ނަތަންޔާހޫ ހައްޔަރުކުރަން ބައިނަލްއަޤުވާމީ ކްރިމިނަލް ކޯޓުން އަމުރުކޮށްފި
އިޒްރާއިލްގެ ކުރީގެ ދިފާއީ ވަޒީރު ޔޯވް ގެލަންޓް އަދި ހަމާސްގެ އަސްކަރީ ކޮމާންޑަރު މޫހައްމަދު ދެއިފް ހައްޔަރުކުރުމުގެ އަމުރެއްވެސް ވަނީ ނެރެފަ
ހަނގުރާމައިގެ ޖަރީމާ ހިންގާކަމުގެ ތުޙުމަތުގައި އިޒްރާއިލްގެ ބޮޑުވަޒީރު ބެންޖަމިން ނަތަންޔާހޫ ހައްޔަރުކުރުމަށް އިންޓަނޭޝަނަލް ކްރިމިނަލް ކޯޓް (އައިސީސީ) ން މިއަދު އަމުރުކޮށްފިއެވެ. ނަތަންޔާހޫ އާއި އިޒްރާއިލްގެ ކުރީގެ ދިފާއީ ވަޒީރު ޔޯވް ގެލަންޓް ހައްޔަރުކުރުމަށް އަމުރުކޮށްފައިވަނީ 2023 އޮކްޓޯބަރު 8 ން ފެށިގެން 2024 މެއި 20 އާ ހަމައަށް އެފަރާތްތަކުން ހިންގާފައިވާ އިންސާނިއްޔަތާ ޚިލާފް ހަނގުރާމައިގެ ޖަރީމާ ތަކާ ގުޅިގެންނެވެ.
"ގަބޫލުކުރެވޭ ހެކިތައް އެބަހުރި ނަތަންޔާހޫ އާއި ޔޯވް ގެލަންޓް ގަސްތުގައި ޣައްޒާގެ އާންމުރައްޔިތުންގެ ދިރިހުރުމަށް ބޭނުންވާ އިންސާނީ އަސާސީ ޙައްގުތަކުން (ކާނާއާއި ބޯފެން އަދި ސިއްޙީ އާލާތްތަކާއި ބޭސް, ކަރަންޓާއި ތެޔޮ) މަޙްރޫމްކޮށްފައިވާ ކަމުގެ" އައިސީސީން ނެރުނު ބަޔާނުގައި ބުނެފައި ވެއެވެ.
އައިސީސީގެ އިއްތިފާގުން ވަނީ ހަމާސްގެ އަސްކަރީ ފިޔައިގެ ކޮމާންޑަރެއް ކަމަށްވާ މުޙައްމަދު އަލް-މަޞްރީ ހައްޔަރުކުރުމުގެ އަމުރެއްވެސް ނެރެފައެވެ. އެއީ 2023 އޮކްޓޯބަރު 7 ވަނަ ދުވަހު އިޒްރާއިލް އާއި ފަލަޞްޠީނުގައި ހިންގާފައިވާ ކަމަށް ތުހުމަތު ކުރެވޭ އިންސާނިއްޔާތާއި ޚިލާފް ހަނގުރާމައިގެ ޖަރީމާތަކާ ގުޅިގެންނެވެ. އޭގެ ތެރޭގައި މީހުން މެރުމާއި, ލާއިންސާނީ އަނިޔާ ދިނުމާއި, ރޭޕް އަދި އެހެނިހެން ޖިންސީ ހާނިއްކަ އާ ބެހޭ ތުޙުމަތުތައް ހިމެނެއެވެ.
ޖުލައި މަހު ދެކުނު ޣައްޒާއަށް އިޒްރާއިލްއިން ދިން ޙަމަލާތަކެއްގައި މަރާލާފައިވާ ކަމަށް އިޒްރާއިލްއިން ބުނެފައިވާ މުޙައްމަދު ދެއިފްގެ މައްޗަށްވެސް އައިސީސީން ވަނީ ހައްޔަރުކުރުމުގެ އަމުރެއް ނެރެފައެވެ. ކޯޓުން ބުނެފައިވަނީ އިޒްރާއިލްއިން އޭނާ މަރާލާފައިވާ ކަމަށް ބުނެފައި ވީނަމަވެސް އޭނާ ދުނިޔޭގައި ނެތްކަމަށް އަދި ބެލެވެން ނެތުމާއި އެކު އަމުރު ނެރެވޭނެ ޤާނޫނީ ހައިސިއްޔަތު އޮތްކަމަށެވެ.
އިޒްރާއިލްގެ ވެރިންނާއި ހަމާސްގެ ތިން ލީޑަރަކު ހައްޔަރުކުރުމުގެ އަމުރަކަށް 2024 މެއި މަހު އައިސީސީ ގައި އެދިފައިވަނީ ކޯޓުގެ ޕްރޮސެކިއުޓަރު ކަރިމް ޚާން އެވެ. އޭނާ އަކީ އިނގިރޭސި ވިލާތުގެ ރައްޔިތެކެވެ. ހައްޔަރުކުރަން އެދުނު ހަމާސްގެ އިތުރު ލީޑަރުންގެ ތެރޭގައި ޖުލައި މަހު އިޒްރާއިލްއިން މަރާލާފައިވާ އިސްމާއިލް ޙަނިއްޔާ އާއި, އޮކްޓޯބަރު މަހު އިޒްރާއިލްއިން މަރާލާފައިވާ ޔަޙްޔާ ސިންވާރުވެސް ހިމެނެއެވެ.
އިޒްރާއިލްއަކީ އައިސީސީގެ މެމްބަރު ގައުމެއް ނޫނެވެ. ނަތަންޔާހޫ މީގެ ކުރިންވަނީ އޭނާގެ މައްސަލަ އައިސީސީއަށް ހުށަހެޅި ޕްރރޮސެކިއުޓަރަށާއި އެ ކޯޓަށްވެސް ވަރަށް ބޮޑަށް ފާޑުކިޔާފައެވެ. ނަމަވެސް އައިސީސީން ބުރާސްފަތި ދުވަހު ބުނެފައިވަނީ އިޒްރާއިލްއިން އެކޯޓުގެ ނިންމުން ބަލައިގަތުން އެއީ ކޯޓަށް ކޮންމެހެން ބޭނުންވާ ކަމެއް ނޫންކަމުގައެވެ.
ރިއެކްޝަންސް
