ބްރައިޓަން އަތުންވެސް ސިޓީ ބަލި, ލިވަރޕޫލް ބޮޑު ލީޑެއްގައި
މިއީ ގާޑިއޯލާގެ އިރުޝާދުގެ ދަށުން ވިދިވިގެން 4 މަޗުން ސިޓީ ބަލިވި ފުރަތަމަ ފަހަރު
އިނގިރޭސި ޕްރިމިއަރ ލީގުގައި ބްރައިޓަން އިން ފަހަތުން އަރާ މެންޗެސްޓަރ ސިޓީ ބަލިކޮށްފިއެވެ. މިއާއެކު ސީޒަންގައި ސިޓީ އެންމެ ފަހުން ކުޅުނު ހަތަރު މެޗުންވެސް ވަނީ ބަލިވެފައެވެ. އާދިއްތަ ދުވަހު 1-2 ން ބްރައިޓަން އަތުން ސިޓީ ބަލިވި އިރު, 2-0 ން އެސްޓަންވިލާ ބަލިކޮށް ލިވަޕޫލްއިން ވަނީ ލީގުގައި 5 ޕޮއިންޓްގެ ލީޑެއް ނަގާފައެވެ.
ސިޓީ އާއި ބްރައިޓަން ވާދަކުރި މެޗުގެ 23 ވަނަ މިނިޓްގައި ސިޓީގެ ހަމައެކަނި ގޯލް ކާމިޔާބުކޮށްދިނީ އާލިން ހާލަންޑްއެވެ. ފުރަތަމަ ހާފު 1-0 ން ކުރީގައި އޮވެ ސިޓިން ނިންމާލި ނަމަވެސް ބްރައިޓަން އިން ވަނީ ފަހު ހާފުގައި ގާތްގަތުގައި ދެ ގޯލް ކާމިޔާބުކޮށް ސިޓީގެ މައްޗަށް ކުރިހޯދާފައެވެ. 78 ވަނަ މިނިޓްގައި ބްރައިޓަން އަށް ނަތީޖާ ހަހަމަ ކޮށްދިނީ ޔާއޮ ޕެޑްރޯ އެވެ. މެޗުން ބްރައިޓަން މޮޅުވި ގޯލް 83 ވަނަ މިނިޓްގައި ކާމިޔާބުކޮށަދިނީ މެޓް 'އޯ' ރިލޭ އެވެ.
މިއީ 2006 ން ފެށިގެން ސިޓީން ވިދިވިދިގެން ހަތަރު މެޗުން ބަލިވި ފުރަތަމަ ފަހަރެވެ. އަދި ކޯޗު ޕެޕް ގާޑިއޯލާގެ މުޅި ކޯޗިން ކެރިއަރުގައިވެސް އޭނާގެ ޓީމެއް ވިދިވިދިގެން ހަތަރު ފަހަރު ބަލިވި ދެވަނަ ފަހަރެވެ. އެއީ ވެސް ޕެނަލްޓީ ޖަހައިގެންނެވެ.
"މިއީ ދޯ މީހުން ބޭނުންވާ ގޮތް. މިއީ އާދައިގެ ކަމެއް. އަހަރެމެން ބައިވަރު މޮޅު ހޯދައިފިން. ތިބި ބަޔަކު ލައިގެން ކުޅޭވޭތޯ މިބަލަނީ" ގާޑިއޯލާގެ ކޯޗިން ކެރިއަރުގެ ނިމުން ގާތްވަނީ ތޯ ކުރި ސުވާލަކަށް މެޗަށްފަހު އޭނާ ޖަވާބުދީފައި ވެއެވެ.
މި ފަހުން ކުޅުނު ހަތަރު މެޗުން ބަލިވެފައިވާއިރު މި ސީޒންގައި ސިޓީގައި އަނިޔާގެ މައްސަލަތައް ބޮޑެވެ. ދާދި ފަހުން ބެލެންޑޯ ހޯދި, ސިޓީގެ އެންމެ އިތުބާރު މިޑްފީލްޑަރ ރޮޑްރީ އަށް އަނިޔާވެ ވަނީ ސީޒަން ނިމިފައެވެ. ފަހަތަށް ކުޅޭ ރުބެން ޑިއަސް, ޖޯން ސްޓޯންސް, މެނުއަލް އަކާންޖީ އަދި ނަތަން އާކޭ ވެސް މިވަގުތު ހުރީ އަނިޔާގައެވެ. ޑީ ބްރޭނާއަށްވެސް އަދި ކުޅުމުގެ ތެރެއަށް އަނބުރާ އާދެވޭނެ ދުވަހެއް ނޭނގެއެވެ.
ސިޓީގެ ބަލިވުމުގެ ސިލްސިލާ އަށް ނިމުން ގެންނާނެ ފޮމިއުލާއެއް ނުހޯދި ލިވަޕޫލްއިން ވަނީ އޭގެ ފައިދާ ނަގާ, 5 ޕޮއިންޓަށް ލީޑު ފުޅާކޮށްފައެވެ. ސެޕްޓެމްބަރު މަހު މެދުތެރިން ފެށިގެން ކުޅުނު އެއްވެސް މެޗަކުން ލިވަޕޫލް ބައްޔެއް ނުވެއެވެ. އާދިއްތަ ދުވަހު ޕްރިމިއާ ލީގުގައި އެސްޓަން ވިލާ ބަލިކޮށް އާނެ ސްލޮޓް ވަނީ އިތުބާރު ދަމަހައްޓާފައެވެ.
ލިވަޕޫލްގެ ފުރަތަމަ ގޯލް މެޗުގެ 20 ވަނަ މިނިޓްގައި ކާމިޔާބުކުރީ ޑާވިން ނޫނެޒް އެވެ. ލީޑް ނަގައިދިނުމުގައި މުޙައްމަދު ޞަލާޙް އެހީތެރިވިއިރު ސަލާޙް ވަނީ 84 ވަނަ މިނިޓްގައި ލިވަޕޫލްގެ ދެވަނަ ގޯލްވެސް ކާމިޔާބުކޮށްފައެވެ.
ފުރަތަމަ ފާހުގައި ލިވަޕޫލްގެ ޑިފެންޑަރު, ޓްރެންޓް އެލެގްޒެންޑަރ އާނޯލްޑް އަށް އަނިޔާވެ ވަނީ ކުޅުމާ ދުރަށް ގޮސްފައެވެ. 25 ވަނަ މިނިޓްގައި އާނޯލްޑް ދަނޑުން ބޭލީ ބެލެވޭގޮތުގައި ފަލަމަސްގަނޑަށް ލިބުނު އަނިޔާއަކާ ގުޅިގެންނެވެ. ދަނޑުން ފޭބިތާ ތިން މިނިޓް ފަހުން އޭނާ ވަނީ ސްޓޭޑިއަމްއިން ބޭރަށް އިތުރު ފަރުވާއަށް ގެންގޮސްފައެވެ.
މިއަހަރުގެ ހޫނުމޫސުމުގައި ޔާގަން ކްލޮޕްގެ ބަދަލުގައި ލިވަޕޫލްއާ ހަވާލުވި ކޯޗު, އާނޭ ސްލޮޓްގެ އިރުޝާދުގެ ދަށުން ލިވަޕޫލް މިހާތަނަށް ކުޅުނު 17 މެޗުގެ ތެރެއިން 15 މެޗުން ވަނީ މޮޅުވެފައެވެ. އާދިއްތަ ދުވަހުގެ މޮޅާއެކު އިންޓަނޭޝަލް ބްރޭކަށްދާއިރު ލިވަޕޫލް އޮތީ 28 ޕޮއިންޓާއެކު ތާވަލްގެ އެއްވަނައިގައެވެ. ދެވަނައިގައި މެންޗެސްޓަރ ސިޓީ އޮތީ 23 ޕޮއިންޓާއެކުއެވެ.
ރިއެކްޝަންސް
