ބ.އޭދަފުށީގައި 1000 ހައުސިންގ ޔުނިޓް އެޅުމުގެ އެއްބަސްވުމުގައި ސޮއިކޮށްފި
ބ.އޭދަފުށީގައި 1000 ހައުސިންގ ޔުނިޓް އެޅުމުގެ އެއްބަސްވުމުގައި ސޮއިކޮށްފިއެވެ. އެމަސައްކަތް ހަވާލުކުރީ ޗައިނާގެ ސިނޯހައިޑްރޯ ކުންފުންޏާއެވެ.
ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ޢިމާރާތްކުރުމާއި ބިނާރާބެހޭ ވަޒީރު ޑރ އަބްދުﷲ މުއްޠަލިބެވެ. މިނިސްޓަރ މުއްތަލިބު ވިދާޅުވީ މި އަހަރުގެ މޭ މަހުގެ 8 ވަނަ ދުވަހު ޗައިނާ ކުންފުންޏާއެކު ފަހުމުނާމާއެއްގައި ސޮއިކޮށް، އެ ފަހުމުނާމާގެ ދަށުން ގިނަ މަސައްކަތްތަކެއް ކުރިއަށްގެންގޮސްފައިވާ ކަމަށެވެ.
މިމަޝްރޫއުގެ ދަށުން އޭދަފުށީގައި އިމާރާތް ކުރަނީ 15 ފަންގިފިލާގެ ތިން ޓަވަރެވެ. ތިން ޓަވަރުގައި ހިމެނެނީ 3 ކޮޓަރީގެ 336 ފުލެޓާއި, 2 ކޮޓަރީގެ 772 ފުލެޓެވެ. އޭދަފުއްޓަކީ ރާއްޖޭގައި ތަރައްޤީކުރާ އަރބަން ސެންޓަރުތަކުގެ ތެރޭގައި ހިމެނޭ ރަށެކެވެ. އެކަން ފާހަގަކުރައްވާ މިނިސްޓަރ މުއްޠަލިބު ވިދާޅުވީ އޭދަފުށްޓަކީ ތަރައްޤީގެ ނާރެހެއްގެ ގޮތުގައި ތަރައްޤީވެގެންދާނޭ ރަށެއް ކަމަށެވެ.
" ފަނަރަ ބުރީގެ 12 ޓަވަރު އެޅުމަށް ކަނޑައެޅި މައިގަނޑު ސަބަބަކީ އޭދަފުށްޓަކީ ސަރުކާރުން ކަނޑައަޅުއްވާފައިވާ އާބަން ސެންޓަރަކަށް ވުމާއި, އެރަށުގެ ބިން އެންމެ ހެޔޮގޮތުގައި ބޭނުން ކުރުމަށް އަޅުގަނޑުމެން ކުރަންޖެހޭ މަސައްކަތުގެ ތެރެއިން ބިން އިތުރު ކުރެވެން ނެތުމާ އެއްކޮށް, ވާޓިކަލް ޑިވެލޮޕްމަންޓަކީ މުހިއްމު ކަމެއް ކަމަށް ގަބޫލުކުރެވޭތީ" ވަޒީރު ވިދާޅުވިއެވެ.
މި ހައުސިންޔުނިޓުތައް ވެގެންދާނީ، އޭދަފުއްޓާއި އެ ސަރަޙައްދުގެ ރިސޯޓުތަކުގައި މަސައްކަތްކުރާ އާބާދީތަކަށް ބޯހިޔާވަހިކަން ލިބިގެންދާނެ ފުރުޞަތަކަށް ކަމަށް ވަޒީރު ވިދާޅުވިއެވެ. ވަޒީރު ވިދާޅުވީ އޭދަފުށި ވެގެންދާނީ އާބާދީއާއި ތަރައްޤީ އެއްފަސް ކުރުމުގެވެސް ނާރެހަކަށް ކަމަށެވެ.
ފަތުރުވެރިކަމުގެ ސިނާޢަތުގައި ވަޒީފާ އަދާކުރާ ހީވާގި ދިވެހި މުވައްޒަފުންނަށް ޚާއްޞަ ސޯޝަލް ހައުސިންގ ކެޓަގަރީއެއް ތަޢާރަފުކޮށް ސަރުކާރުން އެންމެ ފުރަތަމަ ހިންގާ ހައުސިންގ ސްކީމްތަކުގެ ތެރެއިން ގެދޮރުވެރިކަން ފަހިކޮށްދިނުމަކީ ދިވެހީންގެ ރާއްޖެ މެނިފެސްޓޯގެ މުހިންމު އަމާޒެކެވެ.
މިނިސްޓަރ ވިދާޅުވީ އޭދަފުށި ހައުސިންގ މަޝްރޫއަކީ ސަރުކާރުގެ ބޯހިޔާވަހިކަމުގެ މަޝްރޫއު ފަށައިގަންނަންވެސް އެންމެ މުހިއްމު އެއް މަޝްރޫއު ކަމަށެވެ. ވަޒީރު ވިދާޅުވީ އަންނަ އަހަރު މިމަޝްރޫއަށް ފައިސާ ހަމަޖެހި, އަމަލީ މަސައްކަތް ފެށިގެންދާނެ ކަމަށް އުއްމީދު ކުރައްވާ ކަމަށެވެ. މިދައުރުގެ ތެރޭގައި އެތަނުގައި މީހުންނަށް ދިރިއުޅެވޭނެ ކަމުގެ ޔަގީންކަން އެބައޮތް ކަމަށްވެސް ވަޒީރު ވިދާޅުވިއެވެ.
ސަރުކާރުން ރާއްޖޭގެ އެކި ކަންކޮޅުތަކުގައި އެޅުމަށް ކަނޑައަޅާފައިވާ 40،000 ހައުސިން ޔުނިޓުގެ މަޝްރޫޢުގެ ތެރެއިން އެންމެ އިސްކަންދޭ އެއް ރަށަކަށް އޭދަފުށި ހައްދަވާނެކަމަށް، މި އަހަރުގެ މާރިޗު މަހު އޭދަފުއްޓަށް ކުރެއްވި ދަތުރުފުޅުގައި ރައީސުލްޖުމްހޫރިއްޔާ ވަނީ ވިދާޅުވެފައެވެ.
ރިއެކްޝަންސް
