ވެރިކަމަކީ ލިބޭ މޮޅުކަމަކާއި މުދާގަނޑެއް ނޫން, މަސްއޫލިއްޔަތެއް ބުރަ ޒިންމާއެއް- ރައީސުލްޖުމްހޫރިއްޔާ
ވެރިކަމަކީ ލިބޭ މޮޅުކަމަކާއި މުދާގަނޑެއް ނޫންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. ޖުމްހޫރީ ދުވަހުގެ ރަސްމީ ޖަލްސާގައި ވާހަކަ ދައްކަވަމުން ރައީސުލްޖުމްހޫރިއްޔާ ވިދާޅުވީ ވެރިކަމަކީ ބުރަ މަސްއޫލިއްޔަތަކާއި ބޮޑު ޒިންމާއެއް ކަމަށެވެ.
ޖުމްހޫރީ ދުވަހުގެ ޖަލްސާގައި ރައީސުލްޖުމްހޫރިއްޔާ ވިދާޅުވީ ޖުމްހޫރީ ދުވަހަކީ ރައްޔިތުންގެ ދުވަހެއް ކަމާއި، ޖުމްހޫރީ ވެރިކަމަކީ ރައްޔިތުންގެ ވެރިކަމެއް ކަމަށެވެ. ވެރިކަންކުރައްވަން މަސައްކަތްޕުޅު ކުރައްވަނީ ކީރިތި ޤުރުއާނާއި ކީރިތި ރަސޫލާގެ ސުންނަތުގެ އިތުރުން އެމަނިކުފާނުގެ ބައްޕާފުޅު، އަލްމަރްޙޫމް ފަޟީލަތުއްޝައިޚް ޙުސައިން ޢަބްދުއްރަޙްމާން ލިޔުއްވާފައިވާ ފޮތް، "ދައުލަތާއި ވެރިންނާއި މަސްއޫލިއްޔަތު އަދި ކިޔަމަންވުމުގެ މަފްހޫމު" އަކީ އެމަނިކުފާނުގެ ގައިޑްބުކް ކަމުގައި ބައްލަވައިގެންކަމަށް ރައީސް ވިދާޅުވިއެވެ. އެއީ ބައްޕާފުޅުގެ ފޮތަކަށް ވާތީ ނޫން ކަމަށާއި, ވެރިކަމާ ގުޅޭގޮތުން އަދި ވެރިން އަދާކުރައްވަން ޖެހިވަޑައިގަންނަވާ މަސްއޫލިއްޔަތު ތަކަށް އިލްމީ ނަޒަރަކުން ވާހަކަ ދައްކަވާފައިވާ ފޮތަކަށްވެސް ވާތީ ކަމުގައި ރައީސް ވިދާޅުވިއެވެ.
"ވަލިއްޔުލްއަމްރު ނުވަތަ ރައީސުއްދައުލާއަކީ ވަކި މުއްދަތަކަށް ރައްޔިތުން އެބައިމީހުންގެ މަޞްލަޙަތުތައް ބަލަހައްޓައި ހިންގުމަށް ޙަވާލުކޮށްފައިވާ ހަވާލްދާރެކެވެ. ވަކީލެކެވެ. އަދި ޚާދިމެއް މެއެވެ. ވީމާ، އެކަން އޭނާގެ ހުރިހާ ޢަމަލަކާއި މުޢާމަލާތަކުން ފެންނަންވާނެއެވެ. އަދި އޭނާގެ މަސްއޫލިއްޔަތު އަދާކުރުމުގައި ކޮންމެހެން ހުންނަންޖެހޭ ކަންތައްތައް ފިޔަވައި އެއްވެސް ޙާލެއްގައި ރައްޔިތުންގެ މައްޗަށް އޭނާގެ ނަފްސު އުފުލައި ހައިބަތާއި ޖާހުގެ ބޮޑުކަން އެކިއެކި މަޒާހިރުތަކުން ދައްކައި އެމީހުން ނިކަމެތިކޮށް އަޅުދާސްކޮށްގެން ނުވާނެއެވެ. އެއީ ކުރަންހެޔޮނުވާނޭ ކަމެކެވެ. އަދި ޤައުމުގެ ސިޔާދަތު ލިބިގެންވާ ޙަޤީޤީ ވެރިފަރާތް ކަމުގައިވާ ރައްޔިތުން އެކަމަށް ރުހިތިބެގެންވެސް ނުވާނެއެވެ." ބައްޕާފުޅުގެ ފޮތަށް އިޝާރާތްކުރައްވަމުން ރައީސުލްޖުމްހޫރިއްޔާ ވިދާޅުވިއެވެ.
މިމޭރުމުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ މި ސަރުކާރުގެ ޢަމަލުތައް ބައްޓަންކުރައްވާފައިވަނީ އެކަން ހަނދުމަފުޅުގައި ބަހައްޓަވައިގެންކަމަށެވެ. އެގޮތުން، މަސައްކަތްކުރައްވާފައިވާނީ ރައްޔިތުންގެ އަޑުއައްސަވައިގެން، ރައްޔިތުންނަށްޓަކައިކަމުގައި އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ ގައުމުގެ ހަގީގީ ވެރިފަރާތަކީ އަދި ދައުލަތުގެ އެންމެހާ ބާރުތަކުގެ މަސްދަރަކީ ރައްޔިތުން ކަމަށެވެ. އެހެންވެ ގައުމުގައި އެންމެ ހައިބަތާއި ގަދަރު އުފުލިގެންދާނީ ރައްޔިތުން ކަމަށް ވިދާޅުވިއެވެ.
ރިއެކްޝަންސް
