ޝަހީދުންގެ އާއިލާތަކަށް ޚާއްޞަ ބޯހިޔާވަހިކަން ދެއްވަން ނިންމަވައިފި
ޝަހީދުންގެ އާއިލާތަކަށް ޚާއްޞަ ބޯހިޔާވަހިކަމުގެ މަޝްރޫއެއް ހިންގަވާ, އެއާއިލާތަކަށް ބޯހިޔާވަހިކަން ދެއްވަން ރައީސުލްޖުމްހޫރިއްޔާ ނިންމަވައިފި އެވެ. ރައީސުލްޖުމްހޫރިއްޔާ މިކަން އިއުލާނުކުރެއްވީ މިއަހަރުގެ ނަޞްރުގެ ދުވަހުގެ ރަސްމީ ޖަލްސާގައެވެ.
ރައީސުލްޖުމްހޫރިއްޔާ ވިދާޅުވީ މި ދައުރުގެ ކުރިއަށް އޮތް އަހަރުތަކުގެ ތެރޭގައި، "ޝަހީދުންގެ ހިޔާ"ގެ ނަމުގައި 50 ހައުސިން ޔުނިޓުގެ ހައުސިން އިމާރާތެއް އަޅާނިންމަވާނެ ކަމަށެވެ. އަދި ޝަހީދުންގެ ޢާއިލާތަކާ ހަވާލުކުރައްވާނެ ކަމަށް ވިދާޅުވިއެވެ.
ވޭތުވެދިޔަ ސާޅީހަކަށް އަހަރުގެ ތެރޭގައި 29 ސިފައިންނާއި، 2 ފުލުހުންނާއި ޢާއްމުންގެ 11 މީހުން، ޤައުމީ ޚިދުމަތާ ގުޅުންހުރި އެކި ޙާލަތްތަކުގައި ދިމާވި ޙާދިސާތަކުގައި މި ދުނިޔެ ދޫކޮށްފައި ވާކަން ފާހަގަކުރައްވާ ރައީސުލްޖުމްހޫރިއްޔާ ވިދާޅުވީ އެ ބޭފުޅުންގެ އަގުވަޒަންކުރުމަށް، ދެމެހެއްޓެނިވި ގޮތެއްގައި ދައުލަތުން އެއްވެސް ކަމެއް ކޮށްދެވިފައި ނުވާކަމަށެވެ. އެއީ ބޭއިންސާފެއް ކަމަށް އެމަނިކުފާނު ވިދާޅުވެފައެވެ.
ބޯހިޔޔާ ވަހިކަމުގެ އިތުރުން ޝަހީދުންގެ އާއިލާތަކަށް ޚާއްޞަ އެލަވަންސެއް ދެއްވަންވެސް ރައީސް ވަނީ ނިންމަވާފައެވެ. އެގޮތުން މި އަންނަ އަހަރުން ފެށިގެން، ޝަހީދުންގެ ޢާއިލާތަކަށާއި، 3 ނޮވެމްބަރުގެ މެޑަލް ފޯ އެކްސެޕްޝަނަލް ބްރޭވަރީ ލިބިވަޑައިގަތް 5 ބޭފުޅުންނާއި، މެޑަލް ފޯ ބްރޭވަރީ ލިބިވަޑައިގެންފައިވާ 10 ބޭފުޅުންނަށް ސަރުކާރުން ޚާއްޞަ އެލަވަންސެއް ދެއްވާނެކަން އެމަނިކުފާނު އިޢުލާންކުރެއްވިއެވެ. އަދި މި އެލަވަންސް ދެއްވަމުން ގެންދަވާނީ، ކަނޑައެޅޭ، ގެޒެޓްކުރެވޭ އުޞޫލެއްގެ މަތިން، ދެމެހެއްޓެނިވި ގޮތެއްގައި ކަމުގައި އެމަނިކުފާނު ވިދާޅުވިއެވެ.
ދައުލަތުން ކުރާ މި ފަދަ ކަމަކުން، ޝަހީދުންގެ ޖިހާދުގެ އަގު ނުދެއްކޭނޭ ކަމަށާއި, ޢާއިލާތަކުގެ ހިތާމަތައް ފިލުވައި ނުދެވޭނޭކަމަށް ވިދާޅުވެ، އެމަނިކުފާނު ވަނީ، ދައުލަތުން، ކުޑަމިނުން، މި ވަރު ކޮށްދޭން ވާނޭކަމުގައި ވިދާޅުވެފައެވެ.
ރިއެކްޝަންސް
