ދޫކޮށްދިއުމުގެ އަމުރެއް އަތުވެއްޖެނަމަ އޭނާ އާއިލާގެ ކައިރިއަށް ދާނޭ ކަމުގެ ޔަގީންކަންވެސް އާއިލާއަށް އޭނާ ދިނެވެ. ނަމަވެސް ހޮނިހިރު ދުވަހު އިޒްރާއިލްގެ އެ އަމުރު އައިއިރު ސެލީން އޮތީ ނިދާފައެވެ. އޭނާގެ މައިންބަފައިން އޭނާއަށް ގުޅާ އަވަހަށް އެސަރަޙައްދު ދޫކޮށް ނިކުންނަށް ބުނިއިރު އިޒްރާއިލްގެ ހަމަލާތައް ދޭން ފަށައިފިއެވެ. ސެލީންގެ ގަޔަށް ވައިގެ ހަމަލާގެ ޝެލްގެ ބައިތައް ބުރައިގެން އައިސް އެރީ އޭނާ ސައިކަލަށް އަރާ ނައްޓާލިގަޑިގައެވެ. ޑޮކްޓަރުންނާ ހަވާލާދީ ނޫސްތަކުގައި ރިޕޯޓްކޮށްފައިވާގޮތުން ހަމަލާގައި ސެލީންގެ ބޮލުގެ ނާށިގަނޑަށާއި ސިކުނޑިއަށް ވަނީ ވަރަށް ބޮޑަށް ގެއްލުން ލިބިފައެވެ. އަދި ސިކުނޑިއަށް ލޭ އެޅިފައިވާކަމަށްވެސް ރިޕޯޓްތައް ބުނެއެވެ.
ސެލީން އެނދުމަތިކޮށްފައި އޮތީ ބެއިރޫތްގެ ސެއިންޓް ޖޯޖް ހޮސްޕިޓަލްގެ އިންޓެންސިވް ކެއަރ ޔުނިޓް (އައިސީޔޫ) ގައެވެ. އޭނާގެ ކައިރީގައި އޭނާގެ މަންމަ ސަނާ ޝަޙްރޯ އަދި އައްބާސް ހައިދަރު މިހާރު އެބަތިބިކަމަށް ސެލީންގެ ކޯޗް ސާމެރް ބަރްބަރީ އާ ޙަވާލާދީ އީއެސްޕީއެންގައި ރިޕޯޓްކޮށްފައި ވެއެވެ.
އިޒްރާއިލްއިން ފާއިތުވި އަހަރުން ފެށިގެން ލުބުނާނަށް ދޭންފެށި ހަމަލާތަކުގައި މިހާތަނަށް 3500 މީހުން މަރުވެފައިވާއިރު އޭގެ ތެރޭގައި 670 އަންހެނުންނާއި 230 ކުޑަކުދިން ހިމެނެއެވެ. 15,000 ށް ވުރެގިނަ މީހުން ޒަޙަމް ވެފައިވާއިރު ސެލީންއަކީވެސް އޭގެތެރެއިން އެކަކެވެ.
ރިއެކްޝަންސް
