ޕީއެސްޖީ ސަޕޯޓަރުންގެ ބިޔަ 'ފްރީ ފަލަޞްޠީން' ބެނާ, ޔުއެފާއިން އަދަބެއް ނުދޭނެ!
ޕީއެސްޖީގެ ސަޕޯޓަރުން ވަނީ ފަލަޞްޠީނާއި ލުބުނާނާއެކު ތިބިކަން ހާމަކޮށްފަ
ޗެމްޕިއަންސް ލީގުގައި ބުދަ ދުވަހު އެތްލެޓިކޯ މެޑްރިޑާ ދެކޮޅަށް ފްރާންސްގެ ޕެރިސް ސެއިންޓް ޖަމައިން (ޕީއެސްޖީ) ކުޅުނު މެޗުގައި ފަލަޞްތީނު މިނިވަން ކުރަން ގޮވާލާ ދެމި ބެނާއެއްގެ މައްސަލަ ހޫނުވެއްޖެއެވެ. 50 މީޓަރު ފުޅާ, 20 މީޓަރު އުސް ބެނާ ޕީއެސްޖީގެ ގޯލްގެ ފަހަތުގެ ބޮޑު ސަރަޙައްދެއްގައި ދަމާފައިވާއިރު, ބެނާގައި ފަލަޞްޠީން އަދި ލުބުނާނުގެ ދިދަ ކުރަހާފައި ވެއެވެ. އަދި ބެނާގެ މެދުގައި ހިޞާރުކޮށްފައިވާ ހުޅަނގު އައްސޭރީގައި ހުންނަ އަލް- އަޤްޞާ މިސްކިތްވެސް ފެންނަން ހުރެއެވެ. "ފަލަޞްޠީން މިނިވަންކުރޭ" މި އިބާރާތް ލިޔެފައި ވަނީ ޕީއެސްޖީގެ ދިދަ އާވެސް އެކުއެވެ.
އެކަމާ ގުޅިގެން ފްރާންސްގެ އިންޓީރިއާ މިނިސްޓަރ ބްރޫނޯ ރަޓެއިލިއާ ވަނީ އެހާ ބޮޑު ދިދައެއް ސްޓޭޑިއަމް އަށް ވެއްދި ގޮތާބެހޭގޮތުން ސުވާލު އުފައްދާ, އެ ބެނާ ސްޓޭޑިއަމްގައި ބޭނުންކުރުމަކީ އެއީ ޤަބޫލުކުރެވޭނެ ކަމެއްނޫން ކަމަށް ބުނެފައެވެ. "މި ބެނާ ސްޓޭޑިއަމްގައި ހުރެގެން ނުވާނެ" އެކްސްގައި ރަޓައިލިއާ ކުރި ޕޯސްޓްގައި ބުނެފައު ވެއެވެ. އަދި ކްލަބުން އެކަމާ ގުޅޭގޮތުން ޖަވާބުދާރީ ވާންޖެހޭނަކަމަށްވެސް އޭނާ ވަނީ ބުނެފައެވެ. ބެނާ ދަމާފައިވަނީ ޕެރިސް އަލްޓްރާ ކަލެކްޓިވް އިންނެވެ. އެއީ ޕީއެސްޖީގެ ހާޑްކޯ ސަޕޯޓަރުންގެ ގްރޫޕެކެވެ.
ފާޑުކިޔުންތައް އަމާޒުވެފައިވާ މިދަނޑިވަޅުގައި ޔޫރަޕްގެ ފުޓްބޯޅައިގެ ގަވަރނިންގ ބޮޑީ, ޔުއެފާއިން ބުނެފައިވަނީ އެކަމާ ގުޅިގެން ޕީއެސްޖީއަށް ފިޔަވަޅެއް ނާޅާނެ ކަމުގައެވެ. ސަބަބަކީ ކްލަބްތަކާމެދު ސުލޫކީ ފިޔަވަޅުތައް އަޅަނީ ސިޔާސީ މެސެޖުތައް ހިމެނޭ ކަންކަމުގައި ކަމުގައި ވާތީއެވެ. "މި މައްސަލައާ ގުޅިގެން ސުލޫކީ ފިޔަވެޅެއް ނާޅާނެ. ސަބަބަކި ބެނާގައިވާ އިބާރާތަކީ ނުވަތަ ފޮޓޯއަކީ އެއްވެސް ބަޔަކަށް ރައްދުކުރާ ބަދުބަހެއްނޫން. އޭގައި ސިޔާސީ ކަމެއް ނެތް" ޔުއެފާގެ ސްޕޯކްސް ޕަރސަން ރޮއިޓާސް އިން ކުރި ސުވާލަކަށް ޖަވާބުދެމުން ބުނެފައި ވެއެވެ.
ބުދަ ދުވަހު މިކަން ހިންގާފައިވާއިރު ޔުއެފާ ނޭޝަންސް ލީގުގައި އިޒްރާއިލް އާއި ފްރާންސް ބައްދަލުކުރާ މެޗު ޕެރިހުގައި މީގެ އަށް ދުވަސް ފަހުން އޮންނާނެއެވެ.
ބެނާގެ ތިރީގައި ފްރެންޗް ބަހުން "ހަނގުރާމަ އޮންނާނީ ދަނޑު މަތީގައި ކަމުގައާއި, ދުނިޔެއަށް ބޭނުންވަނީ ސުލްޙަ' ކަމުގައިވެސް ބުނެފައި ވެއެވެ. މެޗު ކުޅެމުން ދިޔަ ވަގުތު ސަޕޯޓަރުން ވަނީ އިތުރު މެސެޖެއްވެސް ދައްކާލާފައެވެ. އޭގައި ފްރާންސް ބަހުން "ޣައްޒާގެ ކުޑަކުއްޖެއްގެ ދިރިހުރުން އެހެން ކުޑަކުދިންގެ ދިރިހުރުމަށް ވުރެ ކުޑައީތޯ!" ސުވާލުކޮށްފައިވެއެވެ.
މެޗަށްފަހު ޕީއެސްޖީން ބުނެފައިވާ ގޮތުގައި އެއީ ކްލަބަށް އެނގިގެން ހިނގާފައިވާ ކަމެއްނޫނުވެ. އަދި މެޗުކުޅޭ ދަނޑުތަކަކީ ފުޓްބޯޅައިގެ ރޫހުގެ ކަންކަން ކުރާ ތަނަކަށް ވާންޖެހޭނެ ކަމަށާއި ސިޔާސީ މަޤްސަދެއް ޙާސިލްކުރަން ބާރުއަޅާ މެސެޖްތަކާ ކްލަބުން ދެކޮޅުހަދާކަމަށްވެސް ވަނީ ބުނެފައެވެ.
2023 ވަނަ އަހަރު ނޮވެމްބަރު މަހު ޣައްޒާ ހަނގުރާމައިގެ ކުރީކޮޅު ސްކޮޓްލެންޑްގެ ކްލަބް ސެލްޓިކްގެ ސަޕޯޓަރުން ޗެމްޕއަންސް ލީގުގެ މެޗެއްގައި ފަލަޞްޠީންގެ ދިދަ ވިހުރުވާފައިވާ މައްސަލައިގައި ކްލަބް 19000$ ން ޖޫރިމަނާކޮށްފައި ވެއެވެ. އެހާދިސާއަށް ފަހުވެ ސެލްޓިކްގެ ސަޕޯޓަރުން ވަނީ އެ އަމަލު ތަކުރާރުކޮށް ފަލަޞްޠީނާއެކު ތިބިކަން ހާމަވާ ގިނަ މެސެޖްތަކެއް ސްޓޭޑިއަމްގައި އެކި ފަހަރު މަތިން ދައްކާލާފައެވެ.
އިޒްރާއިލްއިން ޣައްޒާގައި ހިންގަމުން ގެންދާ ޤަތުލްއާންމުގައި މިހާތަނަށް 43,391 މީހުން ވަނީ މަރާލާފައެވެ. އަދި އެއްލައްކަ އަށްވުރެ ގިނަ މީހުން ޒަޙަމްވެފައިވާ ކަމަށް ފަލަޞްޠީނުގެ ހެލްތް މިނިސްޓްރީން މައުލޫމާތު ދެއެވެ. ސެޕްޓެމްބަރު މަހުން ފެށިގެން އިޒްރާއިލްއިން ލުބުނާނަށް ހަމަލާދޭން ފަށާފައި ވާއިރު ލުބުނާލުންވެސް މިހާތަނަށް 3,050 މީހުން މަރާލާފައި ވެއެވެ.
ރިއެކްޝަންސް
