ދީބާޖާ އަށް ލިބުނު ގެއްލުމަށްވުރެ ފައިދާ ބޮޑު -އޮޑިޓް ރިޕޯރޓް
އޮޑިޓް ރިޕޯރޓްގައި ބުނެފައިވަނީ އެއްބަސްވުމުގެ މުއްދަތުގައި އެކުންފުންޏަށް ލިބުނު ގެއްލުމަށްވުރެ ފައިދާ ބޮޑުކަމަށް ބަދަލުގެ ގޮތުގައި ދޭން ނިންމީ 64 މިލިއަން ރުފިޔާ. އޭގެތެރެއިން 12 މިލިއަނަށްވުރެ ގިނަ ރުފިޔާ ވަނީ ސެޓަލްމަންޓް އެއްބަސްވުމުގައި ސޮއިކުރުމާއެކު ދޫކޮށްފަ
ދަތުރުފަތުރުގެ ޚިދުމަތް ދިނުމަށް ދީބާޖާ އިންވެސްޓްމަންޓާއެކު އެއްބަސްވުން އޮތް މުއްދަތުގައި އެކުންފުންޏަށް ލިބުނު ގެއްލުމަށްވުރެ ފައިދާ ބޮޑު ކަމަށް އޮޑިޓަރ ޖެނެރަލް ހުސައިން ނިޔާޒީ ވިދާޅުވެއްޖެއެވެ.
ދީބާޖާ އިންވެސްޓްމަންޓަށް ބަދަލު ދިން މައްސަލަ ތަހުގީގުކޮށް ނެރުނު އޮޑިޓް ރިޕޯރޓްގައި ބުނެފައިވަނީ އެއްބަސްވުމުގެ މުއްދަތުގައި އެކުންފުންޏަށް ލިބުނު ގެއްލުމަށްވުރެ ފައިދާ ބޮޑުކަން ފާހަގަކުރެވޭ ކަމަށެވެ. އެއީ އެ އެއްބަސްވުމުގެ ދަށުން ދީބާޖާއަށް ރިސޯރޓް ހިންގަން ދިން ރ.ކުޑަކުރަތު ސަބްލީޒް އެއްބަސްވުމެއްގެ ދަށުން ވިއްކާލައިގެން ފައިދާ ވެފައިވާތީއެވެ. އެރަށް ވިއްކާލައިގެން 65,535,000 ރުފިޔާ އެކުންފުންޏަށް ލިބިފައި ވެއެވެ.
އޮޑިޓް ރިޕޯރޓްގައި ބުނެފައިވަނީ ދަޔުރުފަތުރުގެ ޚިދުމަތް ފޯރުކޮށްދީގެން ދީބާޖާ އިންވެސްޓްމަންޓަށް ލިބުނު ގެއްލުމުގެ އަދަދަށާއި, ކެޕިޓަލް އިންވެސްޓްމަންޓްތަކަށް ކުރާނެކަމަށް ބެލެވޭ ޚަރަދުތަކަށް ބަލާއިރު އެކުންފުންޏަށް ލިބުނު މާލީ ގެއްލުންތަކަށްވުރެ ލިބުނު މާލީ މަންފާ ބޮޑުކަން ފާހަގަކުރެވޭ ކަމަށެވެ.
ކުރީގެ ރައީސް ނަޝީދުގެ ވެރިކަމުގައި 2010 ވަނަ އަހަރު ދަތުރުފަތުގެ ޚިދުމަތްދޭން ދީބާޖާ އިންވެސްޓްމަންޓަށް ހަވާލުކުރި އެއްބަސްވުން ބާތިލްކުރީ ޖެހިގެން އައި ރައީސް ޔާމީނުގެ ވެރިކަމުގައެވެ. އަދި އެއްބަސްވުން ބާތިލްކުރުމުން ގެއްލުމުގެ ބަދަލުދޭން ނިންމާ, ބަދަލުދޭން ފެށީ މިދިޔަ އެމްޑީޕީ ސަރުކާރުގައެވެ. އެއީ ކޯޓް މަރުހަލާގައި އޮތް މައްސަލަ, ކޯޓުން ބޭރުގައި ހައްލުކޮށްގެންނެވެ.
ބަދަލުގެ ގޮތުގައި ދޭން ނިންމީ 64 މިލިއަން ރުފިޔާ އެވެ. އޭގެތެރެއިން 12 މިލިއަނަށްވުރެ ގިނަ ރުފިޔާ ވަނީ ސެޓަލްމަންޓް އެއްބަސްވުމުގައި ސޮއިކުރުމާއެކު ދޫކޮށްފައެވެ. ބާކީ ދޭން އެއްބަސްވުމުގައި އޮތީ ސޮއިކުރި ތާރީޚުން ފެށިގެން 30 ދުވަހުގެ ތެރޭގައެވެ.
އޮޑިޓަރ ޖެނެރަލްގެ ރިޕޯރޓްގައި ފާހަގަކޮށްފައިވަނީ ފެރީ ބަނުމަށް ދީބާޖާއިން އެތެރކުރި ތަކެތީގެ ގެއްލުންވެސް ހިމެނޭ ގޮތަށް ބަދަލު ދިން އިރު އެތެރެކުރި ތަކެއްޗާމެދު އަމަލުކުރި ގޮތެއްވެސް ބަލާފައި ނުވާ ކަމަށެވެ. އަދި ފެރީ ބަނުމަށް ދީބާޖާއިން ހެދި ކޮންޓްރެކްޓްތަކުގެ މައުލޫމާތު ހޯދާ ޚަރަދުކުރިކަން ޔަގީންކޮށްފައިވެސް ނުވާ ކަމަށެވެ.
އޮޑިޓް ރިޕޯރޓްގައި ބުނެފައިވަނީ އެ އެއްބަސްވުން ބާތިލްކުރުމުން ގިނަވެގެން އެކުންފުންޏަށް ލިބޭނީ 48 މިލިއަން ރުފިޔާގެ ގެއްލުމެއް ކަމަށް ބެލެވޭ ކަމަށެވެ. ނަމަވެސް ހަމައެކަނި ރަށް ވިއްކާލައިގެންވެސް ދީމާޖާއަށް 65 މިލިއަން ރުފިޔާ ލިބިފައިވާކަން ފާހަގަކޮށްފައި ވެއެވެ.
އޮޑިޓަރ ޖެނެރަލްގެ ރިޕޯރޓްގައި ވަނީ ދީބާޖާއަށް ދޫކުރި ފައިސާ އަނބުރާ ހޯދުމާއެކު ދޭން ނުޖެހޭ ފައިސާ ދޫކުރަން އެއްބަސްވި ފަރާތްތަކާމެދު ފިޔަވަޅު އަޅަންވެސް ގޮވާލާފައެވެ. ދީބާޖާއާއެކު އެމްޑީޕީގެ އޭރުގެ ސަރުކާރުން އެއްބަސްވީ ނ,ރ,ބ, އަދި ޅ.އަތޮޅު ހިމެނޭ ސަރަހައްދުގައި ދަތުރުފަތުރުގެ ނިޒާމެއް ޤާއިމްކޮށް ހިންގުމަށެވެ.
ރިއެކްޝަންސް
