ވިޔަފާރީގެ ހަބަކަށް ފުނަދޫ ބަދަލުކޮށް މާލެ ސަރަހައްދުގެ މަލަމަތި ބަދަލުކޮށްލަނީ
ފުނަދޫގައި ބައިނަލްއަގުވާމީ ވިޔަފާރީގެ މައިހަބަކަށް ހެދުމަށް ސަރުކާރުން ނިންމައިފި
ފުނަދޫ ހުސްކުރުމަށްފަހު އެތަން ސްޕެޝަލް އިކޮނޮމިކް ޒޯނަކަށް ހަދައި އެރަށުގައި ބައިނަލްއަގުވާމީ ފައިނޭންޝަލް ސެންޓަރެއް ހެދުމަށް ނިންމައިފިއެވެ.
ފުނަދޫ އަކީ ސަރުކާރުގެ އެންމެ ބޮޑު އެއް ކުންފުނި، އެސްޓީއޯ އިން ތެޔޮ ރައްކާކުރުމަށް މިވަގުތު ބޭނުންކުރާ ރަށެކެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެލާނާ އިންޓަރނޭޝަންލް އެއަރޕޯޓު ތަރައްޤީކުރުމުގެ ބިޔަ މަޝްރޫޢުއާއި ސްޕެޝަން އިކޮނޮމިކް ޒޯން ތަރައްޤީކުރުން ފެށުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ވިދާޅުވީ މާލެ އަތޮޅު ފުނަދޫގައި ހުރި ތެޔޮ ރައްކާކުރާ ނިޒާމު އެހެންތަނަކަށް ބަދަލުކޮށް، އެރަށުގައި އިޤްތިޞާދީ ޚާއްޞަ ސަރަޙައްދެއް ތަރައްޤީކޮށް ބައިނަލްއަގުވާމީ މާލީ މަރުކަޒެއް ޤާއިމްކުރައްވާނެކަމުގައެވެ.
ފުނަދޫގައި ހުރި ތެޔޮ ރައްކާކުރާ ސްޓޯރޭޖު އެހެންތަނަކަށް ބަދަލުކުރުމުގެ މަސައްކަތް މިއަހަރުގެ ތެރޭގައި ފަށްޓަވާނެކަމަށާއި މި މަސައްކަތް ގިނަވެގެން 18 މަހާއި 24 މަސްދުވަހުގެތެރޭގައި ނިންމާލެވޭނެކަމަށް ރައީސް ވިދާޅުވިއެވެ.
ރައިސް ވިދާޅުވީ ފުނަދޫގައި ބައިނަލްއަގުވާމީ ފައިނޭންޝަލް ސެންޓަރެއް ހަދާއިރު ފުނަދޫއާއި މާލެ އަދި ފުނަދޫއާއި ހުޅުލެ ބްރިޖަކުން ގުޅާލައި މި ސަރަހައްދުގައި މޮނޮރެއިލްގައި ދަތުރުކުރެވޭނެ ގޮތްތަކެއް ހަމަޖައްސާނެ ކަމަށެވެ.
ރައީސް ވިދާޅުވީ ބައިނަލްއަޤްވާމީ މާލީ މަރުކަޒެއް ޤާއިމްކުރުމަށް ބޭނުންވާ ކުންފުނި ހެދުމުގެ މަޝްވަރާ އަންނަ އާދިއްތަ ދުވަހު ކެބިނެޓުގައި ފަށްޓަވާނެކަމަށެވެ.
"އިރާދަކުރެއްވިޔާ މި އަންނަ އާދީއްތަ ދުވަހު އޮންނަ ކެބިނެޓް ބައްދަލުވުމުގައި މަޝްވަރާކޮށް ނިންމޭނެ ކަމަށް މޯލްޑިވްސް އިންޓަނޭޝަނަލް ފައިނޭންޝަލް ސާވިސާސް އޮތޯރިޓީގެ ނަމުގައި އާ އޮތޯރިޓީއެއް އެސްޓެބްލިޝް ކުރަން،" ރައީސް ވިދާޅުވި އެވެ.
މާލޭގެ ވިޔަފާރި ބަނދަރު ތިލަފުށްޓަށް ބަދަލުކޮށް ބައިނަލްއަގްވާމީ ފެންވަރުގެ ވިޔަފާރި ބަނދަރެއް ތިލަފުށީގައި ގާއިމުކުރުމުގެ މަސައްކަތް ވަރަށް އަވަހަށް ފެށުމަށް މަސައްކަތް ކުރައްވަމުން ގެންދަވާ ކަމަށްވެސް ރައީސް ވިދާޅުވި އެވެ. ނިމިދިޔަ ސަރުކާރުގައި މިބަނދަރު ތަރައްގީކުރަން ނިންމާފައި އޮތީ ގުޅިފަޅު ގައެވެ.
މާލެ ސަރަހައްދުގައި މިހާރު ހިއްކަމުންދާ ބިންތަކުން ގެދޮރު ދިނުމަށްފަހު ސަރުކާރުން ހަދަން ނިންމާފައިވާ މޯލްޑިވްސް އިންޑަސްޓްރިއަލް ފްރީ ޒޯން ކޮމްޕެނީއަށް ބިން ދޭނެ ކަމަށްވެސް ރައިސް ވިދާޅުުވިއެވެ.
އަދި އެ ސަރަހައްދު ވެގެންދާނީ އެސްއީ ޒޯނަކަށް ކަމުގައި ވިދާޅުވި އެވެ.
އެސްއީ ޒޯނަކީ އާންމު ވިޔާފަރި ސަރަހައްދުތަކާ ހިލާފަށް ބައެއް ހާއްސަ އިނާޔަތްތައް ހަމަޖެހިފައި ހުންނަ ތަންތަނެވެ. އެސްއީޒެޑްގެ ގާނޫނެއް ފާސްކުރިތާ 9 އަހަރުވީ ނަމަވެސް މިހާތަނަށް ރާއްޖޭގައި އެސްއީ ޒޯންތަކެއް ހަދާކަށް އިއުލާންކޮށްފައެއްނުވެއެވެ.
ރިއެކްޝަންސް
