މަސައްކަތް ކުރަނީ ރައްޔިތުންގެ ފަޅީގައި ހުރެގެން, ރައްޔިތުންނަށް ހެޔޮ ވެރިކަމެއް ކޮށްދެވޭތޯ- ރައީސް މުއިއްޒު
މަސައްކަތް ކުރައްވަނީ ރައްޔިތުންގެ ފަޅީގައި ހުރެގެން, ރައްޔިތުންނަށް ހެޔޮ ވެރިކަމެއް ކޮށްދެވޭތޯ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ. ޖުމްހޫރީ ދުވަހުގެ ރަސްމީ ޖަލްސާގައި ރައީސުލްޖުމްހޫރިއްޔާ ވިދާޅުވީ އެމަނިކުފާނު ކުރައްވަނީ ހެޔޮ ވެރިކަމެއް ކަމަށެވެ.
ރައީސް ވިދާޅުވީ ހެޔޮ ވެރިކަމެއްގައި ޖުޑިޝަރީއަކަށް ނުފޫޒެއް ނުފޯރުއްވާނެ ކަމަށެވެ. އެއްވެސް މީހަކަށް ބޭއިންސާފުން ހުކުމެއް ކުރުމަށް, ފަނޑިޔާރު ގެއަށް ނުފޫޒު ފޯރުވާ ބާރުފޯރުވާ ވަކި މީހަކަށް ވަކި ގޮތެއް ހަދަން ނާއްގަވާނެ ކަމުގެ ޔަގީންކަން ރައީސް ދެއްވިއެވެ. އެއީ ގަބުލުކުރައްވާ ހަމައެއް ނޫންކަމަށް ރައީސް މުއިއްޒު ވިދާޅުވިއެވެ.
ޖުޑިޝަރީއަށް, ޝަރުއީ ދާއިރާއަށް ނުފޫޒު ފޯރުވުން ނިމުމަކަށް ގެންނާނެ ކަމަށް ވެވަޑައިގެންނެވި ވައުދާ އެއްގޮތަށް ފުރަތަމަ ދުވަހުން ފެށިގެންވެސް އަމަލުކުރައްވަމުން ގެންދަވާ ކަމަށް ރައީސް ވިދާޅުވިއެވެ.
" އެހެންވީމަ ސިޔާސީ ގޮތުން މީހުން ހައްޔަރު ނުކުރަނީ. އެހެންވީމަ ސިޔާސީ ގޮތުން ހައްޔަރުވެފަ ތިބި މީހުން މިނިވަންވެސް ވަނީ. އަޅުގަނޑުމެންނެއް ނުފޯރުވާނަން ޝަރުއީ ދާއިރާއަކަށް ނުފޫޒެއް." ރައީސް ވިދާޅުވިއެވެ.
އެކަމަކު ރައީސް ވިދާޅުވީ ޝަރުއީ ދާއިރާއަށް ބޭނުންވާ ކަންތައްތަކަށް މަގުފަހިކޮށެއްދެއްވާނެ ކަމަށެވެ. އަންނަ އަހަރު ޝަރުއީ ދާއިރާގެ ޖާގައަށް ދިމާވެފައިވާ މައްސަލައަށް ހައްލުތައް އަންނަން ފަށާނެ ކަމަށްވެސް ރައީސް ވިދާޅުވިއެވެ. ކްރިމިނަލް ކޯޓްގެ އިމާރާތް ހުޅުމާލެ އަށް ބަދަލުކުރުމުގެ މަސައްކަތް ހިނގަމުންދާކަން ވެސް ރައީސް ފާހަގަކުރެއްވިއެވެ. އަންނަ އަހަރުގެ މާރޗް ނުވަތަ އޭޕްރީލަށް އެތަނުގެ މަސައްކަތް ނިމި ކްރިމިނަލް ކޯޓް ބަދަލުކުރެވޭނެ ކަމަށް ރައީސް މުއިއްޒު ވިދާޅުވިއެވެ.
ރައީސުލްޖުމްހޫރިއްޔާ ވިދާޅުވީ މިދިޔަ 51 ހަފްތާއާ ދެ ދުވަސް ތެރޭގައިވެސް ރައްޔިތުންގެ ފަޅީގައި ތިބެގެން, ރައްޔިތުންނަށް ހެޔޮ ވެރިކަމެއް ކޮށްދެއްވި ކަމަށެވެ.
ރިއެކްޝަންސް
