ޕީއެންސީގެ އެތެރޭގެ އިންތިޚާބު އަނެއްކާވެސް ފަސްކޮށްފި
ޕީޕަލްސް ނެޝަނަލް ކޮންގްރެސް (ޕީއެންސީ) ގެ އެތެރޭގެ އިންތިޚާބު އަނެއްކާވެސް ފަސްކޮށްފިއެވެ.
ސަރުކާރު ހިންގާ ޕާޓީގެ އެތެރޭގެ އިންތިޚާބު މިމަހުގެ 9 ވަނަ ދުވަހު ބާއްވަން ތާވަލްކޮށްފައި އޮތުމަށްފަހު, އަނެއްކާވެސް ފަސްކުރިކަން މިއަދު ވަނީ އިއުލާނުކޮށްފައެވެ. އެތެރޭގެ އިންތިޚާބު ބާއްވަން ޕީއެންސީން ކަނޑައަޅާފައިވާ އާ ތާރީޚަކީ މިމަހުގެ 23 ވާ ހޮނިހިރު ދުވަހެވެ.
އިންތިޚާބު ފަސްކުރި ސަބަބެއް ކަމަށް ޕީއެންސީން ޖުމްހޫރީ ދުވަހާ ގުޅިގެން އޭގެ ކުރީ ދުވަސް ސަރުކާރު ބަންދު ދުވަހެއްގެ ގޮތުގައި ރައީސުލްޖުމްހޫރިއްޔާ ކަނޑައެޅުއްވުމެވެ. ޖުމްހޫރީ ދުވަހަކީ މިމަހުގެ 11 ވަނަ ދުވަހެވެ. އެދުވަހުގެ ކުރީ ދުވަސް ބަންދުކޮށް ހަފްތާ ބަންދާ އިންވެގެން ޖުމްހޫރީނ ދުވަހުގެ ބަންދު ލިބޭ ގޮތަށް ރައީސުލްޖުމްހޫރިއްޔާ ވަނީ ކަނޑައަޅުއްވާފައެވެ.
ޕީއެންސީން ބުނީ އިންތިޚާބު ފަސްކުރީ އެދުވަސް ބަންދުކުރުމުން ގިނަބަޔަކު ރަށުން ބޭރަށް ދަތުރުކުރާނެތީ ކަމަށެވެ. އެހެންކަމުން ވޯޓްލާ ދުވަހު ގިނަބަޔަކަށް ތަކްލީފްތަކެއް އުފުލަން ޖެހޭނެތީ އިންތިޚާބު ފަސްކުރީކަމަށް ޕީއެންސީގެ އިއުލާނުގައި ބުނެފައި ވެއެވެ. އިންތިޚާބު ފަސްކުރީ ތާރީޚު ބަދަލުކޮށްދިނުމަށް ކެންޑިޑޭޓުންނާއި, ޕާޓީގެ ގިނަ އަދަދެއްގެ މެމްބަރުން އެދުމުގެ މަތީންކަމަށް ޕީއެންސީން ބުންޏެވެ.
ޕީއެންސީން ބުނީ ވޯޓާރސް ލިސްޓާއި, އިންތިޚާބު ބާއްވަން ޖެހޭ ދާއިރާތަކާއި, ރަށްރަށާއި ކެންޑިޑޭޓުންގެ ނަންތައް މިމަހުގެ 10 ވަނަ ދުވަހު އިއުލާނު ކުރާނެ ކަމަށެވެ.
ޕީއެންސީގެ ދާއިރާތަކުގެ ރައީސުންގެ އިންތިޚާބު ބާއްވަނީ ރައްޔިތުންގެ މަޖިލިހުގައި އެޕާޓީގެ މެމްބަރުން ނުހިމެނޭ ދާއިރާ ތަކުންނެވެ. އެޕާޓީގެ މަޖިލިސް މެމްބަރުން ހިމެނޭ ދާއިރާތަކުގެ ރައީސުންނަކީ އެމެމްބަރުންނެވެ.
ރިއެކްޝަންސް
