ޕީއެންސީގެ ދާއިރާތަކަށް ކުރިމަތިލި ކެންޑިޑޭޓުންގެ ލިސްޓް މުރާޖާ ކުރަނީ
ޕީޕަލްސް ނެޝަނަލް ކޮންގްރެސް (ޕީއެންސީ)ގެ ދާއިރާތަކަށް ކުރިމަތިލި ކެންޑިޑޭޓުންގެ ލިސްޓް މުރާޖާ ކުރަމުން ދާކަމަށް އެޕާޓީން ބުނެފިއެވެ.
ދާއިރާތަކުގެ މަގާމްތަކަށް ކުރިމަތިލި ކެންޑިޑޭޓުންގެ ލިސްޓް ޕީއެންސީން މުރާޖާ ކުރަން މިފެށީ, ލިސްޓް އިއުލާނުކުރުމަށްފަހު ބައެއް ކެންޑިޑޭޓުންނާއި, މެމްބަރުންގެ ފަރާތުން ކަންބޮޑުވުމާ ޝަކުވާތައް ހުށަހަޅަން ފެށުމުންނެވެ. އެގޮތުން ބައެއް ދާއިރާތަކުގައި ދެ ކެންޑިޑޭޓުން ކުރިމަތިލި ނަމަވެސް އެއް ކެންޑިޑޭޓަކުން ހޮވުނުކަމަށް ކަނޑައެޅުން ފަދަ މައްސަލަތައް ފާހަގަކުރިއެވެ.
ޕީއެންސީން ބުނީ ލިސްޓް އަލުން މުރާޖާ ކުރަނީ އިދާރީ މައްސަލަތަކެއް ހުރިކަން ފާހަގަކުރެވިގެން ކަމަށެވެ. ލިސްޓް މުރާޖާ ކުރުމަށްފަހު ޝަރުތުތަކާއި, އިޖުރާއަތްތައް ފުރިހަމަވާ ކެންޑިޑޭޓުންގެ ފުރިހަމަ ލިސްޓް މިމަހުގެ 16 ވަނަ ދުވަހުގެ ކުރިން އިއުލާނު ކުރާނެ ކަމަށް ޕީއެންސީން ބުންޏެވެ.
ޕީއެންސީގެ އެތެރޭގެ އިންތިޚާބުގައި 2000 އަށްވުރެ ގިނަ މަގާމަށް މީހުން އިންތިޚާބު ކުރެއެވެ. އޭގެ ތެރޭގައި ދާއިރާގެ ރައީސުންނާއި, ނައިބު ރައީސުންނާއި, ޒުވާނުންގެ ލީޑަރާއި, އަންހެނުންގެ ލީޑަރާއި, ދާއިރާގެ ސްޓިއަރިންގ ކޮމިޓީގެ މެމްބަރުން ހިމެނެއެވެ.
ދާއިރާގެ ރައީސުން އިންތިޚާބުކުރަނީ ރައްޔިތުންގެ މަޖިލިހުގައި ޕީއެންސީގެ މެމްބަރުން ނުހިމެނޭ ދާއިރާތަކުންނެވެ. މެމްބަރުން ހިމެނޭ ދާއިރާ ތަކުގައި ރައީސުންނަނީ މަޖިލިސް މެމްބަރެވެ. މަގާމް ތަކަށް ކުރިމަތިލާއިރު ކަނޑައެޅިފައިވާ އަދަދަކަށް މެމްބަރޝިޕް ފޯމްވެސް ހުށަހަޅަން ޖެހެއެވެ.
ޕީއެންސީގެ އެތެރޭގެ އިންތިޚަބު އެކި ފަހަރު މަތީން ވަނީ ފަސްކޮށްފައެވެ. އެޕާޓީން ބުނީ މިއީ މިހާތަނަށް ބާއްވާ ޕާޓީއެއްގެ އެންމެ ބޮޑު އެތެރޭގެ އިންތިޚާބު ކަމަށެވެ.
ރިއެކްޝަންސް
