ޕީއެންސީގެ އެތެރޭގެ އިންތިޚާބު މިއަދު
648 ކެންޑިޑޭޓުން ވާދަކުރޭ
ރާއްޖޭގެ ވެރިކަންކުރާ ޕާޓީ، ޕީއެންސީގެ އެތެރޭގެ އިންތިޚާބު މިއަދު އޮންނާނެއެވެ. އެޕާޓީގެ ދާއިރާތަކުގެ އިންތިޚާބު ކުރިއަށްދާނީ މިއަދު ހެނދުނު 10:00-14:00 އަށެވެ.
މި އިންތިޚާބުގައި މާލެ އާއި އަތޮޅުތެރޭގެ، 88 ރަށެއްގައި ވޯޓުލުން ކުރިޔަށް ގެންދާނެ ކަމަށް ޕީއެންސީން ބުންޏެވެ. އިންތިޚާބުގައި، މާލޭގައި 56 ވޯޓް ފޮށި ބަހައްޓައެވެ. ޖުމުލަ 144 ވޯޓް ފޮށި ބަހައްޓާނެ ކަމަށް ޕީއެންސީން ބުންޏެވެ. މާލޭގައި ވޯޓްފޮށިތައް ބަހައްޓަނީ ދަރުބާރުގޭގައެވެ.
1984 މަޤާމަށް 648 ކެންޑިޑޭޓުން އިންތިޚާބުގައި ވާދަކުރެއެވެ. އަނެއް 1300 މަޤާމަށް، އެންމެ ކެންޑިޑޭޓަކު ކުރިމަތިލައްވާފައިވާތީ، އެމަގާމްތަކަށް އިންތިޚާބަކާ ނުލައި މީހުން ހޮވިފައިވާ ކަމަށް ޕީއެންސީން ބުންޏެވެ. މާލެ އާއި އަތޮޅުތެރޭގައި އިންތިޚާބު އޮންނަ 88 ރަށުގައި ވޯޓް ލުމުގެ ޙައްޤު ލިބިފައިވާ، 33500 މެމްބަރުން އެބަތިބި ކަމަށްވެސް ޕީއެންސީން ބުންޏެވެ.
މާލޭގެ ދާއިރާ ތަކުގެ މަޤާމުތަކަށް އިންތިޚާބު ކުރާ ފަރާތްތަކަށް ވޯޓްލުމަށް ދަރުބާރުގެއަށް ވަނުން ހަމަޖެހިފައި ވަނީ ބޮޑުތަކުރުފާނު މަގުންނެވެ. އަދި އަތޮޅު ތެރޭގެ ރަށްރަށުން އިންތިޚާބަށް ކުރިމަތި ލި ފަރާތްތަކަށް ވޯޓް ދިނުމަށް ދަރުބާރުގެއަށް ވަންނާނީ އަމީނީ މަގުން ކަމަށް ޕީއެންސީން ބުންޏެވެ. މި އިންތިޚާބުގައި ވޯޓްލެވޭނީ އަތޮޅުތެރޭގެ ރަށްރަށާއި މާލޭގައި ބަހައްޓާފައިވާ ވޯޓް ފޮށިތަކަށް އެކަންޏެވެ.
ޕީއެންސީން ބުނީ މިއީ ރާއްޖޭގެ ސިޔާސީ ޕާޓީއަކުން ބާއްވާ އެތެރޭގެ އެންމެ ބޮޑު އިންތިޚާބު ކަމަށެވެ.
ރިއެކްޝަންސް
