އެއް ބުރުން ރިޔާސީ އިންތިޚާބު ނިންމަން ފެނޭތޯ ރައްޔިތުން ކައިރިން އަހަނީ
އެއް ބުރުން ރިޔާސީ އިންތިޚާބު ނިންމަން ފެނޭތޯ ރައްޔިތުން ކައިރިން އަހަން ނިންމަވާފައިވާކަން ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިއުލާނުކުރައްވައިފި އެވެ. ޖުމްހޫރީ ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ ވިދާޅުވީ ދެވަނަ ބުރަކަށް ނުގޮސް ފުރަތަމަ ބުރުން އެންމެ ގިނަ ވޯޓްލިބޭ ކެންޑިޑޭޓް އިންތިޚާބުވާ ގޮތަށް ބަދަލުކުރަބން ރައްޔިތުން ބޭނުންވޭތޯ ވޯޓަކަށް އައްސަވާނެ ކަމަށެވެ.
ޕްރިފަރަންސް ނިޒާމަކަށް އަމަލުކުރަން އެޓަރނީ ޖެނެރަލްގެ އޮފީހުން މިހާރުވެސް މަޝްވަރާ ކުރަމުން އަންނަކަން ފާހަގަކުރައްވާ ރައީސް ވިދާޅުވީ ދިރާސާކޮށްފަ ގައުމަށް އެންމެ ރަނގަޅު ގޮތްކަމަށް ފެންނަ ނަމަ މަޖިލިހުގެ ތެރެއިން އެބަދަލު ގެންނަން ގަސްތުކުރައްވާ ކަމަށެވެ.
" އެކަން އެދޭކަމަށް ވަންޏާ ދެން އަންނަ ރިޔާސީ އިންތިޚާބުން ފެށިގެން ދެބުރު ނޯންނަ ގޮތަށް, އެއްބުރުން މީހަކު ހޮވާ ނިންމޭގޮތަށް ކަންކަން ބަދަލުކުރަން." ރައީސް ވިދާޅުވިއެވެ.
އޭރުން ޚަރަދުވެސް ކުޑަވާނެކަން ފާހަގަކުރައްވާ ވިދާޅުވީ އެފަދަ ކަންކަން ނިންމާނީ ރައްޔިތުން ކައިރިން އަހައިގެން ކަމަށެވެ. ރިޔާސީ އިންތިޚާބު އެއްބުރުން ނިމޭ ގޮތަށް ގެންނަ ބަދަލުގެ އިތުރުން, ރިޔާސީ އިންތިޚާބާއި, މަޖިލިސް އިންތިޚާބު އެކުގައި ބޭއްވުމާ މެދުވެސް ރައްޔިތުން ކައިރިން އަހާނެ ކަމަށް ރައީސް ވިދާޅުވިއެވެ. އިންތިޚާބަށް އެތައް ސަތޭކަ މިލިއަން ރުފިޔާ ޚަރަދު ކުރަން ޖެހޭކަން ފާހަގަކުރައްވާ ރައީސް ވިދާޅުވީ އެކަމާމެދުވެސް ގޮތެއް ނިންމާނީ ރައްޔިތުން ކަމަށެވެ. އެއީ އެމަނިކުފާނަށް އެކަނި ނިންމޭނެ ކަމެއް ނޫން ކަމަށާއި, އެކަމަކު އާބާދީ މަދު ގައުމެއްގައި އެންމެ ރަނގަޅު ގޮތަކީ ދެ އިންތިޚާބު އެއްކޮށް ބޭއްވުން ކަމަށް ދެކެވަޑައިގަންނަވާ ކަމަށް ވިދާޅުވިއެވެ.
މީގެއިތުރުން ރިޔާސީ ދައުރު ނޮވެމްބަރު 11 ވަނަ ދުވަހަށް ހަމަވާ ގޮތަށް ބަދަލުކުރަންވެސް ރައްޔިތުން ކައިރިން އައްސަވާނެ ކަމަށް ވިދާޅުވިއެވެ. ޒަމާނުއްސުރެ ރާއްޖޭގައި ރިޔާސީ ދައުރު ފެށެނީ ނޮވެމްބަރު 11 ވަނަ ދުވަހު އެވެ. އެއީ ރާއްޖޭގެ ޖުމްހޫރީ ދުވަހެވެ. އެކަމަކު މިދިޔަ ދައުރާއި މިދައުރު ފެށުނީ ނޮވެމްބަރު 17 ވަނަ ދުވަހުއެވެ. އެއީ ކޯޓުން އިންތިޚާބެއް ބާތިލްކޮށް, އަލުން އިންތިޚާބު ބޭއްވުމުން އައި ބަދަލެކެވެ.
ރިއެކްޝަންސް
