ހިޔާވެހި ފައިނޭންސިންގ އަށް ހުށަހެޅުމުގެ ފުރުޞަތު ހުޅުވާލައިފި
ހިޔާވެހި ފައިނޭންސިންގ އަށް ހުށަހެޅުމުގެ ފުރުޞަތު ގެދޮރުވެރިކަމާ ބިމާއި އުމުރާނީ ތަރައްޤީއާ ބެހޭ ވުޒާރާއިން ހުޅުވާލައިފި އެވެ. ހިޔާވެހި ފައިނޭންސިންގ އަށް އެދެމުގެ ފުރުޞަތު މިއަދު ހުޅުވާލީ 'ހިޔާވެހި ޕޯޓަލް' މެދުވެރި ކޮށެވެ.
ޕޯޓަލްގެ ތެރެއިން ތިން ސްކީމަކަށް އެދުމުގެ ފުރުޞަތު ވަނީ ހުޅުވާލާފައެވެ. އެއީ ރަށްވެހި ކެޓަގަރީއާއި, ސަހަރު ކެޓަގަރީ އާއި, ފަހި މާލެ ކެޓަގަރީ އެވެ. ރަށްވެހި ކެޓަގަރީ އަކީ ރަށްރަށުގައި ދިރިއުޅޭ ފަރާތްތަކުން އެރަށްތަކުގައި ގެދޮރު އިމާރާތް ކުރުމަށް އެދޭ ފައިނޭންސިންގ އެވެ. ސަހަރު ކެޓަގަރީ އަކީ އާބަން ސަރަހައްދު ތަކަށް ޚާއްޞަ ކެޓަގަރިއެވެ. އާބަން ސަރަހައްދުތައް ކަނޑައަޅާ ސަރުކާރުން ވަނީ އިއުލާނު ކޮށްފައެވެ. ދެން އޮތީ މާލެ އަށް އަމާޒުކޮށްފައިވާ ފަހި މާލެ ކެޓަގަރީ އެވެ.
https://x.com/MHLUDmv/status/1854591891347484845
ހިޔާވެހި އިފްތިތާހު ކުރުމުގެ ރަސްމިއްޔާތުގައި މިނިސްޓަރ ޑރ.އަލީ ހައިދަރު ވިދާޅުވެފައި ވަނި އެޕްރޮގްރާމްގެ ތެރެއިން ދަތި ހާލުގައި އުޅޭ ގިނަ މީހުންނަށް ގެދޮރުގެ ތަނަވަސްކަން ހޯދޭނެ ކަމަށެވެ. ސަރުކާރުން އިފްތިތާހުކުރި ހިޔާވެހި ފައިނޭންސިންގ ޕްރޮގްރާމަކީ ރާއްޖޭގެ އެކި ރަށްރަށުގައި ގެދޮރު ނޭޅި, އަޅަންހުރި ގޯތި ތަކުގައި ގެދޮރު އިމާރާތް ކުރުމަށް ފަސް އިންސައްތައިގެ ސާވިސް ޗާޖެއްގައި ފައިސާ ދޫކުރާ ސްކީމެކެވެ.
ސްކީމުން ފައިސާ ކަނޑައަޅާފައިވަނީ ހުރިހާ ރަށަކަށް އެއް މިލިއަން ރުފިޔާ, އާބަން ސަރަހައްދު ތަކަށް ތިން މިލިއަން އަދި މާލެ ސަރަހައްދަށް ހަމިލިއަން ރުފިޔާ އެވެ. އެލޯނު އަނބުރާ ދައްކަން 25 އަހަރު ލިބެއެވެ. ގެދޮރުވެރިކަމަށް އަންނަ އަހަރުގެ ބަޖެޓްގައި 4.8 ބިލިއަން ރުފިޔާ ވަނީ ކަނޑައަޅުއްވާފައެވެ.
ގެދޮރުވެރިކަން ހޯދައިދިނުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އެންމެ ބޮޑު އެއް ވައުދެވެ.
ރިއެކްޝަންސް
