17,400 މިއީ ހަމައެކަނި ނަމްބަރެއްތަ! ޣައްޒާގެ ކުޑަކުދިންގެ ޖީލެއް ނެތިކޮށްލައިފި
ތައުލީމް ހާސިލްކުރާ އުމުރެ ޖީލެއް ނެތިކޮށްލައިފި
17,400 މިއީ ފަހަރުގާ ހަމަ އާދައިގެ ނަމްބަރަކަށް ބައެއް މީހުންނަށް ވެދާނެއެވެ. ނަމަވެސް މިއީ 2023 އޮކްޓޯބަރު 7 ވަނަ ދުވަހުން ފެށިގެން މިއަދާ ހަމައަށް (ރަސްމީ އަދަދުތައް ދައްކާގޮތުން) އިޒްރާއިލްއިން ޝަހީދުކޮށްލި ފަލަޞްޠީނުގެ ކުޑަކުދިންގެ ޢަދަދެވެ. އިޒްރާއިލްގެ ހަމަލާތަކުގައި ކޮންމެ 30 މިނިޓަކުން ކުއްޖަކު ފުރާނަ ދޫކޮށް ދާންޖެހެއެވެ. ހަނގުރާމަ ފެށުނީއްސުރެ ފަލަޞްޠީނުގެ ރައްޔިތުން ބުނަމުންއައީ "އަހަރެމެން މިއީ ނަމްބަރެއް ނޫން" ކަމުގައެވެ. ނަމަވެސް މިއަދު ދުނިޔެއަށް ފަލަޞްޠީނުގެ ރައްޔިތުންނަކީ ނަމްބަރެއް ކަމުގައި ނޫނީ ނުވެއެވެ.
އެތައްހާސް ކުދިންގެ މަރާއެކު މުޅި ޣައްޒާ ކަށްބިމަކަށް ބަދަލު ވެއްޖެއެވެ. އިއްޔެ ދުނިޔޭގެ 70 ވަނަ ކުޑަކުދިންގެ ދުވަސް ފާހަގަކުރިއިރު ޣައްޒާގެ ކުދިން ކާނެ އެއްޗެއް, ބޯނެ ފެންފޮދެއް ނެތި ބަނޑަށް މަރުވަނީ އެވެ. ދުނިޔޭގެ އެހެން ޤައުމުތަކުގެ ކުޑަކުދިން އަރާމު ތަންމަތި ތަކުގައި ނިދާލާފައި ތިބޭއިރު ޣައްޒާގެ ކުޑަކުދިންގެ ޒަޙަމްވެފައިވާ ހަށިތައް ސުންނާފައިވެފައިވާ ޢިމާރާތް ތަކުގެ ދަށުން ހިރަފުހާއި ލެއިން ތަތްތެޅިފައިވާ ހާލު ނެރެމުން ދަނީއެވެ. ދުނިޔޭގެ ކަންކޮޅުތަކުގައި ކުޑަކުދިން ޓެބްލެޓް ހިފައިގެން އެންމެ ގަޔާވާ ގޭމް ކުޅެމުންދާއިރު ޣައްޒާގެ ކުޑަކުދިން ފިނި މޫސުމުގައި ހަށިގަނޑު ނިވާކޮށްލާނެ ރަޖައެއްނެތި ތުރުރުއަޅަނީއެވެ. މައިންބަފައިން ކުދިން ގޮވައިގެން އެހެން ޤައުމުތަކަށް ޗުއްޓީ ހޭދަކޮށްލަން ދާއިރު ޣައްޒާގެ އެތައްހާސް ކުޑަކުދިންނެއް ޔަތީމު މިސްކީނު ހާލުގައި އެތަޙައްމަލު ކުރަނީ ކޮންފަދަ ވޭނީ ދިރިއުޅުމެއް ހެއްޔެވެ! އެކުދިންގެ އިންސާނީ ޙައްގެއް, އަދި އަމުދުން ދިރިހުރުމުގެ ހައްގެއްވެސް ނެތީބާއެވެ!
ފާއިތުވި 13 މަސްދުވަހު އަހަރެމެން ބެލި ފޮޓޯތަކުގެ ތެރޭގައި ޣައްޒާގެ އެތައް ކުޑަކުދިންނެއް އެއީ ތިބާގެ ދަރިފުޅުނަމަ އެމަންޒަރު ބަލަން ކެތްނުވާ އެތައް ފޮޓޯއެއް އަހަރެމެން ބަލައިފީމެވެ. ތުއްތުކުދިން އެކުދިންގެ ކުޑަ ކޮއްކޮމެން ބުރަކަށިމަތީގައި ފައިމަގުގާ އުފުލާ މަންޒަރެވެ. ހިނގާ ހިނގާ ފަޔަށް ތަދުވެގެން ރޮވޭ މަންޒަރެވެ. މަރުވެފައިވާ މައިންބަފައިންގެ ހަށިތަކުގެ ބައިތައް ލެއާއެކު މަގުމަތިން ހޮވާ އެއްކުރާ މަންޒަރެވެ. ޒަޚަމްވެފައިވާ ކުދިން އެހެންކުދިންތަކުގެ މެދުގައި ވޭނަށް ކެތްނުކުރެވިގެން ތެޅިފޮޅޭ މަންޒަރެވެ. ކަފުންކޮށްފައިވާ ކޮއްކޮގެ ހަށިގަނޑު އުލުފާލައިގެން ހުންނަ ކުޑަކުއްޖާގެ މަންޒަރެވެ. އަހަރެމެން ކުރީ ކީއްހެއްޔެވެ! އެވާހަކަ ދެއްކުމަށް އަހަރެމެން ޖެހިލުންވީ އަހަރެމެންގެ އަމިއްލަ ދަރިފުޅަށް ނުވީމަ ހެއްޔެވެ!
ޖަނާޒާއެއް ނެތި އިމާރާތްތަކުގެ ދަށުގައި ވަޅުލެވިފައިވާ ކުޑަކުދިންގެ ޢަދަދެއްވެސް ނޭނގެއެވެ. ދިރި ތިބި ކުދިން އެކުދިންގެ މުޅި އުމުރުގައި މިހާރު އެތަޙައްމަލް ކުރަމުންދާ ވޭން އެކުދިންނާއެކު ވާނެއެވެ. ބިރުވެރި ހުވަފެނެއް ފަދައިންނެވެ. އެ ޓްރޯމާ އެކުދިންގެ ކޮންމެ ނޭވާއެއްގައި ހަރުލާފައި ހުންނާނެއެވެ. 411 ދުވަހުގެ ތެރޭގައި އިޒްރާއިލްއިން އެއް އަހަރު ނުފުރޭ 710 ފަލަޞްޠީނުގެ ކުޑަކުދިން ޝަހީދުކޮށްލައިފިއެވެ. 1 އަހަރާ 3 އަހަރާ ދެމެދުގެ 1793 ކުދިން އަދި 4 އަހަރާ 5 އަހަރާ ދެމެދުގެ 1205 ކުދިންވެސް ވަނީ ޝަހީދުކޮށްލާފައެވެ. ޕްރައިމަރީ ތަޢުލީމް ޙާސިލްކުރާ 6 އަހަރާ 12 އަހަރާ ދެމެދުގެ 4,205 ކުދިންނާއި ހައި ސްކޫލް ތައުލީމް ހާސިލްކުރާ 13 އަހަރާ 17 އަހަރާ ދެމެދުގެ 3,442 ކުދިން ޝަހީދުކޮށްލިއިރު ތަޢުލީމު ޙާސިލްކުރާ އުމުރުގެ ޖީލެއް ނެތިކޮށްލައިފިއެވެ. ތިބާގެ ދަރިފުޅު އޭގެ ތެރޭގައި ހިމެނޭނަމަ ތިބާ ހަނުހުރީސް ހެއްޔެވެ!
ކޮންމެ ދުވަހަކު އެވްރެޖްކޮށް 10 ކުއްޖެއްގެ އަތެއް ނޫނީ ފައެއްގެ ބައެއް ނެތިދެއެވެ. މުޅި އުމުރަށް އެކުދިން ނުކުޅޭދޭ ޙާލުގައި އުޅެންޖެހޭނެކަން އިޒްރާއިލްއިން ދަނީ ކަށަވަރުކުރަމުންނެވެ. ތުއްތުކުދިންގެ ފުރާނަތައް ސަލާމަތްކުރަން ހަދަންޖެހޭ ސާޖަރީތައް ހަދަނީ އައްސިކުރެވޭނެ ގޮތެއްނެތި އިންތިހާ ވޭނުގައެވެ. މިހުރިހާ ކަމަކާއެކު ޣައްޒާ މިއަދު ވެފައިވަނީ ކުޑަކުއްޖަކު ދިރިހުރުމަށް އެންމެ ނުރައްކާތެރި ތަނަށްވެފައެވެ.
އަޙްމަދުގެ ނަމުން ނަންދީފައިވާ 439 ކުއްޖެއް ޝަހީދުކޮށްލާފައިވާއިރު ބަރާގެ ނަމުން ނަންދީފައިވާ 71 ކުއްޖަކު ވަނީ ޝަހީދުކޮށްލާފައެވެ. ބަރާގެ މާނައަކީ މަޢުޞޫމްކަމެވެ. އިތުރު 35,000 ކުދިންގެ މައިންބަފައިން އެކުދިންނަށް ގެއްލި އާއިލާގެ ހިމާޔަތް ނެތިގޮއްސިއެވެ. ދީމާ (ހިމަފޮދު ވާރޭ) ނަމުން ނަންދީފައިވާ 46 ކުއްޖެއް ޝަހީދުކޮށްލާފައިވާއިރު އެކުދިން މަރުވީ ފެންފޮދެއް ނުލިބިއެވެ. އެލީން (ގަދައަށް ވިދާ) އަދި ނޫރް (އަލިކަން) ނަމުން ނަން ދީފައިވާ 128 ކުދިންގެ މަރާއެކު މުޅި ދުނިޔެއިން އަލިކަން ނެތިގެން ހިނގައްޖެއެވެ. ފަރަޙް (އުފާވެރިކަން) ނަމުން ނަންދިފައިވާ 64 ކުދިން ޝަހީދުކޮށްލި އިރު 64 ފަރަޙް އާއެކު މުޅި ފަލަޞްޠީނުގެ އުފާވެރިކަން ނެތިގޮސްފިއެވެ. ޙަލީލް އިބްރާހިމްގެ ނަމުން ނަން ދީފައިވާ 129 ކުއްޖަކާއި ޔޫސުފްގެ ނަމުން ނަންދީފައިވާ 167 ވެސް ޝަހީދުކޮށްލި ކުދިންގެ ތެރޭގައި ހިމެނެއެވެ. ޣަޒަލް (ރީތިކަމާއި ޝާއްބަކަން) ގެ ނަމުން ނަންދީފައިވާ 41 ކުދިންގެ މަރާއެކު އިންސާނިއްޔަތުގެ ރީތިކަން ދުނިޔެއިން ފަރުދާވެއްޖެއެވެ. މި އުއްމަތަށް ކައުކުރެއްވި އެންމެ ފަހުގެ ރަޞޫލާ މުޙައްމަދު (ސ.އ.ވ) ގެ ނަންފުޅުން ނަންދީފައިވާ 935 ކުދިން ޝަހީދުކޮށްލާފައިވާއިރު އެކުދިންނަކީ އިތުރު އެކަލޭގެފާނުގެ ސީރަތު ދަމަހައްޓާނެ ކުދިންކަމާ މެދު ސުވާލެއްނެތެވެ. ސެލީން (ސުވަރުގެއެއް ފަދަ) އަދި ޙާލިދް (މުޅި އުމުރަށް ދެމިގެންދާ) 97 ކުދިންނާނާއެކު ފަލަޞްޠީންގެ އެންމެހާ ޝަހީދުންނަށް ސުވަރުގޭގެ ދާޢިމީ ނިޢުމަތް ލިބުމަކީ އަބަދުގެވެސް ދުޢާއެވެ.
ރިއެކްޝަންސް
