އިލެކްޝަން ކޮމިޝަނަށް ހަސީބު އަދި އިންޑިޔާއަށް ކަނޑައަޅުއްވާ ސަފީރަކަށް އަޒީމާ އައްޔަން ކުރަނީ
އިލެކްޝަން ކޮމިޝަނުގެ މެމްބަރު ކަމަށް އަބްދުލް ހަސީބު އިބްރާހީމް އަދި އިންޑިޔާއަށް ކަނޑައަޅުއްވާ ސަފީރަކަށް އާއިޝަތު އަޒީމާ އައްޔަން ކުރަން މަޖިލިހުގެ ރުހުން ހޯއްދެވުމަށް ރައީސުލްޖުމްހޫރިއްޔާ ފޮނުއްވައިފި އެވެ.
މިދައުރަށް ރައްޔިތުންގެ މަޖިލިހުގެ ޖަލްސާތައް ފެށި ޖަލްސާގައި މަޖިލިހުގެ ރިޔާސަތުން ވަނީ އެދެބޭފުޅުން މަގާމަށް އައްޔަންކުރެއްވުމާމެދު ރުހުން ހޯއްދެވުމަށް ރައީސުލްޖުމްހޫރިއްޔާ ފޮނުއްވި ސިޓީ އިއްވާފައެވެ. އަބްދުލް ހަސީބް އިބްރާހީމް އަކީ މިދިޔަ ސަރުކާރުގައި އިސްލާމިކް މިނިސްޓަރީގެ ޕާމަނަންޓް ސެކެޓްރީގެ މަގާމް އަދާކުރައްވާފައިވާ ބޭފުޅެކެވެ. އިލެކްޝަން ކޮމިޝަންގެ މެމްބަރު ކަމަށް ކުރިމަތިލެއްވުމަށް ހުޅުވާލެއްވުމުން ކުރިމަތިލެއްވި ބޭފުޅުންގެ ތެރެއިން ރައީސް މަޖިލިހަށް ފޮނުއްވީ ހަސީބުގެ ނަން އެކަންޏެވެ.
އިލެކްޝަން ކޮމިޝަނަށް މެމްބަރަކު އައްޔަން ކުރަނީ އެކޮމިޝަންގެ ރައީސް ފުއާދު ތައުފީގުގެ ދައުރު ހަމަވާތީއެވެ. ފުއާދުގެ ދައުރު ހަމަވަނީ ނޮވެމްބަރު މަހުގެ 24 އަށެވެ.
ރާއްޖެއިން އިންޑިޔާއަށް އާ ސަފީރެއް ކަނޑައަޅަނީ މިހާރު ހުންނެވި އިބްރާހީމް ޝަހީބުގެ ދައުރު ހަމަވާތީ އެވެ. ޝަހީބު އެމަގާމަށް އައްޔަން ކުރެއްވީވެސް މިދިޔަ ސަރުކާރުގައެވެ. އެމަގާމަށް އައްޔަން ކުރެއްވުމަށް މަޖިލިހުގެ ރުހުން ހޯދަން ފޮނުއްވީ ފޮރިންގ މިނިސްޓްރީގެ އެޑިޝަނަލް ސެކެޓްރީގެ މަގާމްގައި ހުންނެވި އަޒީމާގެ ނަމެވެ. އަޒީމާ ވަނީ މީގެކުރިން ޗައިނާގައި ހުންނަވާ ސަފީރުގެ މަގާމް އަދާކުރައްވާފައެވެ.
ރިއެކްޝަންސް
