ރޮޑްރީގޯ އަށް އަނިޔާވެ ސީޒަންގެ ފުރަތަމަ އެލްސިކޯ ގެއްލިއްޖެ, ކޯޓުއާ ވެސް ފެނުން ދުރު
ރެއަލް މެޑްރިޑާއި ބާސެލޯނާގެ ޒަމާންވީ ވާދަވެރި ކުރިމަތިލުން 'އެލް ކްލެސިކޯ' ގައި ފޯވާޑް ރޮޑްރިގޯ ގޮއެސް އަށް އަނިޔާގެ ސަބަބަން ނުކުޅެވޭކަން ޔަގީންވެއްޖެއެވެ. އޭނާއަށް އަނިޔާވެފައިވަނީ އަންގާރަ ދުވަހު ޗެމްޕިއަންސް ލީގުގައި ބޮރޫޝިއާ ޑޯޓްމަންޑާ ދެކޮޅަށް ކުޅުމު މެޗުގައެވެ. ހޮނިހިރު ދުވަހު ރެއާލްގެ ދަނޑުގައި ކުޅޭ އެލް ކްލެސިކޯގައި ގޯލް ކީޕަރު ތިބޮއުޓް ކޯޓުއާވެސް ފެނުން ދުރުކަމަށް މަސްދަރުތަކާ ހަވާލާދީ އީއެސްޕީއެންގައި ރިޕޯޓްކޮށްފައިވެއެވެ. މަސްގަނޑަށް ލިބުނު އަނިޔާއަކާ ގުޅިގެން ސީޒަންގައި މީގެ ކުރިންވެސް ކޯޓުއާ ވަނީ ދެ މެޗަށް ކުޅުމާ ދުރަށްދާންޖެހިފައެވެ.
5-2 ން ރެއާލް މޮޅުވި މެޗުގެ 58 ވަނަ މިނިޓްގައި ރޮޑްރީގޯއަށް އަނިޔާވެ, ވަނީ ދަނޑުން ފައިބާފައެވެ. ފައިގެ ފަލަމަސްގަނޑަށް ލިބުނު އަނިޔާއާ ގުޅިގެން ބްރެޒިލްގެ ފޯވާޑް މިއަދު ވަނީ އިތުރު ޓެސްޓްތަކެއް ހަދާފައެވެ. ނަމަވެސް ލިބިފައިވާ އަނިޔާގެ ބޮޑުކުޑަމިން ވަޒަންކުރެވޭނީ ޓެސްޓު ތަކުގެ ނަތީޖާ ލިބުމުންކަމަށްވެސް އީއެސްޕީއެންއިން ރިޕޯޓްކޮށްފައި ވެއެވެ.
އަންގާރަ ދުވަހު ޑޯޓްމަންޑާ ދެކޮޅަށް ކުޅުނު މެޗުގައި 32 އަހަރުގެ ކޯޓުއާ ވަނީ މެޗު ނިމެންދެން ކުޅެފައެވެ. ނަމަވެސް ބުދަ ދުވަހު ރެއާލް މެޑްރިޑް އިން ނެރުނު ބަޔާނެއްގައި ބެލްޖިއަމްގެ ގޯލްކީފަރަށް އަނިޔާވެފައިވާކަށް ވަނީ ކަށަވަރުކޮށްދީފައެވެ.
ސީޒަންގެ ފުރަތަމަ އެލް ކްލެސިކޯ ސެންޓިއޭގޯ ބާނަބެއު ގައި ފަށާނީ ހޮނިހިރު ދުވަހު ރާއްޖެ ގަޑިން 00:00 ގައެވެ.
ރިއެކްޝަންސް
