އިމްރާންގެ ރައްދު އިހުސާނަށް: އެ ޖަލު ތަޅާލީ ދިވެހިން އެތަނަށް ވައްދައިގެން އަނިޔާ ކުރުމަށް ފުރުސަތު ނުދިނުމަށް

ރަސްމިއްޔާތެއް ބާއްވައިގެން ދިވެހިރާއްޖޭގެ ތާރީޚުގައި ފުރަތަމަ ފަހަރަށް މިދިޔަ ސަރުކާރުން ޖަލެއް ތަޅާލާފައިވާ ކަމަށް ދާޚިލީ ވަޒީރު އަލީ އިހުސާން ދެއްކެވި ވާހަކަފުޅަށް ކުރީގެ ދާޚިލީ ވަޒީރު އިމްރާން އަބްދުﷲ ރައްދު ދެއްވައިފިއެވެ.

ޓީވީ ޕްރޮގްރާމެއްގައި ވަޒީރު އިހުސާނު ދެއްކެވި ވާހަކައަށް ރައްދު ދެއްވައި ކުރީގެ ވަޒީރު އިމްރާން ޢަބްދުﷲ ކުރެއްވި ޕޯސްޓެއްގައި ވިދާޅުވީ "އަޅުގަނޑުމެން އެ ޖަލު ތަޅާލީ މިކަހަލަ އިންސާނިއްޔަތު ކަމެއް ނެތްބަޔަކަށް ބާރު ލިބުނަސް ދިވެހިން އެތަނަށް ވައްދައިގެން އަނިޔާ ކުރުމަށް ފުރުސަތު ނުދިނުމަށް." ކަމަށެވެ.

އިމްރާން އިތުރަށް ވިދާޅުވީ ސަރުކާރަށް އަހަރެއް ވީއިރު ކަމަކަށްވާހަކަލަ ކަމެއް ނުކޮށް ހުސްއަނަގަ ތެޅުމަކީ ރައްޔިތުން ބަލައިގަންނާނެ ކަމެއް ނޫން ކަމަށެވެ.

މީހުން ބަންދުކޮށްފައި ތިބޭ ތަންތަންތަނާ ގުޅޭ ގޮތުން ޚާއްސަ އޮޑިޓެއް ހަދާފައެވެ. އަދި އެ އޮޑިޓް ރިޕޯޓުގައި ފާހަގަ ކޮށްފައިވާ ކަންކަން އިސްލާހު ކުރުމަށް ކުރެވުނު މަސައްކަތާއި ހިއުމަންރައިޓްސް ކޮމިޝަންފަދަ މުވައްސަސާތަކުން ދީފައިވާ ލަފަޔާއެކު މީހުން ބަންދުކުރުމަށް އެކަށީގެން ނުވާތަންތަނުގައި މީހުން ބަންދުކުރުން ހުއްޓާލައި އެފަދަ ތަންތަން ނައްތާލާފައި ކަމަށް ކުރީގެ ސަރުކާރުގެ އޮފިޝަލަވު ވިދާޅުވިއެވެ.

އެގޮތުން ދޫނިދޫގައި މީހުން ބަންދުކުރުމަށް ކުރިން ބޭނުން ކުރަމުން ދިޔަ ގޮޅިތަކުގެ ތެރެއިން ބައެއް ގޮޅި ތަކަކީ އިންސާނުން ބަންދުކުރަން އެކަށީގެން ނުވާ ތަންތަނަށްވާތީ އޭރުގެ ސަރުކާރުން ވަނީ އެތަންތަން ތަޅާލާފައެވެ.

އެނގިފައިވާ ގޮތުގައި ރާއްޖޭގައި ކުށްވެރިން ބަންދުކުރުމަށްޓަކައި ޚާއްސަކޮށްގެން ފަރުމާކޮށްފައިވާ ޖަލެއް މިހާތަނަށް އަޅާފައެއް ނުވެއެވެ.

މީހުން ބަންދު ކުރުމަށް ރާއްޖޭގައި ބޭނުން ކުރަމުން އަންނަނީ ކޮންމެވެސް އެހެން ބޭނުމެއްގައި އިމާރާތް ކޮށްފައިވާ އިމާރާތްތަކެއް ޖަލަކަށް ބަދަލު ކޮށްލައިގެންނެވެ.

މައުލޫމާތު ލިބިފައިވާ ގޮތުގައި ކުރީގެ ސަރުކާރުން ވަނީ މާލޭ ސަރަހައްދުގައި ބައިނަލްއަގުވާމީ ފެންވަރުގެ ހައި ސެކިއުރިޓީ ޖަލެއް ރިހެބިލިޓޭޝަންގެ ހުރިހާ ވަސީލަތްތަކާއެކު އެޅުމުގެ މަސައްކަތް ކޮށްފައެވެ. އެގޮތުން ހުޅުމާލޭގައި ޖަލެއް އެޅުމުގެ ކޮންސެޕްޓް ހަދައި ޑީޓެއިލް ޑިޒައިންގެ މަސައްކަތްވެސް ކޮށް ނިންމާފައިވާކަން ސަރުކާރުން އޭރުވަނީ ހާމަކުރައްވާފައެވެ.

މީގެ އިތުރުން ހދ. ނޭކުރެންދޫގައިވެސް ބައިނަލްއަގުވާމީ ފެންވަރުގެ ޖަލެއް އެޅުމުގެ މަސައްކަތް ކުރީގެ ސަރުކާރުން ވަނީ ކުރިއަށް ގެންގޮސްފައެވެ.

މައުލޫމާތު ލިބިފައިވާ ގޮތުގައި ހުޅުމާލޭގައި ކުރީގެ ސަރުކާރުން އަޅަން މަސައްކަތް ކުރި ޖަލާއި ހދ ނޭކުރެންދޫގައި އެޅުމުގެ މަސައްކަތް ކުރި ޖަލަކީ ރާއްޖޭގެ ތާރީޚުގައި ޖަލެއްގެ ކޮންސެޕްޓްގައި ޑިޒައިން ކުރެވިގެން އެޅުމަށް މަސައްކަތް ކުރި ފުރަތަމަ ޖަލުތަކެވެ.

އެހެން ނަމަވެސް ރައީސުލްޖުމްހޫރިއްޔާ ޑރ. މުޙައްމަދުގެ ސަރުކާރުން ވަނީ ރާއްޖޭގައި ސެންޓްރަލް އެއް ޖަލު ގާއިމް ކުރުމުގެ މަސައްކަތް ފަށާފައެވެ.

ދާޚިލީ ސަލާމަތާ ފަންނިއްޔާތާ ބެހޭ ވަޒީރު އަލީ އިހުސާން ވިދާޅުވި ގޮތުގައި ރާއްޖޭގެ އެކި ތަންތާގައި ޖަލުތައް ބެހެއްޓުމަކީ ޚަރަދުގެ ގޮތުންނާއި ސަލާމަތީ ގޮތުންވެސް ދަތި އުނދަގޫ ކަމެއް ކަމަށާއި އުތުރު ތިލަފަޅުން ސެންޓްރަލް ޖަލު އެޅުމަށް ވާންޖެހޭ ތައްޔާރީތައް ސަރުކާރުން ވަމުން އަންނަ ކަމަށެވެ.