އުތުރު ޣައްޒާގެ މަރުގެ ކިއު! ނިމުމެއް ނެތް ކެކުޅުމެއްގައި ޙަޔާތެއް
މިއީ އުތުރު ޣައްޒާގެ ހާލަތު ކިޔައިދޭ ހަމައެންމެ ދެތިން ތަސްވީރެކެވެ. އެކި ގޮތަށް ނެގިފައިއިވާ އެތައް އަހަރެއްވީ ހަމަ އެއް ވާހަކައެކެވެ. ނިމުމެއްގެ ކޮޅުމަތިވެސް ފެންނަންނެތް އަސަރުން ފުރިގެންވާ, އެތައް ޓަނެއްގެ ބަރުދަން ހުރި މަންޒަރުތަކެވެ. ވޭނާއި ކެކުޅުމުގެ އިންތިހާއެވެ. މިއީ ފަލަޞްޠީނުގެ އުތުރު ޣައްޒާ އިން ލިބުނު ދެތިން ފޮޓޯއެވެ. ޣައްޒާގެ ހިތްވަރުގަދަ ނޫސްވެރިޔާ ބިސާން އޮވްދާ ފާއިތުވެ ދިޔަ ތިންދުވަހު ޙިއްސާކޮށްފައިވާ ދެތިން ތަސްވީރު ތިރީގައި އަތުރާލާނަމެވެ. އެއް ތަސްވީރުން ޙަޤީގަތް ތިލަނުވާނަމަ އެއަށްވުރެ ތިރިއަށް ސްކްރޯލް ކޮށްލާށެވެ.
އުތުރު ޣައްޒާގެ ޖަބާލިއާ ރެފިއުޖީ ކޭމްޕްގައި ދަމާލާފައި އެވަނީ މަރުގެ ކިއު އެކެވެ. އާނ އެކެވެ. ތި ކިޔުނީ ހަމަ ރަނގަޅަށެވެ. އެއީ "ޑެތް ކިއު" އެވެ. ބައެއް ފޮޓޯތަކުގައި ހަމައެކަނި އަންހެނުންނާއި ކުޑަކުދިން އަތުރާލާފައި ތިބިތަން ފެންނާނެއެވެ. އަނެއްބައި ފޮޓޯގައި ވާގޮތުން އެއީ ހުސް ފިރިހެނުންނެވެ. މުސްކުޅިއެއް ކުޑަކުއްޖެއް ބެލުމެއްނެތި އާއިލާތަކާ ވަކިކޮށްލާ އެމީހުން ގެންގޮސްފައިވަނީ މުޅިން ވަކިން އެހެންތާކަށެވެ. އަދި އަންހެނުންނާއި ކުޑަކުދިންނަށް އަމުރު ކޮށްފައިވަނީ އެތަން ދޫކޮށްދާށެވެ. ބައެއް މީހުންގެ އަތްތައް ބަނދެ ލޮލުގައި ކަނުބަނދެފައިވެސް ތިއްބެވެ. އެމީހުންނަށް ދެންހަދާ ގޮތަކީ މުޅި ދުނިޔެއަށް އެނގޭ ވާހަކައެކެވެ. ނޭނގެނީ އެންމެ ކަމަކެވެ. އެމީހުން ވަޅުލަނީ ދިރިތިއްބާ ކަމެއް, ނުވަތަ މަރާލާފައިކަމެވެ. އެންމެން އެއްވަޅަކަށް އަޅާލާ ވަޅުލަނީ ކަމެވެ. މެދުތެރޭ ޚާން ޔޫނުސްގައިވެސް މި ހިނގަމުންދާ އަހަރު ކަންތައްކުރި ބީދައިންނެވެ.ފާއިތުވެ ދިޔަ އަހަރުގެ ތެރޭގައިވެސް ޣައްޒާއިން މާސިންގާ ކަށްވަޅުތައް ފެނިފައި ވެއެވެ. ބައެއް މީހުންގެ ހަށިގަނޑުގެ ގުނަވަންތައް ނަގާ, ހަށިތަކަށް އެތައް އަނިޔާއެއްކޮށް, ރޭޕްކޮށްފައިވެއެވެ.
އަންހެނުންނަށް އޮތީ އެހެން ހުކުމެކެވެ. އެމީހުންގެ ފިރިންނާއި, ބަފައިން އަދި ކުދިންގެ ބައްޕައިންނަށް ވެދާނެ ގޮތެއް ބެލުމުގެ ޙައްގެ ނުދެއެވެ. އެސަރަޙައްދު ދޫކޮށްދާން އިންކާރު ކުރި މީހެއްގެ ހުކުމަކީ މަރެވެ. އިޒްރާއިލްއިން ދަނީ ޙީލަތްތެރި ރޭވުމެއްގެ ދަށުން މުޅި އުތުރު ޣައްޒާގެ އާބާދީ ހުސްކުރަމުންނެވެ. ޖަބާލިއާ އަދި ހަމަދު ސްކޫލްގައި 'ހިމާޔަތް' ހޯދައިގެން ތިބި އެތައް އަންހެނުންނެއް އެމިހުންގެ ދަރިންނާއި ފިރިންނާ ވަކިކޮށް އެތަނުން ނިކުތުމަށް ވަނީ މަޖުބޫރުކޮށްފައެވެ. ނަމަވެސް އެމީހުންގެ ކުރިމަތީގައިވެސް ފަހަތުގައިވެސް އޮތީ މަރެވެ. އޮކްޓޯބަރު 1 ގެ ފަހުން އުތުރު ޣައްޒާއަށް އިންސާނީ އެހީގެ އެންމެ މިންވަރެއްވެސް ލިބިފައިނުވެއެވެ. މުޅި އުތުރުން ފެނާއި, ކަރަންޓް އަދި މުވާސަލާތީ ޚިދުމަތް ވަނީ ކަނޑާލާ, ދުނިޔެއާ ގުޅުން ކަނޑާލާފައެވެ. ކާއެއްޗެއް ނުލިބި ހައިހޫނުކަމުގައި މަރުވަމުންދާ މީހުންގެ އަދަދެއް އެނގޭކަށް ނެތެވެ. އެނގޭހާވެސް އެއްޗަކީ 22 ދުވަސް ކާއެއްޗެއްނުލިބި ދިރި ތިބުމަކީ މުސްތަޙީލު ކަމެއް ކަމެވެ.
ސްކޫލްތަކާއި ހޮސްޕިޓަލްތަކުން މީހުން ހުސްކުރުމަށްފަހު އިޒްރާއިލްގެ ސިފައިންވަނި އެތަންތަނުގައި ރޯކޮށް އަންދާލާފައެވެ. އެއީ ޣައްޒާގެ ރައްޔިތުނަށް އެތަންތަނުން ލިބެމުންއައި ބޯހިޔާވަހިކަން ނެތިކޮށްލުމަށެވެ.
ނިންމާލަމުން ތޯރާ ޖުޑައިޒަމްގެ އެކްސް އެކައުންޓުން ހިއްސާކޮށްފައިވާ ތަސްވީރާއެކު ލިޔެފައިވާ ލިޔުންކޮޅު ހިއްސާކޮށްލާނަމަވެ.
"ޣައްޒާ އަކީ މިއަދުގެ އަޝްވިޒް އެވެ.
އެމީހުން އެއްއިރެއްގައި އެކަމަށް ނަފްތަރުކުރި ކަންކަން ފެންނަ ފުށެވެ.
ޒަޔަނިޒަމް އަކީ ނާޒިޒަމް އެވެ.
ޒަޔަނިސްޓުންނަނީ މިއަދުގެ ނާޒީންނެވެ.
ޒަޔަނިސްޓް ދައުލަތަކީ މިއަދުގެ ނާޒީ ދައުލަތެވެ.
އިޒްރާއިލް އާއި ނާޒީންގެ އެއްވެސް ތަފާތެއް ނެތެވެ. އެއްޒަމާނެއްގައި ނާޒީން, ޔަހޫދީންނަށް މަޖުބޫރުކޮށް އެމީހުންގެ ގެދޮރުން ނެރެލިއެވެ. މިއަދު އިޒްރާއިލްއިން ވެސް އެކުރަނީ ހަމަ އެއްކަމެކެވެ. ފަލަޞްޠީނުގެ އެތައްހާސް ރައްޔިތުންނެއް އެމީހުންގެ ގެދޮރުން ނިކުންނަށް މަޖުބޫރު ކުރަނީއެވެ"
ނޯޓް: އަޝްވިޒް އަކީ ހިޓްލަރު ޔަހޫދީންގެ ނަސްލު ނައްތާލުމަށް ހިންގި އުދުވާނުގައި ދެކުނު ޕޮލަންޑްގައި ޔަހޫދީން އިންސާނިއްޔަތާ ޚިލާފަށް ބަންދުކޮށްގެން ގެންގުޅުނު ކޮންސަންޓްރޭޝަން ކޭމްޕްތަކެވެ. ދެކުނު ޕޮލަންޑްއަކީ ދެވަނަ ބޮޑު ހަނގުރާމައިގެ ދުވަސްވަރު ހިޓްލަރުގެ ބާރުގެ ދަށުގައި ޖަރުމަނާއި އިންވެގެން އޮތް, އޭރު ޖަރުމަނުގެ ބައެއްގެ ގޮތުގައި އޮތް ސަރަޙައްދެކެވެ. ނާޒިޒަމް އަކީ ހިޓްލަރުގެ ނާޒީ ސިޔާސީ ޕާޓީގެ ސިޔާސީ ފިކުރަށް ކިޔާ ނަމަކެވެ. ނާޒީންނަކީ ހިޓްލަރުގެ ޖަމާއަތުގެ, އޭނާގެ ވަފާތެރީންނެވެ.
ރިއެކްޝަންސް
