500 ޑޮލަރު މާރުކުރާ އުޞޫލު ބަދަލެއް ނުކުރާނަން- ރައީސް
2026 ވަނަ އަހަރުގެ ފުރަތަމަ ކްއާޓާއިން ފެށިގެން ބޭރަށް ފުރާ ދިވެހިންނަށް 1000 ޑޮލަރު ގަނެވޭނެ
ޓޫރިސްޓް ރިސޯރޓްތަކަށް އަންނަ ކޮންމެ ފަތުރުވެރިއަކަށް 500 ޑޮލަރު މޯލްޑިވްސް މަނިޓަރި އޮތޯރިޓީ (އެމްއެމްއޭ) އަށް މާރުކުރަން ޖެހޭގޮތަށް ހެދި އުޞޫލު ބަދަލު ނުކުރައްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.
ސަރުކާރަށް އެއް އަހަރު ފުރުން ފާހަގަކުރުމަށް ބާއްވަމުން ގެންދަވާ ޖަލްސާގައި ރައީސް މުއިއްޒު އަޑަށް ބާރުލައްވާ ތަކުރާރުކޮށް ވިދާޅުވީ 'އެއުޞޫލު ބަދަލެއް ނުކުރައްވާނެ' ކަމަށެވެ. ރައީސުލްޖުމްހޫރިއްޔާ ވިދާޅުވީ ޤާނޫނާއި, އުޞޫލަށް ތަބާވާން ޖެހޭނެ ކަމަށެވެ. ރައީސުލްޖުމްހޫރިއްޔާ ތަކުރާރުކޮށް މިހެން ވިދާޅުވީ ރާއްޖޭގެ ފަތުރުވެރިކަމުގެ ދާއިރާގައި ރިސޯރޓްތައް ހިންގަވާ އިސް ފަރާތްތަކުން އެއުޞޫލަށް ތަބާވެވެން ނެތްކަމަށް ބުނެ އެމްއެމްއޭ އަށް ސިޓީތައް ފޮނުއްވާފައިވަނިކޮށެވެ. ތަފާތު އެކި ސަބަބުތައް ބަޔާންކޮށް ރާއްޖޭގެ ފަތުރުވެރިކަމުގެ ދާއިރާގައި އެންމެ ކުރީގައި ތިއްބެވި ބޭފުޅުން ހިމެނޭ ގޮތަށް ވަނީ ސަރުކާރުން ކަނޑައަޅުއްވާފައިވާ އުޞޫލުގެ ތެރެއިން ޑޮލަރު މާރު ކުރެވެން ނެތްކަން އަންގާފައެވެ.
" ވަރަށް ސާފްކޮށް މިދަންނަވަނީ ގަވާއިދު ބަދަލެއް ނުކުރާނަމޭ. ވަރަށް ސާފްކޮށް މިދަންނަވަނީ ގަވާއިދު ބަދަލެއް ނުކުރާނަމޭ. 500 ޑޮލަރު މާރުކުރައްވަން ޖެހިވަޑައިގަންނަވާނޭ. ގަވާއިދަށް ތަބާވުމަކީ އެންމެންގެ މައްޗަށް ލާޒިމްކަމެކޭ. އެކަން ކުރައްވަން ޖެހިވަޑައިގަންނަވާނޭ" ރައީސް ހަރުއަޑުން ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ އެއުޞޫލަށް އަމަލުކުރުމުން އޭގެ ފައިދާ ވަނީ ރައްޔިތުންނަށް ކަމަށެވެ. ޓޫރިޒަމް އިންޑަސްޓްރީގެ އެހީތެރިކަމާއި އެއްބާރުލެއްވުމާ އެކީގައި ޑޮލަރު މާރުކުރުމުގެ ކަންތައް ކުރިއަށްދާކަމަށް ވަންޏާ 2026 ގެ ފުރަތަމަ ކްއާޓާރއާ ހިސާބަށް ދާއިރު ބޭރަށް ފުރާ ދިވެހިންނަށް 1000 ޑޮލަރު ގަތުމުގެ ފުރުޞަތު ދެވޭނެ ކަމަށް ރައީސް ވިދާޅުވިއެވެ. މިހާރު ބެންކް ރޭޓްގައި ގަންނަން ލިބެނީ 500 ޑޮލަރެވެ.
ރިއެކްޝަންސް
