ކަނޑުމަތީގެ ބޮޑަތި އޮޕަރޭޝަންތަކަށް އެމްއެންޑިއެފްގައި ވަކި ޔުނިޓެއް އުފައްދައިފި
ކަނޑުމަތީގެ ބޮޑަތި އޮޕަރޭޝަންތަކަށް އެމްއެންޑިއެފްގައި ވަކި ޔުނިޓެއް އުފައްދައިފިއެވެ. ނަޞްރުގެ ދުވަހު އެމްއެންޑީއެފްގެ ކޯސްޓްގާޑްގައި އުފެއްދީ ދިވެހިރާއްޖޭގެ ކަނޑުގެ ސަލާމަތީ ފައުޖެކެވެ. އެއީ އެމްއެންޑީއެފް ކޯސްޓްގާޑްގެ އެލީޓް ޔުނިޓް، ސްޕެޝަލް ބޯޓް ސްކޮޑްރަން (އެސްބީއެސް) އެވެ.
ސްޕެޝަލް ބޯޓް ސްކޮޑްރަން (އެސްބީއެސް) އިފުތިތާހުކޮށްދެއްވީ، ރައީސުލްޖުމްހޫރިއްޔާ، އަދި ސިފައިންގެ އެންމެމަތީ ވެރިޔާ، ޑރ.މުޙައްމަދު މުޢިއްޒެވެ. އަލަށް އިފުތިތާހުކުރި އެސްބީއެސްއަކީ އެމްއެންޑީއެފް ކޯސްޓްގާޑްގެ ތެރޭގައި ޚާއްޞަ ތަމްރީނު ލިބިފައިވާ އެލީޓް މެރިޓައިމް ޔުނިޓެއް ކަމަށް އެމްއެންޑީއެފް އިން ބުންޏެވެ. މިއީ މެރިޓައިމް ޑޮމެއިންގައި ރެޕިޑް ރެސްޕޮންސްއާއި ހައި ސްޓޭކްސް އޮޕަރޭޝަންތަކަށް ޚާއްޞަ ޔުނިޓެކެވެ. މިގޮތުން، މި ޔުނިޓަކީ، އަންޑަވޯޓަރ ޑެމޮލިޝަންއާއި، ޓެރަރިޒަމްގެ ޢުދުވާންތަކާއި، ކަނޑުފޭރުމާއި، އާމްޑް ރޮބެރީގެ އިތުރުން މަސްތުވާތަކެތީގެ ވަގުފާރިއާއި، ގަވާއިދާ ހިލާފަށް މަސްވެރިކަން ކުރުން ފަދަ ޢަމަލުތަކާ ދެކޮޅަށް ހިންގާ އޮޕަރޭޝަން ތަކުގައި ހަރަކާތްތެރިވުމަށް ތަމްރީނުދެވިފައިވާ، އަދި އެފަދަ ހާލަތްތަކަށް އަބަދުވެސް ތައްޔާރީ ހާލަތުގައި ތިބޭނެ ފައުޖެކެވެ.
ސްޕެޝަލް ބޯޓް ސްކޮޑްރަންއަކީ، އިންޑިއާ ކަނޑުގެ ސަލާމަތާއި ރައްކާތެރިކަމަށް އެހީތެރިވުމާއި، ރާއްޖޭގެ ދިފާއީ ސިޔާދަތު ކަށަވަރުކުރުމަށް ރައީސުލްޖުމްހޫރިއްޔާ، އަދި ސިފައިންގެ އެންމެ މަތީ ވެރިޔާ ޑރ. މުޙައްމަދު މުޢިއްޒުގެ ސަރުކާރުން ކުރައްވާ މަސައްކަތްޕުޅަށް އިތުރުވެގެންދާ ބޮޅެއް ކަމަށް އެމްއެންޑީއެފް އިން ބުންޏެވެ.
ރިއެކްޝަންސް
