"ސަރުކާރު ހޮސްޕިޓަލްތަކުގައި މުޅިންވެސް އޮތީ އިހުމާލް"- ރައްޒާގު
ސަރުކާރު ހޮސްޕިޓަލްތަކުގައި މުޅިންވެސް އޮތީ އިހުމާލު ކަމަށް މާލެ ސިޓީ ގްރޫޕް އޮފް ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ވިދާޅުވެއްޖެއެވެ. އޭނާ މިފަދައިން ވިދާޅުވީ ދަރުމަވަންތަ ހޮސްޕިޓަލް ރަސްމީކޮށް ހުޅުވުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.
އޭނާ ވިދާޅުވީ ހޮސްޕިޓަލްތަކާ ހަވާލުވެ މަސައްކަތްފެށިއިރު ފާހަގަވި އެންމެ މުހިއްމު ކަމަކީ އިހުމާލު ކަމަށެވެ. އެގޮތުން ހޮސްޕިޓަލްތަކުގައި ހުރި މުހިއްމު ވަޞީލަތްތައް އޭގެ އެންމެ ފުރިހަމަ ގޮތުގައި ބޭނުން ކުރެވެމުން ނުދާކަން ފާހަގަ ކުރެވުނު ކަމަށް ވިދާޅުވިއެވެ. ބޭނުންނުކޮށް ހުރި ވަޞީލަތްތައް އޭނާ އަށް ސިފަކުރެވުނީ ދިވެހި ރައްޔިތުން ބޭނުންވެފައިވާ ޒަމާނީ ފެންވަރުގެ ސިއްހީ ފަރުވާ ފޯރުކޮށްދިނުމަށް ބޭނުންކުރެވިދާނެ އަގުބޮޑު ޖަވާހިރުތަކެއްގެ ގޮތުގައި ކަމަށް ވިދާޅުވި, އަބްދުއްރައްޒާގު ވިދާޅުވީ އެހާލަތަށް މިހާރު އެތަން ގެނެސްފައިވާ ކަމަށެވެ.
ރައީސުލްޖުމްހޫރިއްޔާ ބައިވެރިވެވަޑައިގެންނެވި ރަސްމިއްޔާތުގައި އަބްދުއްރައްޒާގު ވިދާޅުވީ ސަރުކާރު ހޮސްޕިޓަލް އޮތީ ތަސައްވަރު ކޮށްލަންވެސް އުނދަގޫ ފަދަ ހާލަތެއްގައި ކަމަށެވެ.
" ތަނުގެ ފިނިހޫނުމިން ބަލަހައްޓާ ނިޒާމްތައް ހުރީ މަރާމާތު ނުކޮށް ގިނަ ދުވަސް ވުމުގެ ސަބަބުން ބޭނުން ނުކުރެވޭ ހާލަތުގައި. ހޮސްޕިޓަލްގެ ޚިދުމަތްތައް ދެމުން ގެންދިޔައީ އެކި ދަންފަޅިތަކުގައި އެކި ސަރަހައްދުތަކަށް އެކި ފަންގިފިލާތަކަށް އެކިވަގުތުތަކުގައި, ފިނިހޫނުމިން ބަހައިގެން." އޭނާ ވިދާޅުވިއެވެ.
ނަތީޖާއެއްގެ ގޮތުން އިމާރާތުގައި ހުރި އަގުބޮޑު އެތައް ވަސީލަތްތަކެއް ބޭނުން ނުކުރެވޭ ހާލަތަށް ގޮސްފައި ހުރިކަމަށް އޭނާ ވިދާޅުވިއެވެ. ފަންސަވީސް ބުރީގެ ބިޔަ އިމާރާތުގެ ގިނަ ފަންގިފިލާތައް ބޭނުންނުކޮށް ހުރިކަންވެސް އޭނާ ފާހަގަކުރެއްވިއެވެ. އޭގެ ބަދަލުގައި އެތަން ހުރީ ހޮހޮޅައެއްގެ ގޮތުގައި ގުދަން ކުރަން ދޫކޮށްލާފައި ކަމަށް ސީއީއޯ ވިދާޅުވިއެވެ.
" ދަރުމަވަންތަ ހޮސްޕިޓަލްގައި ހުރި ހައިބްރިޑް ކެތްލެބްގައި ހުރި މެޝިނަރީތައް ހުރީ ޝެޑިއުލްކޮށް, ކުރަންޖެހޭ މެއިންޓެނެންސްތައްވެސް ނުކޮށް އިހުމާލުވުމުގެ ސަބަބުން ބޭނުން ނުކުރެވޭ ހާލަތުގައި.
އެކަމަކު ރައީސްގެ އިރުޝާދާ ލަފާފުޅުގެ މަތީން ހާލަތު ބަދަލުކޮށްފިން. މިރޭ މިފެންނަނީ މުޅިން އެހެން ހާލަތެއް. ތަފާތު މަންޒަރެއް. އާ ރާސްތާއެއް." އޭނާ ވިދާޅުވިއެވެ.
މިހާރުގެ ހާލަތަށް އިޝާރާތްކުރައްވާ އޭނާ ވިދާޅުވީ ހޮސްޕިޓަލްގައި ހުރި ފިނިހޫނުމިން ހިފަހައްޓާ ނިޒާމްގެ މަސައްކަތްތައް ތާވަލްކުރެވި, ކޮމްޕްރެސަރތައް ބަދަލުކުރެވި, އިމާރާތުގެ ފިނިކުރާ ނިޒާމްގެ މައްސަލަތައް ވެސް ވަނީ ހައްލުކޮށްފައި ކަމަށެވެ. އަދި ދަރުމަވަންތަ ހޮސްޕިޓަލްގައި ޚިދުމަތް ދިނުމަށް ބޭނުންވާ ޕްރޮސީޖަރތައް މިހާރު ހަދާފައިވާ ކަމަށް ވިދާޅުވިއެވެ.
ދަރުމަވަންތަ ހޮސްޕިޓަލަކީ ރައީސް ޔާމީންގެ ދައުރުގައި އިމާރާތްކުރި ހޮސްޕިޓަލެކެވެ. އެއިމާރާތް ބޭނުން ކުރަން ފެށީ މިދިޔަ ސަރުކާރުން 2019 ވަނަ އަހަރު އެވެ. އެތަން ރަސްމީކޮށް ހުޅުވީ ބޭނުންކުރަން ފެށިތާ ފަސް އަހަރު ފަހުންނެވެ. އެކަމަކު ރަސްމީކޮށް ހުޅުވީ އިތުރު ޚިދުމަތްތަކާ އެކު ޓާޝަރީ ފެންވަރަށް ތަރައްޤީކޮށްގެންނެވެ.
ރިއެކްޝަންސް
