ދެމެހެއްޓެނިވި, ވަށާޖެހޭ ގޮތެއްގައި ކުނި މެނޭޖް ކުރުމުގެ ނިޒާމެއް ޤާއިމް ކުރާނަން- މިނިސްޓަރ

ދެމެހެއްޓެނިވި, ވަށާޖެހޭ ގޮތެއްގައި ކުނި މެނޭޖް ކުރުމުގެ ނިޒާމެއް ޤާއިމް ކުރައްވާނެކަމަށް މޫސުމީ ބަދަލުތަކާއި, ތިމާވެއްޓާ ހަކަތައާ ބެހޭ ވަޒީރު ތާރިޤް އިބްރާހީމް ވިދާޅުވެއްޖެ އެވެ. ވަޒީރު މިފަދައިން ވިދާޅުވީ ހުޅުމާލޭގައި ވޭސްޓް ޓްރާންސްފަރ ސްޓޭޝަނެއް ޤާއިމް ކުރުމަށް ބޭނުންވާ ބިން ހަމަޖެއްސުމަށް އެއްބަސްވުމުގައި ސޮއިކުރެއްވުމަށްފަހު އެވެ.

މިނިސްޓަރ ތާރިޤު ވިދާޅުވީ ރާއްޖޭގެ ހުރިހާ ރަށެއްގައިވެސް ވަށާޖެހޭ ގޮތަށް ވޭސްޓް މެނޭޖްމަންޓްގެ މަސައްކަތް ކުރެވި, ކޮންމެ ރަށެއްގައިވެސް އެރަށެއްގެ ކުނި މެނޭޖްކުރަން ބޭނުންވާ ހުރިހާ ވަސީލްތަކެއް އެރަށަކަށް ފޯރުކޮށްދެއްވާނެ ކަމަށެވެ. އެމަސައްކަތް ކުރިއަށް ގެންދަވާނީ ' މަގޭސާފް ރާއްޖޭ' ގެ ނަމުގައި މިހާރު ފަށާފައިވާ ކުނި މެނޭޖްކުރުމުގެ މަޝްރޫއުގެ ތެރެއިން ކަމަށް މިނިސްޓަރ ވިދާޅުވިއެވެ. އެމަސައްކަތް މިހާރު ފެށިފައިވާ ކަމަށް ވަޒީރު ވިދާޅުވިއެވެ. " އެހެންވީމަ އިރާދަކުރެއްވިއްޔާ އަޅުގަނޑުމެން މިމަސައްކަތް ނިންމާލާއިރު ރާއްޖޭގެ ހުރިހާ ރަށެއްގެ ހުރިހާ ސަރަހައްދެއްގައި ވަށާޖެހޭ ގޮތެއްގައި ކުނި މެނޭޖްކުރުމުގެ މަޝްރޫއުތައް ކުރިއަށް ދާނެ. އަދި ދެމެހެއްޓެނުވި ގޮތެއްގައި މިކަން ކުރެވިގެންދާނެ" މިނިސްޓަރ ވިދާޅުވިއެވެ. 

ހުޅުމާލޭގައި ގާއިމް ކުރާ ވޭސްޓް ޓްރާންސްފަރ ސްޓޭޝަނާ ގުޅޭ ގޮތުން ވިދާޅުވީ ޑިޒައިންގެ މަސައްކަތްނިމި،  ވޭސްޓް ޓްރާންސްފަރ ސްޓޭޝަނެއްގެ އަމަލީ މަސައްކަތް ފަށާތާ 18 މަސް ދުވަސްގެ ތެރޭގައި ތަނުގެ މަސައްކަތް ނިންމާލެވޭނެކަމަށް ލަފާކުރެއްވޭ ކަމަށެވެ. މިދިޔަ ދައުރުގެ ތެރޭގައި ހުޅުމާލޭގެ ކުނި މެނޭޖްކުރަން ސަމާލުކަން ދީފައި ނުވާކަމަށް ވަޒީރު ވިދާޅުވިއެވެ.

Advertisement