އެންމެ ރަނގަޅު އުމްރާ ގްރޫޕްތައް ހޮވާ އެވޯޑް ދެނީ
އެންމެ ރަނގަޅު އުމްރާ ގްރޫޕްތައް ހޮވާ އެވޯޑެއް ދޭން އިސްލާމިކް މިނިސްޓްރީން ނިންމައިފިއެވެ. އެނިންމުން އިއުލާނުކުރެއްވީ މިއަދު އެމިނިސްޓްރީން ފެށި ހައްޖު އުމްރާ ކޮންފަރެންސްގައެވެ.
ރާއްޖޭގައި ފުރަތަމަ ފަހަރަށް ބާއްވާ ހައްޖު, އުމްރާ ކޮންފަރެންސްގައި ވާހަކަ ދައްކަވަމުން އިސްލާމިކް މިނިސްޓަރ ޑރ.މުޙައްމަދު ޝަހީމް އަލީ ސައީދު ވިދާޅުވީ މިއަންނަ އަހަރުން ފެށިގެން ހައްޖާއި އުމްރާގެ ކުންފުނިތަކުގެ ތެރެއިން ކަނޑައެޅޭ އުސޫލެއްގެ ތެރެއިން ޚިދުމަތުގެ ގޮތުން އެންމެ ރަނގަޅު ކުންފުނިތަކަށް އެވޯޑެއް ދެއްވާނެ ކަމަށެވެ. އެގޮތުން ކޮންމެ އަހަރަކު ފަސް ކުންފުންޏަކަށް އެވޯޑް ދޭނެ ކަމަށް ވަޒީރު ވިދާޅުވިއެވެ. އެވޯޑް ދޭނެ އުސޫލުތަކާއި, ބަލާނެ މިންގަނޑުތައް ކަނޑައަޅާނީ މިއަދު ފެށި ކޮންފަރެންސްގެ ތެރެއިން ހިޔާލުތައް ހޮއްދަވައިގެން ކަމަށް ވަޒީރު ވިދާޅުވިއެވެ.
" ތިޔަބޭފުޅުން ދެއްވާ ހިޔާލުފުޅުތަކެއްގެ މައްޗަށް ތިޔަބޭފުޅުންގެ ކަންކަން ނިންމުމުގައި އަޅުގަނޑުމެން ހިސާބު ކިތާބު ބަލާނީ. އަޅުގަނޑުމެންގެ އަމިއްލަ ވިސްނުންތަކެއް މިއަކު ނޯންނާނެ." މިނިސްޓަރ ވިދާޅުވިއެވެ.
ވަޒީރު ވިދާޅުވީ އެވޯޑް ލިބުމަކީ އެޖަމާއަތަކަށް ލިބޭނެ ވަރަށްބޮޑު ބާރެއް އަދި އެޖަމާއަތެއްގެ މާކެޓިންގއަށް ވެސް ލިބޭނެ ބާރެއް ކަމަށެވެ. އެހެންކަމުން މިހާރުން ފެށިގެންވެސް ޚިދުމަތްތައް އިތުރަށް ރަނގަޅު ކުރަން މިނިސްޓަރ އެދިވަޑައިގެންނެވި އެވެ. މިނިސްޓަރ ވިދާޅުވީ އެވޯޑް ދިނުމަކީ ސައުދީ އަރަބިޔާގައިވެސް ކުރާ ކަމެއް ކަމަށެވެ. އެކަމަކު އެއީ އެކި ގައުމުތަކަށް އެޚިދުމަތުގެ ގޮތުން ދޭ އެވޯޑެކެވެ. ރާއްޖޭގައި ތަޢާރަފްކުރަނީ އެތެރޭގެ އެވޯޑެކެވެ.
މީގެއިތުރުން ވަޒީރު ވަނީ ގިނަ މީހުންނަށް އުމްރާއަށް ދެވޭނެ ފުރުޞަތު ތަނަވަސްކޮށްދިނުމަށް އަގުހެޔޮ ޕެކޭޖްތަކެއް ތަޢާރަފްކުރުމަށް ގްރޫޕްތަކުގެ ކިބައިން އެދިވަޑައިގެންފައެވެ. އެގޮތުން މިހާރު ވަކި ދުވަސްވަރެއްގައި އުމްރާއަށް ގެންދާ ގޮތަށް އޮތް އޮތުން ބަދަލުކޮށް, ކޮންމެ ވަގުތެއްގައިވެސް ދެވޭނެ އިންތިޒާމް ހަމަޖެހުން މުހިއްމުކަން ވަޒީރު ފާހަގަކުރެއްވިއެވެ.
ރިއެކްޝަންސް
