އިޒްރޭލް ޕާސްޕޯރޓް މަނާކުރުމުގެ ކުރިން މައުލޫމާތު އެއްކުރަން އިދާރާތައް ހާޒިރުކުރަނީ
އިޒްރޭލް ޕާސްޕޯރޓް މަނާކުރުމުގެ ކުރިން ކަމާ ގުޅުންހުރި މައުލޫމާތު އެއްކުރަން އިދާރާތައް ހާޒިރުކުރަން ރައްޔިތުންގެ މަޖިލިހުގެ 241 ކޮމިޓީން ނިންމައިފިއެވެ.
އިޒްރޭލް ޕާސްޕޯރޓް މަނާކުރުމުގެ މައްސަލަ ކޮމިޓީގައި ޕާކްކޮށް, އެއް ދުވަސް ތެރޭގައި ޤާނޫނު އަސާސީ އިސްލާހުކުރުމުން ފާޑުކިއުން އަމާޒުވެފައި ވަނިކޮށް ކޮމިޓީން މިއަދު ނިންމީ ކަމާގުޅުންހުރި އިދާރާތައް ހާޒިރުކޮށް މައުލޫމާތު ސާފްކުރުމަށެވެ. އެގޮތުން އޭޖީ އޮފީހާއި, އިކޮނޮމިކް މިނިސްޓްރީއާއި, ޓޫރިޒަމް މިނިސްޓްރީ އާއި, އިމިގްރޭޝަންގެ އިތުރުން މަޓީއާ ބައްދަލުކުރަންވެސް ކޮމިޓީން ނިންމިއެވެ. އަދި ސިޔާސީ ޕާޓީތަކާއި ގުޅުންހުރި ޖަމްއިއްޔާތަކާވެސް ބައްދަލުކުރަން ކޮމިޓީން ނިންމިއެވެ.
ކޮމިޓީން ހޯދާ މައުލޫމާތުތަކުގެ ތެރޭގައި އިޒްރޭލްގެ ފަތުރުވެރިން އަންނަ އަދަދުތަކާއި, ފަތުރުވެރިން ނޫން ބޭނުންތަކުގައި ޒިޔާރަތްކުރާ މީހުންގެ ބޭނުންތައް ހިމެނެއެވެ. އިދާރާތައް ހާޒިރުކުރަން ކޮމިޓީން ފާސްކުރީ އެމްޑީޕީގެ މެމްބަރު ހަނިމާދޫ ދާއިރާގެ އަބްދުލްޣަފޫރު މޫސާ (ގަޕޯ) ގެ ވޯޓާ ނުލައެވެ. ގަޕޯ ވޯޓްގައި ބައިވެރި ނުވެއެވެ. ގަޕޯ ކުރިން ވިދާޅުވެފައި ވަނީ ކޮމިޓީއަށް ބިލް ފޮނުވުން ފިޔަވާ އެއްކަމެއްވެސް ނުކުރާ ކަމަށެވެ.
އިޒްރޭލް ޕާސްޕޯރޓް މަނާކުރަން އިމިގްރޭޝަން ޤާނޫނަށް އިސްލާހު ގެންނަން ހުށަހެޅުއްވީ ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމެވެ. އެއީ މެއި މަހުއެވެ. ކޮމިޓީން ދާދި ފަހުން ވަނި އެމައްސަލައިގަ ކޮމިޓީން ގޮތެއް ނިންމޭނީ އަންނަ އަހަރުގެ ފެބްރުއަރީގެ ނިޔަލަށް ކަމަށް ނިންމާފައެވެ.
އިޒްރޭލް ޕާސްޕޯރޓް މަނާކުރަން ކެބިނެޓުން ނިންމާ އެކަން ރައީސުލްޖުމްހޫރިއްޔާ ވަނީ ކުރިން އިއުލާނުވެސް ކުރައްވާފައެވެ. އެއީ އިޒްރޭލުން ފަލަސްތީނުގެ ރައްޔިތުންނަށް ދެމުންދާ ލާއިންސާނީ އަނިޔާތަކުގެ ސަބަބުންނެވެ. އިޒްލޭލް ޕާސްޕޯރޓް މަނާކުރުން އަވަސް ކުރުމަށް ގޮވާލާ ދޭތެރެ ދޭތެރެއިން އެއްވުންތައްވެސް ދަނީ ބާއްވަމުންނެވެ.
ރިއެކްޝަންސް
