ޔުވެންޓަސް އިން ޕޮގްބާގެ އެއްބަސްވުން އުވާލައިފި
އިޓާލިއަން ސެރީ އޭ ގެ ކްލަބް ޔުވެންޓަސްއިން ޕައުލް ޕޮގްބާ އާއެކު 2026 ވަނަ އަހަރާ ހަމައަށް ހަދާފައިވާ އެއްބަސްވުން އުވާލައިފިއެވެ. ހުކުރު ދުވަހު ކްލަބުން އެކަން ޔަޤީން ކޮށްދިންއިރު އެއްބަސްވުން އުވާލާފައިވަނީ ދެފަރާތުގެ ރުހުމާއެކުއެވެ.
"ޕޮގްބާ އާއެކު ކްލަބުން ހަދާފައި އޮތް އެއްބަސްވުން ނޮވެމްބަރު މަހު 30ގެ ނިޔަލަށް ހަމަވާނެ. ކްލަބުން އެދެނީ ޕޮގްބާގެ ޕްރޮފެޝަނަލް ކެރިއަރ އަށް ރަނގަޅު މުސްތަގުބަލެއް" ޔުވެންޓަސްއިން ނެރުނު ބަޔާނުގައި ބުނެފައި ވެއެވެ. އެހެންކަމުން, ނޮވެމްބަރު 30 ގެ ފަހުން ޕޮގްބާ އަކީ ފްރީ ކުޅުންތެރިއެކެވެ.
ފްރާންސްގެ ތަރި ޕޮގްބާ މަނާ ބޭހަށް ޕޮޒިޓިވްވެ ކޯޓް އޮފް އާބިޓްރޭޝަން ފޮރ ސްޕޯޓްސް (ސީއޭއެސް) އިން އިއްވާފައިވާ ހަތަރު އަހަރުގެ ސަސްޕެންޝަން ފާއިތުވި އޮކްޓޯބަރު މަހު ވަނީ 18 މަސްދުވަހަށް ކުޑަކޮށްދީފައެވެ. މާނައަކީ 2025 ގެ މާޗު މަހުގެ ފަހުން ޕޮގްބާއަށް އެނބުރި ކުޅުމުގެ ތެރެއަށް އާދެވޭނެއެވެ. ނަމަވެސް ޔުވެންޓަސްގެ މި ނިންމުމާއެކު ޕޮގްބާ ދެން ފެނިގެންދާނީ ކޮން ކްލަބަކުން ކަމެއް އަދި ނޭނގެއެވެ.
ސީއެސްއޭގެ ޖަޖުން ޕޮގްބާގެ ސަސްޕެންޝަން ކުޑަކުރަން ނިންމީ ޑޯޕިން އަށް ފައްސި ވުމުގައި ޕޮގްބާގެ ގަސްތެއް ނެތްކަން އެނގުމާއިއެކުއެކުއެވެ. ފްލޮރިޑާގެ މެޑިކަލް ޑޮކްޓަރެއް ދިން ސަޕްލިމެންޓެއް އޭނާއަށް ބޭނުންކުރެވިފައިވަނީ އޮޅިގެންކަމަށް ގަބޫލު ކުރެވޭ ކަމުގައި ނިންމުން މުރާޖަޢާ ކުރިއިރު ޖަޖުން ބުނެފައި ވެއެވެ.
"އަހަރެން ޔުވެންޓަސް އާއެކު އޮތް ވަގުތު މި ނިމުނީ. އަހަރެން އަބަދުވެސް ކްލަބާއެކު ހުރި ހަނދާންތަކަށް ލޯބިކުރާނަން. އެންމެ ދަތި އުނދަގޫ ވަގުތު ތަކުގައިވެސް ކްލަބުން އަހަންނަށް ކުރި ތާއީދަށް އަހަރެން ޝުކުރު އަދާކުރަން. ކުޅުންތެރިންނާއި ކްލަބާއެކު ކުރެވުނު ތަޖުރިބާ ތަކަކީ އުފާވެރި ވަގުތުތަކެއް" ކެރިއަރުގައި ކުރިއަށްދާން އާބާބަކަށް އެހެން ކްލަބަކާއެކު އަލުން ދަނޑަށް ނިކުންނަށް ކެތްމަދުވެފައި ހުރި ކަމަށް ޕޮގްބާ ބުނެފައިވެއެވެ.
31 އަހަރުގެ ޕޮގްބާ ސެޕްޓެމްބަރު 2023ގައި ޑީއެޗްއީއޭ އަށް ފައްސި ވީ ފަހުން އެއްވެސް މެޗެއް މިހާތަނަށް ކުޅެފައެއް ނުވެއެވެ. އެނބުރި އައިސް އެންމެ މަތީ ފެންވަރުގައި އަދިވެސް އޭނާއަށް ފުޓްބޯޅަ ކުޅެވިދާނެކަން ސާބުތުކޮށްދޭން ބޭނުންވާކަމަށް އީއެސްޕީއެންއަށް ޕޮގްބާ ބުނެފައިވެއެވެ. 2016 ވަނަ އަހަރު ޔުވެންޓަސް އިން މެންޗެސްޓަރ ޔުނައިޓަޑް ޕޮގްބާ 113 މިލިއަން ޑޮލަށް ބަދަލުވީ އިރު, އެއީ އޭރުގެ އެންމެ ބޮޑު ފީއެވެ. 2022 ވަނަ އަހަރު އޭނާ އަލުން ވަނީ ފްރީ ކުޅުންތެރިއެއްގެ ގޮތުގައި ޔުވެންޓަސް އަށް ބަދަލުވެފައެވެ. ފްރާންސްގެ ގައުމީ ޓީމަށް ޕޮގްބާ ކުޅެންފެށީ 2018 ވަނަ އަހަރު އެވެ.
ރިއެކްޝަންސް
