އަންނަ އަހަރު ރާއްޖެއާ ބައްދަލުކުރާނީ ބުންވަރު ހުރި އިޤްތިޞާދެއް- މިނިސްޓަރ ސައީދު
އަންނަ އަހަރު ރާއްޖެއާ ބައްދަލުކުރާނީ ބުންވަރު ހުރި އިޤްތިޞާދެއް ކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެ އެވެ. ސަރުކާރަށް 52 ހަފްތާ ފުރުން ފާހަގަ ކުރުމަށް ސަރުކާރުން ޓީވީތައް މެދުވެރިކޮށް, ގެނެސްދިން ޕްރޮގްރާމްގައި މިނިސްޓަރ ސައީދު ވިދާޅުވީ މިސަރުކާރުން ހުށަހަޅި ބަޖެޓާއެކު އަންނަ އަހަރު ކާމިޔާބު, ހަރަކާތްތެރި, ބުންވަރު ހުރި އިޤްތިޞާދަކާ ދިމާއަށް މިގައުމު ދާނެ ކަމަށެވެ.
ސަރުކާރުގެ އިސް ތަރުޖަމާނު ހީނާ ވަލީދު ހުށަހެޅުއްވި ޕްރޮގްރާމްގައި ވަޒީރު ސައީދ ވިދާޅުވީ ސަރުކާރަށް ހަވާލުވާން ޖެހުނީ ފުނޑިފައި އޮތް އިޤްތިޞާދަކާ ކަމަށެވެ. އެގޮތުން މިދިޔަ ސަރުކާރުން 8 ބިލިއަން ރުފިޔާ ޗާޕްކޮށް, ބާޒާރަށް ނެރުނު ވާހަކަ ތަކުރާރުކުރައްވާ ވިދާޅުވީ ރުފިޔާގެ އަގެއްވެސް މިހާރު ނެތް ކަމަށެވެ. އެވަރަށް ފައިސާ ޗާޕްކޮށްފައި ވާކަމަށާއި, އެމްޑީޕީން ހީކޮށްގެން ތިބީ މިސަރުކާރު ބަނގުރޫޓް ވާނެ ކަމަށް ކަމަށެވެ.
ތިން މަސް ތެރޭ މިސަރުކާރު ބަނގުރޫޓްވާނެ ކަމަށް އެމްޑީޕީން ހީކޮށްގެން ތިއްބަސް ހުރިހާ ކަމަމުން ސަލާމަތްވެ ރަނގަޅު އިޤްތިޞާދަކާ ދިމާއަށް ގައުމު ދާކަމަށް ސައީދު ވިދާޅުވިއެވެ.
" މިހުރިހާ ކަމަކުން އިރާދަކުރެއްވިއްޔާ ސަލާމަތްވެ, ގައުމު ހަމަޖެހިލައިގެން މިސަރުކާރުން ޕްރޮޕޯސްކުރި ބަޖެޓަކާ އެއްކޮށް އިރާދަކުރެއްވިއްޔާ ކާމިޔާބު ހަރަކާތްތެރި ބުންވަރު ހުރި އިޤްތިޞާދަކާ ދިމާއަށް މިއަންނަ އަހަރު މިގައުމު ދާނެ. އެއީ އަޅުގަނޑުމެންނަށް ލިބުނު އެންމެ ބޮޑު ކާމިޔާބީއަކީ. " މިނިސްޓަރ ވިދާޅުވިއެވެ.
ސައީދު ވިދާޅުވީ ގައުމުތަކާ ގުޅުން ބަދަހިކޮށް, މިސަރުކާރުން އިގްތިޞާދު ރަނގަޅު ކުރުމުގެ މަސައްކަތް ކުރަމުންދާ ކަމަށެވެ. އިގްތިޞާދީ މިހާލަތަށް ދިޔައީ މިދިޔަ ސަރުކާރުން ފައިސާ ޗާޕްކޮށް, ކޮވިޑަސް ލިބުނު އެހީއަށް ހިޔާނާތްތެރިވުމުން ކަމަށް ވިދާޅުވިއެވެ. ކޮވިޑާ ގުޅިގެން ބޭރުން ލިބުނު އެހީގެ ތެރެއިން 4 ބިލިއަން ރުފިޔާއަށް ވީގޮތް ނޭންގޭ ކަމަށެވެ. ނަމަވެސް ކޮވިޑް އެހީއާ, ކޮވިޑާ ގުޅުންހުރި އޮޑިޓެއް ހަދަމުންދާ ކަމަށާއި, އޮޑިޓް ނިމުމުން އެކަން ސާފްވާނެ ކަމަށް ވަޒީރު ވިދާޅުވިއެވެ.
ތަކުރާރުކޮށް ޔަގީންކަން ދެއްވީ އަންނަ އަހަރު ތަރައްޤީގެ ބޮޑަތި މަޝްރޫއުތައް ފެށި އިގްތިޞާދު ހަރަކާތްތެރިވާނެ ކަމަށެވެ.
ރިއެކްޝަންސް
