ހަމަހަމަ ތައުލީމެއް ފޯރުކޮށްދިނުމަކީ މުހިންމު ކަމެއް: މެޑަމް ސާޖިދާ

ހަމަހަމަ ތައުލީމެއް ފޯރުކޮށްދިނުމަކީ މުހިންމު ކަމެއް ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

މެޑަމް ސާޖިދާ މިހެން ވިދާޅުވީ 7 ވަނަ ޓީޗާސް ކޮންފަރެންސް ހުޅުވުމުގެ ރަސްމިއްޔާތު ޝަރަފްވެރި ކޮށްދެއްވައި ވާހަކަފުޅު ދައްކަވަމުންނެވެ.

އުނގަންނައިދީ، ބާރުވެރިކޮށް، މަތިވެރިކުރުން: 21 ވަނަ ޤަރުނުގެ ތަޢުލީމީލީމީ ތަރައްޤީއަށް ހަމަހަމަ ތަޢުލީމު" މި ޝިޢާރުގެ ދަށުން ބާއްވާ މި ކޮންފަރެންސްގައި ރާއްޖޭގެ އެކި ކަންކޮޅުތަކުން ތަޢުލީމީ ދާއިރާގެ މާހިރުންނާއި، ސިޔާސަތު އެކުލަވާލާ ފަރާތްތަކާއި، އަދި މި ދާއިރާއާ ގުޅުންހުރި އެހެނިހެން ފަރާތްތައް ބައިވެރިވިއެވެ.

ރައީސުލްޖުމްހޫރިއްޔާގެ އަނބިކަނބަލުންގެ ވާހަކަފުޅުގައި އެކަމަނާ ވަނީ ކޮންމެ ދަރިވަރުންގެ ޙާލަތު ނުވަތަ ވަށައިގެންވާ މާޙައުލަކަށް ބެލުމުގެ ބަދަލުގައި ހުރިހާ ކުދިންނަށްވެސް ތަޢުލީމު ފޯރުކޮށްދިނުމުގެ މުހިންމުކަން ފާހަގަކުރެއްވިއެވެ.

Advertisement

"ތަޢުލީމީ ދާއިރާގައި ހަމަހަމަކަން އެކުލެވިގެންވުން ޔަޤީންކުރުމަކީ އަޅުގަނޑުމެންގެ މަގު އަލިކޮށްދޭ އަލިކަމެއް" ކަމަށް މެޑަމް ސާޖިދާ ވިދާޅުވިއެވެ.

އަދި މި އިލްތިޒާމުގެ ތާރީޚީ އަސްލުތައް ދިވެހިރާއްޖޭގައި އޮތްކަންވެސް ފާހަގަކުރެއްވިއެވެ.

މުދައްރިސުންގެ ދުޅަހެޔޮކަން އިތުރުކުރުމަށް ސަރުކާރުން ފަހަކަށްއައިސް ވެފައިވާ ވަޢުދުތަކަކީ މި ތަޤްރީރުގެ މައިގަނޑު އެއް ބައެވެ.

އެގޮތުން ސްކޫލުގައި މަސައްކަތްކުރާ ގަޑިތައް މަދުކުރުމާއި، މުދައްރިސުންގެ އިދާރީ މަސައްކަތްތައް މަދުކުރުން ހިމެނެއެވެ.

މިކަންކަމުގެ މަޤްޞަދަކީ މުދައްރިސުންނަށް އުނގަންނައިދިނުމުގެ މައިގަނޑު މަސައްކަތަށް އިތުރަށް ފޯކަސްކުރެވޭނެ މަގު ތަނަވަސްކޮށްދިނުމެވެ.

މީގެ އިތުރުން، މުދައްރިސުންނަށް ދެމެހެއްޓެނިވި ގޮތެއްގައި ޕްރޮފެޝަނަލް ތަރައްޤީ ހޯދައިދިނުމުގެ މުހިންމުކަން ފަސްޓް ލޭޑީ ފާހަގަކުރެއްވިއެވެ.

މީގެ ތެރޭގައި ވަރކްޝޮޕްތަކާއި، ރިފްރެޝަރ ޕްރޮގްރާމްތަކާއި، ނަފްސާނީ ދުޅަހެޔޮކަމަށް އެހީތެރިވެދޭ ޕްރޮގްރާމްތައް ހިމެނެއެވެ.

ދިވެހިރާއްޖޭގެ ތަޢުލީމީ ނިޒާމަށް ކުރިމަތިވެފައިވާ ހުރަސްތަކާއި ގޮންޖެހުންތައް، ޚާއްޞަކޮށް ރަށްފުށުގެ މުޖުތަމަޢުތަކުގައި ހުރި ދަތިތައް ފާހަގަކުރައްވައި، މި ކަންކަން ޙައްލުކުރުމަށް އެއްބާރުލުމާއެކު އައު ގޮތްތަކެއް ހޯދުމަށް ފަސްޓް ލޭޑީ ގޮވާލެއްވިއެވެ.

އަދި ޖިއޮގްރަފިކަލް ހުރަސްތައް ފަހަނައަޅައި، ތަޢުލީމު ފޯރުކޮށްދިނުމާއި، އުނގަންނައިދިނުމުގެ ގޮތްތަކާއި، ފުރުޞަތުތައް އިތުރުކުރުމުގައި ޓެކްނޮލޮޖީގެ ދައުރުގެ މުހިންމުކަން ފާހަގަކުރެއްވިއެވެ.

މެޑަމް ސާޖިދާ ވަނީ ރަށްރަށުގެ މުޖުތަމަޢުތަކުގައި މަސައްކަތްކުރައްވާ މުދައްރިސުން އެ ބޭފުޅުންގެ ދައުރު އޮތީ ހަމައެކަނި ކިޔަވައިދިނުމުގެ ދާއިރާއަށް ނުވަތަ ތަޢުލީމީ ދާއިރާއަށް އެކަނި ނޫންކަމާއި، އެ ބޭފުޅުންނަކީ މުޖުތަމަޢުގެ ލީޑަރުން ނުވަތަ މަގުދައްކާ ބޭފުޅުންކަން ފާހަގަކޮށް އެފަރާތްތަކަށް ތަޢުރީފުކުރެއްވިއެވެ.

މިއަދުގެ ރަސްމިއްޔާތުގައި ފަސްޓް ލޭޑީއަށް މިނިސްޓަރ އޮފް އެޑިޔުކޭޝަން ޑރ. އިސްމާޢީލް ޝަފީޢު ހަނދާނީ ފިލައެއް އަރުވާފައެވެ.

މި ކޮންފަރެންސްއަކީ ދިވެހިރާއްޖެއަށް ކުރިމަތިވެފައިވާ ޚާއްޞަ ގޮންޖެހުންތަކަށް އަމާޒުކޮށް، ހުރިހާ އެންމެންނަށް ހަމަހަމަ އަދި ފުރުޞަތު ލިބޭ ތަޢުލީމީ ނިޒާމެއް ޤާއިމުކުރުމަށް ދިވެހިރާއްޖެއިން ކުރަމުންދާ މަސައްކަތުގައި އެޅުނު މުހިންމު ފިޔަވަޅެކެވެ.