ޔުއެފާ ނޭޝަންސް ލީގު: އިޓަލީ އާއި ފްރާންސް ކުއާޓާ ފައިނަލަށް
ލީގު އޭ- ގްރޫޕް ދޭއްގައި އިޓަލީން ބެލްޖިއަމް ބަލިކުރިއިރު ފްރާންސް އިޒްރާއިލްއާއި އެއްވަރުވެ ގްރޫޕްގެ އެންމެ ގިނަ ޕޮއިންޓް ހޯދި ދެ ޓީމުގެ ގޮތުގައި އިޓަލީ އަދި ފްރާންސް ގަދަ 16 އަށް ދަތުރުކޮށްފިއެވެ. ބުރާސްފަތި ދުވަހު ކުޅުނު މެޗުގައި ގްރޫޕް ބީގެ ދޭއްގައި ގްރީސް ބަލިކޮށް އިނގިރޭސިންވެސް ވަނީ އެ ގްރޫޕްގެ އެންމެ މަތިން ޖާގަ ހޯދާފައެވެ.
ބެލްޖިއަމް 0 – 1 އިޓަލީ
އިޓަލީން ބެލްޖިއަމް ބަލިކުރީ 1-0 ން ނެވެ. 11 ވަނަ މިނިޓްގައި މެޗުގެ ހަމައެކަނި ގޯލް އިޓަލީއަށް ކާމިޔާބުކޮށްދިނީ މެދުތެރެއަށް ކުޅޭ ސަންޑްރޯ ޓޮނާލީއެވެ. ޖިއޮވަންނީ ޑި ލޮރެންޒޯ ތަނަވަސްކޮށްދިން ފުރުޞަތުގައި ޓޮނާލީ ބެލްޖިއަމް އަށް ލީޑުނަގައިދިނީ ގޯލާ ވަރަށް ކައިރިން ފޮނުވާލި ބޯޅައެއްގައެވެ. ފުރަތަމަ ހާފުގައި ބޯޅަ ހިފަހައްޓައިގެން މޮޅަށް ކުޅުނީ އިޓަލީން ނަމަވެސް އިޓަލީ އަށް އިތުރު ގޯލެއް ކާމިޔާބެއް ނުކުރެވުނެވެ. މެޗުގައި ކީޕަރު ޑޮނަރުއްމާ ވަނީ ރަނގަޅު ސޭވްތަކެއް ކޮށްފައެވެ.
ފްރާންސް 0 – 0 އިޒްރާއިލް
އިޒްރާއިލްއާ ކުޅުނު މެޗުގައި ގޯލެއް ކާމިޔާބު ނުކުރެވުމުގެ ނުތަނަވަސްކަމާއެކުވެސް ފްރާންސުން ގްރޫޕްގެ އެންމެ މޮޅު ދެވަނަ ޓީމުގެ ގޮތުގައި ހިމެނި ކުއާޓާ ފައިނަލަށް ވަނީ ދަތުރުކޮށްފައެވެ. ބުރާސްފަތި ދުވަހުގެ ރޭގެ މެޗުގައި ފްރާންސްގެ ކެޕްޓަން ބޭންޑް އަޅައިގެން ކުޅުނު އެންގޯލޯ ކާންޓޭ އަދި ފޯވާޑް, ރަންޑަލް ކޮލޮމުއާނީ އަށް ގޯލް ޖަހާނެ ރަނގަޅު ދެތިން ފުރުޞަތެއް ލިބުންނަމަވެސް އިޒްރާއިލްގެ ކީޕަރު ޑެނިއެލް ޕްރެޓްޒް ވަނީ ފްރާންސްގެ ހަމަލާތައް ދިފާއުކޮށްފައެވެ.
އިނގިރޭސި ވިލާތް 3 – 0 ގްރީސް
ގްރީސްގެ މައްޗަށް ހޯދި ބޮޑު މޮޅާއެކު ގްރޫޕް ބީގެ ދޭއްގެ ކޮންޓްރޯލް ނަގާފައިވަނީ އިނގިރޭސިންނެވެ. ޕޮއިންޓްގެ ގޮތުން އިނގިރޭސިންނާއި ގްރީސް އެއްވަރުވި ނަމަވެސް ގޯލްގެ ތަފާތުން އިނގިރޭސިން ވަނީ ކުރި ހޯދާފައެވެ. ބުރާސްފަތި ދުވަހުގެ މެޗުގައި އިނގިރޭސިންނަށް ލީޑު ނަގައިދިނީ އޮލީ ވަޓްކިންސް އެވެ. މެޗުގެ 7 ވަނަ މިނިޓްގައި އިނގިރޭސިންގެ ފުރަތަމަ ގޯލް ކާމިޔާބު ކުރި ނަމަވެސް ފުރަތަމަ ހާފު ނިމުނީ އިތުރު ގޯލެއް ކާމިޔާބު ނުކުރެވިއެވެ. އިނގިރޭސިން ގެ ދެވަނަ ގޯލަކީ 78 ވަނަ މިނިޓްގައި ބައިކޮޅަށް ވައިން ގޯލެކެވެ. މޯގަން ޖިބްސް ވައިޓް ތަނަވަސްކޮށްދިން ފުރުޞަތުގައި އިނގިރޭސިންގެ ތިންވަނަ ގޯލް ކާމިޔާބުކުރީ ކާޓިސް ޖޯންސް އެވެ.
ބުރާސްފަތި ދުވަހު ކުޅުނު އިތުރު މެޗުތަކަށް ބަލާއިރު އަޔަލެންޑުން 1-0 ން ވަނީ ފިންލެންޑް ބަލިކޮށްފައެވެ. ލީގު ބީގެ ގްރޫޕް ތިނެއްގައި ނޯވޭއިން ސޮލޮވީނިއާގެ މައްޗަށް ކުރިހޯދީ 4-1 ން ނެވެ. އަދި ލީގު ސީ ގެ ހަތަރެއްގައި ނޯތު މެސެޑޯނިއާއިން 1-0 ން ވަނީ ލެޓްވިއާ ބަލިކޮށްފައެވެ. ލީގުގައި ހުކުދު ދުވަހުވެސް ފޯރިގަދަ މެޗުތަކެއް ހުރިއިރު ޕޯޗްގަލްއިން ޕޮލަންޑާ ދެކޮޅަށް ނިކުންނާނެއެވެ. ސްޕެއިން އާއި ޑެންމާކް ބައްދަލު ކުރާއިރު ކްރޮއޭޝިއާ ނިކުންނާނީ ސްކޮޓްލެންޑާ ދެކޮޅަށެވެ.
ރިއެކްޝަންސް
