ބްރޯޑްކޮމްގެ ރައީސްގެ ދައުރު ހަމަވަނީ
މޯލްޑިވްސް ބްރޯޑްކާސްޓިންގ ކޮމިޝަނުގެ ރައީސް މަރިޔަމް ވަހީދާއާއި އިތުރު މެމްބަރެއްގެ ދައުރު ހަމަވާތީ މެމްބަރު ކަމަށް ކުރިމަތިލުމުގެ ފުރުޞަތު ހުޅުވާލައިފިއެވެ.
ރައީސުލްޖުމްހޫރިއްޔާގެ އޮފީހުން ހޯމަދުވަހު ފުރުޞަތު ހުޅުވާލީ އެކޮމިޝަންގެ ދެ މަގާމަށް ކުރިމަތިލުމުގެ ފުރުޞަތެވެ. މަރިޔަމް ވަހީދާގެ އިތުރުން ދައުރު ހަމަވަނީ އަލީ ޔޫސުފް އެވެ. ދެ މެމްބަރުންގެ ވެސް ދައުރު ހަމަވަނީ ކުރިއަށް އޮތް ޑިސެމްބަރު މަހުގެ ފަސްވަނަ ދުވަހަށެވެ.
މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރުކަމުގެ މަޤާމަށް ކުރިމަތިލުމަށް ރައީސުލްޖުމްހޫރިއްޔާގެ އޮފީހުން ފުރުޞަތު ދީފައިވަނީ މިމަހުގެ 26 ވަނަ ދުވަހުގެ 12:00 ގެ ނިޔަލަށެވެ. މެންބަރުކަމުގެ ފޯމު ބަލައިގަންނަނީ މަޤާމަށް ކުރިމަތިލުމަށް ދީފައިވާ މުއްދަތުގައި، ރަސްމީ ބަންދު ދުވަސްތައް ފިޔަވައި، އެހެން ދުވަސްދުވަހުގެ ހެނދުނު 08:30 އިން މެންދުރު 12:00 އަށް ރައީސުލްޖުމްހޫރިއްޔާގެ އޮފީހުންނެވެ.
ބްރޯޑްކާސްޓިންގ ކޮމިޝަންގެ މެމްބަރުން އައްޔަން ކުރައްވަނީ ރައްޔިތުންގެ މަޖިލިހުގެ ރުހުމާއެކު ރައީސުލްޖުމްހޫރިއްޔާ އެވެ. ރައްޔިތުންގެ މަޖިލިހަށް ތުޅާދޫ ދާއިރާގެ އަމިއްލަ މެމްބަރު އަބްދުލް ހަންނާނު އަބޫބަކުރު ވަނީ މީޑިޔާ ކޮމިޝަންގެ ބިލެއްވެސް ހުށަހަޅުއްވާފައެވެ. އެއީ ބްރޯޑްކާސްޓިންގ ކޮމިޝަނާއި މީޑިޔާ ކައުންސިލް އެއްކޮށްލައިގެން އުފައްދާ ކޮމިޝަނެކެވެ. ނަމަވެސް ނޫސްވެރިންގެ ކަންބޮޑުވުންތަކާއެކު އެބިލް މަޖިލިހުން ބޭރުކޮށްލާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ދެއްވާފައެވެ.
މޯލްޑިވްސް މީޑިޔާ ކައުންސިލްގެ މެމްބަރުންގެ ދައުރުވެސް ހަމަވާތީ އެކައުންސިލްގެ އިންތިޚާބު ބޭއްވުމަށް އެކަމަށް އެދޭ ފަރާތްތަކުން މިހާރު ވަނީ ހުށަހަޅާފައެވެ. ނަމަވެސް އިންތިޚާބު ބާއްވާ ތާރީޚެއް ޔޫތް މިނިސްޓްރީން އަދި ނުބުނެއެވެ.
ރިއެކްޝަންސް
