ވިލިމާލޭގައި އައުޓްރީޗް ގުރުއާން ކްލާހަކާއި, މޫދަށް އެރެން ދާ ފަރާތްކަށް ޚާއްޞަ ނަމާދު ގެއެއް ހުޅުވައިފި
ކީރިތި ޤުރުއާނާއި ބެހޭ ޤައުމީ މަރުކަޒުގެ ވިލިމާލެ އައުޓްރީޗް ސެންޓަރު ހުޅުވައިފިއެވެ.
ވިލިމާލެ މަސްޖިދުލް ބިއްރީގައި ދެ ކުލާސްރޫމާއެކު ޤާއިމްކުރި ސެންޓަރު ބުރާސްފަތި ދުވަހު ހުޅުވައިދެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު އާއި މާލެ ސިޓީގެ މޭޔަރު އާދަމް އާޒިމް އެވެ. މި ސެންޓަރަކީ އިސްލާމީ ކަންތައްތަކާ ބެހޭ ވުޒާރާއާއި މާލެ ސިޓީ ކައުންސިލް ގުޅިގެން ޤާއިމްކުރި ސެންޓަރެކެވެ. މި ސެންޓަރު ޤާއިމްކުރުމުގެ ޢަމަލީ މަސައްކަތްތައް ކުރީ މާލެ ސިޓީ ކައުންސިލްގެ ފަރާތުންނެވެ.
އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވީ، ވިލިމާލޭގައި ކީރިތި ޤުރުއާނާއި ބެހޭ ޤައުމީ މަރުކަޒުގެ އައުޓްރީޗު ސެންޓަރެއް ހުޅުވިގެންދިޔަކަމީ ވިލިމާލޭގެ ރައްޔިތުންނަށް ލިބިގެންދިޔަ ފަސޭހައެއްކަމަށާއި، މިއީ ރައީސް ޑރ. މުޙައްމަދު މުޢިއްޒުގެ ތަސައްވަރުގައި ހިމެނޭ ކީރިތި ޤުރުއާނުގެ ޢިލްމު ފެތުރުމަށް ލިބިގެންދިޔަ އިތުރު ކުރިއެރުމެއް ކަމަށެވެ. މީގެ އިތުރުން ދީނީ ޤައުމީ ކަންކަންކުރުމުގައި ވަކި ފިކުރެއް ބެއްލެވުމެއް ނެތި މަސައްކަތް ކުރެއްވުމަށް ރައީސް އިސްކަން ދެއްވާކަން ފާހަގަކުރައްވާ ވަޒީރު ވިދާޅުވީ މި ސެންޓަރަކީ މިފަދަ މަސައްކަތެއްގެ ނަމޫނާއެއްކަމަށެވެ.
މި ރަސްމިއްޔާތުގައި މާލެ ސިޓީ ކައުންސިލްގެ މޭޔަރ އާދަމް އާޒިމް ވިދާޅުވީ މިމަސައްކަތަކީ ހަޔާތުގައި ކުރެވުނު އެންމެ ބޮޑު އެއް މަސައްކަތް ކަމަށެވެ. ރާއްޖޭގެ ހުރިހަ ރަށެއްގައި ބޭސް ފިހާރަ އެޅުމާއި, 60 އަށްވުރެ ގިނަ ރަށުގެ ބަނދަރު ހެދުމާއި, އެތައް ކިލޯ މީޓަރެއްގެ މަގު ހެދުން ފަދަ ބޮޑަތި މަސައްކަތްތަކެއް ކުރެވިފައި ވީނަމަވެސް މިއަދު މިހުޅުވުނު ޤުރުއާން އުގަންނައިދިނުމުގެ ސެންޓަރަކީ އެންމެ ބޮޑު މަސައްކަތް ކަމަށް ވިދާޅުވިއެވެ.
" މިއަށްވުރެ މާތް މަސައްކަތެއް އަޅުގަނދުގެ ހަޔާތުގައި އަޅުގަނޑަކަށް ނުކުރެވޭ. މިކަމުގައި މެދުވެރިއަކަށް ވެގެންދިޔައީ މިނިސްޓަރ ޑރ.މުޙައްމަދު ޝަހީމް އަލީ ސައީދު ކަމަށް ވާތީ, އެކަނިކުފާނުގެ ހެޔޮކަން އަޅުގަނޑަށް ދެއްވީތީ މިނިސްޓަރަށް ޝުކުރު ދަންނަވަން. މިއީ އަޅުގަނޑުގެ ހަޔާތުގައި އަޅުގަނޑަށް ކުރެވުނު އެންމެ ބޮޑު މަސައްކަތް ހަމަގައިމުވެސް. ޤުރުއާނުގެ އިލްމް އުގެނުމަށް ކުރެވޭ މަސައްކަތަކީ އިންސާނުންނަށް ކުރެވޭނެ އެންމެ ބޮޑު މަސައްކަތް. މިފަދަ ކޮންމެ ކަމެއްގައި, ގައުމީ ކޮންމެ ކަމެއްގައި އިރާދަކުރެއްވިއްޔާ އަޅުގަނޑުގެވ ފަރާތުން ރައްޔިތަކަށް ހެވެއް, ލާބައެއް, މަންފާއެއް ކުރާކަމެއްގަ ވެއްޖިއްޔާ އެންމެ ކުރީގަ ހުންނާނެ ކަމުގެ ޔަގީންކަން އަރުވަން" މޭޔަރު ވިދާޅުވިއެވެ.
މީގެއިތުރުން ކައުންސިލްގެ ފަރާތުން ވަނީ ވިލިމާލެ ބީޗަށް މޫދަށް ދާ ފަރާތްތަކަށް ފަސޭހަކަމާއެކު ނަމާދުކުރެވޭނެ އިންތިޒާމް ހަމަޖެއްސުމަށް ނަމާދު ގެއެއްވެސް ތައްޔާރުކޮށް ހުޅުވާފައެވެ. ވިލިމާލެ ބީޗްގައި ތައްޔާރުކުރި ނަމާދު ގޭގައި އަންހެނުންނާއި ފިރިހެނުންނަށް ވަކިން ނަމާދުކުރެވޭ ގޮތް ވަނީ ހަމަޖައްސާފައެވެ. މިސްކިތް ހުޅުއްވައިދެއްވީ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު އެވެ.
ރިއެކްޝަންސް
