ޔުއެފާ ނޭޝަންސް ލީގު: ޕޯޗުގަލް ކުއާޓާ ފައިނަލަށް, ސްޕެއިން އަށް ގްރޫޕްގެ އެއްވަނަ
ޔުއެފާ ނޭޝްންސް ލީގުގައި ހޮނިހިރު ދުވަހު ކުޅުނު މެޗުން މޮޅުވެ ޕޯޗްގަލް ކުއާޓާ ފައިނަލަށް ދަތުރުކޮށްފިއެވެ. ސްޕެއިން ވެސް ލީގު އޭ, ގްރޫޕް ހަތަރެއްގެ އެއްވަނަ ވަނީ ކަށަވަރުކޮށްފައެވެ. ލީގު އޭގެ ގްރޫޕް އެކެއްގައި ޕޯޗްގަލްއިން ޕޮލަންޑް ބަލިކުރީ 5-1 ނެވެ. މެޗުގައި ކެރިއަރުގެ 910 ވަނަ ގޯލް ހަމަކުރި ކެޕްޓަން ކްރިސްޓިއާނޯ ރޮނާލްޑޯ ވަނީ 2 ގޯލް ކާމިޔާބުކޮށްފައެވެ.
ޕޯޗްގަލް 5-1 ޕޮލަންޑް
މެޗުގެ ފުރަތަމަހާފުގައި ޕޮލަންޑުން ރަނގަޅު ކުޅުމެއް ދެއްކިއެވެ. ފުރަތަމަ ހާފު ނިމުންއިރު އެއްވެސް ޓީމަކަށް ގޯލެއް ކާމިޔާބު ނުކުރެވުނު ނަމަވެސް 59 ވަނަ މިނިޓްގައި ޕޯޗްގަލްގެ ރަފެއިލް ލެއާއޯ ޕޮލެންޑްގެ ގޯލް ފޫއަޅުވާލި ހިސާބުން ޕޮލަންޑް ހާސްކަމުގެ ތެރެއަށް ވެއްޓުނެވެ. ޕޯޗްގަލްއިން ލީޑު ނެގީ ނުނޭ މެންޑޭސް ތަނަވަސްކޮށްދިން ފުރުޞަތެއްގައެވެ. 72 ވަނަ މިނިޓްގައި ޕޯޗްގަލްގެ ދެވަނަ ގޯލް ޕެނަލްޓީ އަކުން ކާމިޔާބުކޮށްދިނީ ކްރިސްޓިއާނޯ ރޮނާލްޑޯއެވެ. އޭގެ އަށް މިނިޓް ފަހުން ވިޓީނިއާ ތަނަވަސްކޮށްދިން ފުރުޞަތެއްގައި ތިންވަނަ ގޯލް ކާމިޔާބުކުރީ ބުރޫނޯ ފެނާންޑޭޒް އެވެ. 83 ވަނަ މިނިޓްގައި ޕެޑްރޯ ނޭޓޯ ޖަހައިދިން ގޯލް ކާމިޔާބު ކުރުމުގައި އެހީތެރިވީ ރޮނާލްޑޯ އެވެ. ކްރިސްޓިއާނޯ ރޮނާލްޑޯ ވަނީ ޕޮލެންޑާ ދެކޮޅަށް ރީތި ބައިސިކަލް ކިކަކުން ގޯލެއް ކާމިޔާބުކޮށްފައެވެ. ފަސް ވަނަ ގޯލް ކާމިޔާބު ކުރުމަށް ރޮނާލްޑޯ އަށް 87 ވަނަ މިނިޓްގައި އެހީތެރވީ ވިޓީނިއާ އެވެ.
ޕޮލަންޑްގެ ހަމައެކަނި ގޯލް މެޗުގެ 88 ވަނަ މިނިޓްގައި ކާމިޔާބުކުރީ ބަދަލު ކުޅުންތެރިއެއްގެ ގޮތުގައި ކުޅެން ނިކުއިން ޑޮމިނިކް މާކްޒުކް އެވެ.
ޑެންމާކް 1-2 ސްޕެއިން
2-1 ން ޑެންމާކް ބަލިކޮށް ޔޫރަޕްގެ ޗެމްޕިއަން ސްޕެއިން ވަނީ ލީގު އޭ- ގްރޫޕް 4 ގެ އެއްވަނަ މަޤާމް ހޯދާފައެވެ. މެޗުގެ 15 ވަނަ މިނިޓްގައި ސްޕެއިންއަށް އަށް ލީޑު ނަގައިދިނީ މިކޭލް އޮޔަތަބެލް އެވެ. އޭގެ ކުރިން އަޔޯޒެ ޕެރޭޒް ގޯލަށް އަމާޒުކޯށް ފޮނުވާލި ބޯޅަ ޖެހުނީ ގޯލްގެ ހުރަސް ދަނޑީގައެވެ. ސްޕެއިން މެޗުން މޮޅުވި ގޯލް ކާމިޔާބުކޮށްދިނީ ޑެނީ އޮލްމޯ ތަނަވަސްކޮށްދިން ފުރުޞަތުގައި އަޔޯޒެ ޕެރޭޒް އެވެ އެއީ މެޗުގެ 58 ވަނަ މިނިޓްގައެވެ.
ހޮނިހިރު ދުވަހު ކުޅުނު އިތުރު މެޗުތަކަށް ބަލާއިރު ކްރޮއޭޝިއާ އަތުން ސްކޮޓްލެންޑް މޮޅުވީ 1-0 ން ނެވެ. ސާބިއާ އާއި ސްވިޒަލޭންޑް ބައްދަލުކުރިމެޗު މެޗު ވަނީ 1-1 ން އެއްވަރުވެފައެވެ.
ޕޯޗްގަލް ކުއާޓާ ފައިނަލްގެ ޖާގަ ކަށަވަރުކުރީ ފަސް މެޗުން 13 ޕޮއިންޓް ހޯދައިގެންނެވެ. އެ ގްރޫޕްގައި ފަސް މެޗުން ހަތް ޕޮއިންޓާއެކު ދެވަނައިގައި އޮތީ ރޭގެ މެޗުގައި ސްކޮޓްލޭންޑް ބަލިކުރި ކްރޮއޭޝިއާ އެވެ.. ސްޕެއިންއަށް ފަސް މެޗުން ލިބިފައިވަނީ 13 ޕޮއިންޓެވެ. ޕޯޗްގަލްގެ އިތުރުން ކުއާޓާގެ ޖާގަ ކަށަވަރުކޮށްފައިވަނީ ސްޕެއިން, ޖަރުމަނުވިލާތް, އިޓަލީ އަދި ފްރާންސެވެ.
ރިއެކްޝަންސް
