ބަނގްލަދޭޝް ގެ މައްޗަށް ރާއްޖޭގެ ޤައުމީ ފުޓްބޯޅަ ޓީމު މުހިއްމު މޮޅެއް ހޯދައިފި
ފީފާ އިންޓަނޭޝަނަލް ބްރޭކްގައި ކުޅުނު އެކުވެރި ކަމުގެ މެޗެއްގައި ދިވެހިރާއްޖެ އިން ބަނގަލަދޭޝްގައި އެ ގަޢުމު ބަލިކޮށް, މުހިއްމު މޮޅެއް ހޯދައިފިއެވެ. ބަނގްލަދޭޝަގެ ބަޝުންދަރާ ކިންގްސް އެރީނާގައި ކުޅުނު މިމެޗު ރާއްޖެއިން ކާމިޔާބުކުރީ 1-0 ނެވެ. މިއީ އަހަރަކަށް ފަހު ރާއްޖެއިން ކުޅުނު ފުރަތަމަ ބައިނަލްއަޤްވާމީ މެޗެވެ. މި މެޗުގެ ކުރިން އެންމެ ފަހުންވެސް ރާއްޖެއިން ބައިނަލްއަޤްވާމީ މެޗެއް ކުޅެފައިވަނީ ބަނގްލަދޭޝް އާ ދެކޮޅަށެވެ.
މެޗުގެ ހަމައެކަނި ގޯލް ދިވެހިރާއްޖެ އިން ކާމިޔާބުކުރީ 18 ވަނަ މިނިޓްގައި އިތުބާރު ފޯވާޑް އަލީ ފާސިރު (ސެންޓޭ) އެވެ. އޭރިއާ ބޭރުން ހަމްޒާ މުޙައްމަދު (ހަމްޕް) ނަގައިދިން ހިލޭޖެހުމެއް ސެންޓޭ ބޮލުން ފޮނުވާލިއިރު ސެންޓޭ މާކް ކުރާނެ އިތުރު ކުޅުނެތެރިއެއްވެސް ނެތި ކީޕަރަށް ބޯޅަ ދިފާއުކުރާނެ ވަގުތެއްވެސް ނުލިބުނެވެ. ހަމްޕް އަށް ރާއްޖެއަށް ލީޑު ފުޅާކުރާނެ ރަނގަޅު ފުރުޞަތެއް ފަހުން ލިބުން ނަމަވެސް ބޭނުންހިފޭގޮތެއް ނުވިއެވެ.
މެޗުގައި ގޯލެއްޖަހާ, ނަތީޖާ ހަމަހަމަ ކުރެވޭތޯ ބަނގަލަދޭޝްއިން މަސައްކަތް ކުރިނަމަވެސް އެކަން ކާމިޔާބުވެފައެއް ނުވެއެވެ. 43 ވަނަ މިނިޓްގައި ސޮހޭލް ރާނާ އޭރިއާގެ ބޭރުން ނަގައިދިން ބޯޅަވެސް އަމާޒުވީ ގޯލްގެ ދަނޑިއާއެވެ. މެޗުގެ 85 ވަނަ މިނިޓްގައި މޮރްސަލީން ފޮނުވާލި ބޯޅަ ކީޕަރު ޙުސައިން ދިފާއުކުރިއިރު, އޭގެ ހަތަރު މިނިޓްފަހުން ރަކީބް ޙުސައިން ފޮނުވާލި ބޯޅަވެސް ވަނީ ކީޕަރު ޙުސައިން ޝަރީފް ދިފާއުކޮށްފައެވެ. މެޗުގެ ގިނަ ވަގުތު ބޯޅަ ހިފަހައްޓައިގެން ކުޅުނީ ބަނގްލަދޭޝް ޓީމެވެ. ގިނަ ހަމާތަކާއި ފުރުޞަތުތައް ބަނގްލަދޭޝްއިން ތަނަވަސްކުރިނަމަވެސް ބަނގަލޭޝް ބަލިވީ ގޯލެއް ކާމިޔާބު ނުކުރެވިއެވެ. ބަނގްލަދޭޝް އަތުން ރާއްޖޭގެ ގައުމީ ޓީމް މިއަދު ހޯދި މޮޅު ޚާއްޞަކުރީ މިއަހަރު ކުއްލިއަކަށް ނިޔާވި ގައުމީ ޓީމްގެ ކުރީގެ މިޑްފީލްޑަރ މުޙައްމަދު އާރިފް (ބަކާ) އަށެވެ.
މީގެ ކުރިން ރާއްޖެއިން ބަނގްލަދޭޝްއާ ދެކޮޅަށް އެޤައުމުގައި 5 ފަހަރު ކުޅުނެވެ. އެއް މެޗުން އެއްވަރު ވެފައިވާއިރު ރާއްޖެ, ބަންގްލަދޭޝްއާ މީގެ 39 އަހަރު ކުރިން އެގައުމުގައި ކުޅުނު ފުރަތަމަ މެޗުން ބަލިވީ 0-8 ގެ ނަތީޖާ އަކުންނެވެ. އެއީ 1985 ވަނަ އަހަރު ސާފް ގޭމްސް ގައެވެ. އެންމެ ފަހުން އެގައުމުގައި ރާއްޖެ ބަލިވެފައިވަނީ 2023 ވަނަ އަހަރު ވޯލްޑްކަޕް/އޭޝިއަން ކަޕްގެ ޖޮއިންޓް ކޮލިފައިން ގައި 1-2 ން ނެވެ.
ބަނގްލަދޭޝް އާ ދެކޮޅަށް ރާއްޖެއިން ޖުމްލަ 19 މެޗު ކުޅެފައިވާއިރު, ރާއްޖެ މޮޅުވެފައިވަނީ ހަތް ފަހަރުއެވެ. ހަ މެޗަކުން ބަންގްލަދޭޝް މޮޅުވެފައިވާއިރު ހަ މެޗުން ވަނީ އެއްވަރުވެސް ވެފައެވެ. އަންނަ ހޮނިހިރު ދުވަހު މި ދެޓީމް ބައްދަކު ކުރާ ދެވަނަ މެޗުވެސް އޮންނާނީ ބަޝުންދަރާ ސްޓޭޑިއަމްގައެވެ.
ރިއެކްޝަންސް
