ފުރަތަމަ ފުރުޞަތުގައިވެސް ރައީސް ޔާމީން ދޫކޮށްލަން އެދުނިން, ދެވަނަ ފުރުޞަތުގައިވެސް އެދުނިން- ރައީސް މުއިއްޒު
ރިޔާސީ އިންތިޚާބު ކާމިޔާބުކުރައްވާ ލިބިވަޑައިގެންނެވި ފުރަތަމަ ފުރުޞަތުގައިވެސް ކުރީގެ ރައީސް ޔާމީން ދޫކޮށްލަން އެދިވަޑައިގެންނެވި ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. އެމަނިކުފާނު އެވާހަކަ ތަކުރާރު ކުރެއްވީ ސަރުކާރަށް އެއް އަހަރު ފުރުން ފާހަގަ ކުރުމަށް މިރޭ ކުރިއަށް ގެންދަވާ ޖަލްސާގައެވެ.
ރައީސުލްޖުމްހޫރިއްޔާ އެވާހަކަ ތަކުރާރުކުރެއްވީ ރައީސް ޔާމީން ގެއަށް ބަދަލުކޮށްދެއްވުމަށް އެދިވަޑައިނުގަންނަވާ ކަމަށް ޔާމީނާއި, ކުރީގެ ރައީސް އިބްރާހީމް މުޙައްމަދު ޞާލިހުވެސް ވިދާޅުވުމާ ގުޅިގެންނެވެ. ސަރުކާރަށް އެއް އަހަރު ފުރުން ފާހަގަކުރުމަށް ބޭއްވި ޖަލްސާގައި އެންމެ ފުރަތަމަވެސް ރައީސް ފާހަގަކުރެއްވީ ޔާމީން ގެއަށް ބަދަލުކޮށްދޭން އެދިވަޑައިގެންނެވި ކަމަށެވެ.
ރައީސުލްޖުމްހޫރިއްޔާ ވިދާޅުވީ އިންތިޚާބު ކާމިޔާބުކުރައްވާ އޭރުގެ ރައީސް ޞާލިހު ކުރެއްވި ފުރަތަމަ ފޯނު ކޯލްގައިވެސް ރައީސް ޔާމީން ދޫކޮށްލަން އެދިވަޑައިގެންނެވި ކަމަށެވެ. އިންތިޚާބު ކާމިޔާބުކުރައްވާ ރައްޔިތުންނާ މުހާތަބުކޮށް ދެއްކެވި ފުރަތަމަ ވާހަކަފުޅުގައިވެސް ޔާމީން ޖަލުގައި އޮތުމަކީ ގަބޫލުކުރެވޭ ކަމެއް ނޫން ކަމަށް ވިދާޅުވިކަން ފާހަގަކުރެއްވިއެވެ. އަދި އެޖަލްސާގައި ދެއްކެވި އެވާހަކަ މިރޭގެ ޖަލްސާގައި ދެއްކިއެވެ. އެޖަލްސާގައި ރައީސް ވިދާޅުވަނީ ރައީސް ޔާމީން ޖަލަށް ލާފައިވަނީ ނުހައްގުން ކަމަށެވެ. އަދި އެއީ ޝަރީއަތަށް ނުފޫޒު ފޯރުވައިގެން ކުރެއްވި ކަމެއް ކަމަށެވެ.
ރައީސުލްޖުމްހޫރިއްޔާ ވިދާޅުވީ ރަސްމީކޮށް ރައީސް ޞާލިހު ބައްދަލުކުރެއްވިއިރު ރައީސް ޔާމީން ގެއަށް ބަދަލުކުރައްވަން ލޯންޗަށް އަރާވަޑައިގަންނަވަމުންދާކަން ފާހަގަކުރައްވާ އެކަމަށް ޝުކުރު އަދާކުރެއްވި ކަމަށެވެ. ނަމަވެސް ރައީސް ޞާލިހު މިއަދު ރާއްޖެ ޓީވީގައި ވިދާޅުވީ އެބައްދަލުކުރެއްވުމުގައިވެސް ޔާމީން ދޫކޮށްލަން އެދިވަޑައިނުގަންނަވާ ކަމަށެވެ. ޔާމީން ގެއަށް ބަދަލުކުރަން ލޯންޗަށް އަރާވަޑައިގަންނަވާ ކަމަށް ދެންނެވުމުން އޭރުގެ އިންތިޚާބީ ރައީސްއަށް ޝޮކެއް ލިބިވަޑައިގެންނެވި ކަމަށް ޞާލިހު ވިދާޅުވިއެވެ. އަދި ޔާމީން ގެއަށް ބަދަލުކުރައްވާކަން އެނގިވަޑައިގެންފައި ނެތްކަން ފާހަގަކުރެއްވުނު ކަމަށްވެސް ރައީސް ޞާލިހު ވިދާޅުވިއެވެ.
ރައީސް ޞާލިހުއާއި ރައީސް ޔާމީނު އެކަމާ ގުޅިގެން ދެއްކެވި ވާހަކަތައް ދޮގުކުރައްވާ ރައީސުލްޖުމްހޫރިއްޔާ ވިދާޅުވީ ޔާމީން ގެއަށް ބަދަލުކުރެއްވުމަށް ފުރަތަމަ ފުރުޞަތުގައިވެސް, ދެވަނަ ފުރުޞަތުގައިވެސް އެދިވަޑައިގެންނެވި ކަމަށެވެ.
" އަލްހަމްދިالله އެމަނިކުފާނު އެހުރީ މިނިވަންވެފަ." ރައީސް ވިދާޅުވިއެވެ.
ރައީސް ޔާމީނު ގެންދަވަނީ ސަރުކާރާއި ރައީސް ޑރ.މުއިއްޒަށް ފާޑު ކިޔަމުންނެވެ. އަދި މިސަރުކާރުގެ އިސްވެރިންވެސް ބޭނުންވީ ޔާމީން ޖަލުގައި ބާއްވަން ކަމަށް ތަކުރާރުކޮށް ގެންދަވަނީ ވިދާޅުވަމުންނެވެ.
ރިއެކްޝަންސް
