އިމާމުންނަށް ޖީންސާއި ޓީޝާރޓް ނުލެވޭ ގޮތަށް ހަދައިފި
އިމާމުންނަށް ޖީންސާއި ޓީޝާރޓް ނުލެވޭ ގޮތަށް ހަދައިފި އެވެ. އިމާމެއްގެ ގޮތުގައި ހުންނަ ވަގުތު ޖިންސާއި ޓީޝާރޓް ނުލެވޭ ގޮތަށް އިސްލާމިކް މިނިސްޓްރީން ވަނީ އިމާމުންނާއި މުދިމުންގެ ސުލޫކީ މިންގަނޑުގައި ހިމަނާފައެވެ.
އިމާމުންނާއި މުދިމުންގެ ސުލޫކީ މިންގަނޑު ބަހައްޓަންވީ ގޮތުގެ އުސޫލެއް އިސްލާމިކް މިނިސްޓްރީން ޢާއްމުކުރީ މިދިޔަ ބުރާސްފަތި ދުވަހު އެވެ. މިއީ މުޅިން އަލަށް އާއްމުކުރި އުސޫލެކެވެ. އެއުޞޫލުގައިވާ ގޮތުން އެފަދަ ކަންކަން ހިމެނީ އިމާމުންނާއި މުދިމުންނަކީ އިޖުތިމާއީ މިންގަނޑުތަކާ އެއްގޮތަށް އަމަލުކުރާ ބައެއްކަން ކަށަވަރު ކުރުމަށެވެ. ޖިންސާއި ޓީޝާޓް ލުމުގެ އިތުރުން ގަޔަށް ބާރު އެއްޗިހި ލުންވެސް އެއުސޫލުގެ ދަށުން މަނާވާނެއެވެ.
އިސްލާމިކް މިނިސްޓްރީން ބުނީ އުސޫލުގެ މަގުސަދަކީ މިސްކިތްތަކުގެ އިމާމުންނާއި މުދިމުންނަކީ އިސްލާމްދީނާއި ދިވެހިރާއްޖޭގެ ޤާނޫނު އަސާސީއާއި ޤާނޫނުތަކާއި ގަވާއިދުތަކާއި އާއްމު އިޖުތިމާޢީ މިންގަނޑުތަކާއި އެއްގޮތަށް ޢަމަލުކުރާ ބައެއްކަން ކަށަވަރުކުރުން ކަމަށެވެ. އަދި މިސްކިތްތަކުގެ އިމާމުންނާއި މުދިމުންނަކީ ދީނީ އެއްބައިވަންތަކަމާއި ޤައުމީ ވަޙްދަތު ދެމެހެއްޓުމަށް މަސައްކަތްކުރާ ބަޔަކަށް ހެދުމާއި، ވަޒީފާގެ ޒިންމާތަކަށް ރައްކާތެރިވުމަށް ބާރުއެޅުމަށާއި ހުރިހާ އިމާމުން ޢަމަލުކުރާނެ އެއް މިންގަނޑެއް ކަނޑައެޅުން ކަމަށް އެމިނިސްޓްރީން ބުންޏެވެ.
މީގެ އިތުރުން އިމާމުންނާއި މުދިމުންނަކީ ރިވެތި އަޚުލާޤީ ސިފަތައް ދަމަހައްޓާ ސުލޫކު ރަނގަޅު ނަމޫނާ ބަޔަކަށް ހެދުމާއި އިމާމުންނާއި މުދިމުންނަކީ މުޖުތަމަޢު ބަލައިގަންނަ އަބުރުވެރި އަދި އާއްމުން އިތުބާރުކުރާ ފަދަ ބަޔަކަށް ހެދުމަކީވެސް އުސޫލު ހެދުމުގެ ބޭނުމެއް ކަމަށް އިސްލާމިކް މިނިސްޓްރީން ބުންޏެވެ.
އިމާމުންނާއި މުދިމުންގެ ވާޖިބާއި މަސްއޫލިއްޔަތު އަދާކުރަންވީ ގޮތާއި، ހެދުން އެޅުމުގައި ބަހައްޓަންވީ އަދި ފަރުވާތެރިވާންވީ ކަންކަމާއި އަމިއްލަ ކަންކަމާއި އުޅުންތައް ބަހައްޓަންވީ ގޮތްވެސް އުސޫލުގައި ވަނީ ބަޔާންކޮށްފައެވެ. އަދި މިސްކިތުގައި ކުރާ އަޅުކަމާއި ގުޅުންހުރި ކަންކަމުގައި ޢަމަލުކުރަންވީ ގޮތުގެ ތަފްސީލްތައްވެސް ވަނީ ހިމަނާފައެވެ. މީގެ އިތުރުން މިސްކިތުގައި ހިނގާ ނޭދެވޭ ކަންކަން ހުއްޓުވުމާއި ގުޅޭ ގޮތުންނާއި ޤާނޫނާއި ގަވާއިދުތަކަށް ހުރުމަތްތެރިކޮށް ހިތުމާއި، މި އުސޫލަށް ތަބާނުވާނަމަ ފިޔަވަޅު އަޅާނެ ގޮތްތައްވެސް އުސޫލުގައި ހިމަނާފައިވެއެވެ.
މި އުސޫލާއި ގުޅޭ ގޮތުން އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވީ، މިއީ އިސްލާމީ ކަންކަމުގެ ނިޒާމް ހަރުދަނާ ކުރުމަށް ރައީސް ޑރ. މުޙައްމަދު މުޢިއްޒުގެ އިރުޝާދުގެ ދަށުން ކުރިއަށް ގެންދެވޭ މަސައްކަތުގެ ބައެއްކަމަށެވެ.
ރިއެކްޝަންސް
