އިސްލާމީ މަރުކަޒުގެ މަސްފެންގަނޑު ސްޓެލްކޯއިން މަރާމާތުކޮށް ނިންމައިފި
އިސްލާމީ މަރުކަޒުގެ މަސްފެންގަނޑު ސްޓެލްކޯއިން މަރާމާތުކޮށް ނިންމައިފި އެވެ. ސްޓްލެކޯއިން މިއަދު ވަނީ މަސްފެންގަނޑު ނިންމާ އިސްލާމިކް މިނިސްޓްރީއާ ހަވާލުކޮށްފައެވެ.
އިސްލާމީ މަރުކަޒުގެ މުންނާރު ތިރީގައިވާ މަސްފެންގަނޑު ސްޓެލްކޯއިން މަރާމާތުކުރީ އެކުންފުނީގެ އިޖުތިމާއީ ޒިންމާގެ ދަށުން އަމިއްލަ އަށް އެދިގެންނެވެ. އެތަން މަރާނާތުކޮށްދޭނެ ފަރާތެއް ހޯދުމަށް އިސްލާމިކް މިނިސްޓްރީން ފުރަތަމަ އިއުލާނުކުރިއެވެ. ނަމަވެސް ސަރުކާރުން ޚަރަދު ކުޑަކުރާކަމަށް ބުނި ވަގުތެއްގައި އެކަން ކުރަން އިއުލާނުކުރުމުން އަމާޒުވި ފާޑުކިއުންތަކާއެކު އިއުލާނު ބާތިލްކުރީއެވެ. ފަހުން ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީއާއި އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުއާ މެދު ކުރެވުނު މަޝްވަރާތަކަށްފަހު ސްޓެލްކޯއިން އެމަސައްކަތާ ހަވާލުވީއެވެ. މަސްފެންގަނޑު މަރާމާތުކުރީ އިސްލާމީ މަރުކަޒަށް 40 އަހަރު ފުރޭތީ އެތަން ޒީނަތްތެރި ކުރުމަށް ކުރި މަސައްކަތްތަކުގެ ތެރެއިންނެވެ.
އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވިދާޅުވީ ސްޓެލްކޯގެ މެނޭޖިންގ ޑިރެކްޓަރ ހުސެން ފަހުމީގެ އިސްނެންގުވުމަށް ސްޓެލްކޯގެ އިޖުތިމާއީ ޒިންމާގެ ދަށުން ކުރިއަށްވުރެ މާރީތިކޮށް ސްޓެލްކޯއިން އެތަން ހަދާފައިވާ ކަމަށެވެ. އަދި އެ ސަރަހައްދަކީ ގިނަ އަދަދެއްގެ ކުޑަ ކުދިންނާއި މީހުން ޖަމާވާ ސަރަހައްދެއް ކަމުން އެތަނުގެ ރީތިކަން ދެކި، އެ ހިތްހަމަޖެހުން އެ ފަރާތްތަކުން ލިބިގަންނާނެ ކަމަށް ވިދާޅުވިއެވެ.
ކުރު މުއްދަތެއްގެ ތެރޭގައި ސްޓެލްކޯއިން އެތަން މަރާމާތުކޮށް، އިސްލާމީ މަރުކަޒަށް 40 އަހަރުވުމާއި ގުޅިގެން ބާއްވަން ނިންމަވާފައިވާ ޖަލްސާގެ ކުރިން އެތަން ހުޅުވައިދެއްވި ކަމަށްޓަކައި މިނިސްޓަރ ވަނީ ޝުކުރު އަދާކުރައްވާފައެވެ.
ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ ވިދާޅުވީ، ސައްތައިންސައްތަ ދިވެހިން މަސައްކަތް ކުރަމުންދާ ސްޓެލްކޯގެ މުވައްޒަފުން ގައުމީ އަދި ދީނީ ތަރިކަތައް ހަލާކުވެގެންދާތަން ބަލަން ބޭނުން ނުވާ ކަމަށެވެ. އެތަނުގެ މަރާމާތުގެ މަސައްކަތް ފެށީ އެ ލޭންޑްމާކްގެ ރީތިކަން އަނބުރާ ގެނައުމަށް ކަމަށް ވިދާޅުވިއެވެ. އަދި ދިވެހިންގެ ތާރީހާއި ސަގާފަތާއި ގުޅޭ އެތަން ރައްކާތެރިކަމާއެކު ދެމެހެއްޓުމަކީ އުއްމީދުކަމަށް ވިދާޅުވިއެވެ.
ރިއެކްޝަންސް
