މާލެ ސިޓީއާއި މީދޫގެ ފެށުން ބޮޑު މޮޅަކުން
މާލެ ސިޓީއާއި ދ.މީދޫން ގޯލްޑް ކަޕް ބޮޑު މޮޅަކުން ފަށައިފި އެވެ. މާލެ ސިޓީ މުބާރާތް ފެށީ 4-0 ން ތިމަރަފުށި ބަލިކޮށްގެންނެވެ. އަދި ދ.މީދޫ މުބާރާތް ފެށީ 4-1 ން ފަރެސްމާތޮޑާ ބަލިކޮށްގެންނެވެ.
މާލެ ސިޓީން ވަނީ ތިމަރަފުށި ކޮޅަށް ކޮންމެ ހާފެއްގައި ދެ ލަނޑު ޖަހާފައެވެ. ފުރަތަމަ ހާފްގައި ދެ ލަނޑު ޖެހީ ހުސެއިން ޝުއައިބު އާއި އިސްމާއީލް ވިފާގު އެވެ. ދެވަނަ ހާފްގައި ދެ ލަނޑު ޖެހީ އަހުނަފް މުޙައްމަދު ތަސްނީމް އާއި މިސްރު މިޑްފީލްޑަރ ހާލިދު ޖަމާލް ހަލީލް އެވެ. ދެޓީމްގައިވެސް ފުރަތަމަ ޑިވިޝަންގައި ކުޅޭ ކުޅުންތެރިން ހިމެނެއެވެ.
ގްރޫޕް ބީގައި މިދެޓީމްގެ އިތުރުން ހިމެނެނީ އޭދަފުށްޓާއި ތުޅާދޫއެވެ.
ގްރޫޕް އޭގެ ދެވަނަ މެޗު ދ.މީދޫން ކާމިޔާބުކުރީ ވެސް ކޮންމެ ހާފެއްގައި ދެ ލަނޑު ޖަހައިގެންނެވެ. މެޗުގައި ފުރަތަމަ ހަތަރު ލަނޑު ޖެހީވެސް މީދޫ ޓީމުންނެވެ. ހަތްވަނަ މިނިޓްގައި ލީޑް ނަގައިދިނީ އިބްރާހީމް އިމްރާން އެވެ. ނިމެނިކޮށް ދެވަނަ ލަނޑު ޖެހީ މުޒުދާން ހަސަން އެވެ. އަދި ދެވަނަ ހާފް ފަށައިގެން ތިންވަނަ މިނިޓްގައި ތިންވަނަ ލަނޑުވެސް އިބްރާހީމް އިމްރާން އެވެ. މީދޫގެ ފަހު ލަނޑު ޖެހީ ހައްމާމް ރަޝާދު އެވެ. ފަރެސްމާތޮޑާ ޓީމްގެ ހަމައެކަނި ލަނޑު މެޗުގެ އިތުރު ވަގުތުގައި ޖެހީ ސައިސުالله އަޝްރަފް އެވެ. މިގްރޫޕްގެ ފުރަތަމަ މެޗު ކާމިޔާބުކުރީ ފުވައްމުލައް ސިޓީ އެވެ.
މުބާރާތުގައި ފަރެސްމާތޮޑާ ޓީމަށް އިރުޝާދު ދިނީ ގައުމީ ޓީމްގެ ކުރީގެ މިޑްފީލްޑަރ އަޝްރަފް ލުތުފީ (ސަމްޕަތު) އެވެ. މާލެ ސިޓީ ޓީމަށް އިރުޝާދު ދެނީ ކުރިން ގައުމީ ޓީމަށް ކުޅުނު މިޑްފީލްޑަރ އަހުމަދު ނާޒު (އާކޭ) އެވެ.
އަތޮޅު ތަކުގެ ރަށްތަކަށް އަމާޒުކޮށްގެން މާލޭގައި ކުރިއަށް ގެންދާ މުބާރާތުގައި ވާދަކުރަނީ 17 ރަށަކުން 17 ޓީމެވެ.
ރިއެކްޝަންސް
