"ގަވާއިދާ ހިލާފަށް އުޅޭ ބިދޭސީއަކު ތިޔަބޭފުޅުންގެ ޒިންމާގެ ދަށުގައި ނުބަހައްޓާ"- އިމިގްރޭޝަން ކޮންޓްރޯލަރ
ގަވާއިދާ ހިލާފަށް އުޅޭ ބިދޭސީއަކު ޒިންމާގެ ދަށުގައި ނުބަހައްޓަން އިމިގްރޭޝަން ކޮންޓްރޯލަރ މުޙައްމަދު ޝަމްއާން ވަހީދު އިލްތިމާސް ކުރައްވައިފިއެވެ.
ގަވާއިދާ ހިލާފަށް ވިޔަފާރިކޮށް، ސައްހަ ވިސާއެއް ނެތި އުޅެމުންދާ ބިދޭސީން ބަލައި ފާސްކުރުމަށް އިއްޔެ ހުޅުމާލޭގައި ހިންގި މާސް އިންސްޕެކްޝަންގައި އަމަލީގޮތުން ބައިވެރިވެވަޑައިގެން, ހަރަކާތުގެ ތެރެއިން މީޑިޔާއާ ވާހަކަ ދައްކަވަމުން ކޮންޓްރޯލަރ ޖެނެރަލް އޮފް އިމިގްރޭޝަން އިލްތިމާސް ކުރެއްވީ ޒިންމާގެ ދަށުގައި ގަވާއިދާ ހިލާފަށް ހުރި ބިދޭސީއެއް ހުރި ނަމަވެސް ގަވާއިދުގެ ތެރެއަށް ވެއްދުމަށެވެ. އިމިގްރޭޝަން ކޮންޓްރޯލަރ ވިދާޅުވީ އެންމެ ބޮޑު ކަންބޮޑުވުމަކީ
ގަވާއިދާ ހިލާފަށް އުޅޭ ފަރާތްތަކަށް ބައެއް ދިވެހި ރައްޔިތުން ދޭ އެއްބާރުލުން ކަމަށެވެ.
" އޭގެ ބަދަލުގައި އަޅުގަނޑުގެ ހަމަ އިލްތިމާސްއެއް ގަވާއިދާ ހިލާފަށް އުޅޭ ފަރާތެއް ވެއްޖިއްޔާ އެކަހެރި ކުރާށޭ, އެފަރާތްތައް ތިޔަބޭފުޅުންގެ ޒިންމާގެ ދަށުގައި ނުގެންގުޅުއްވާށޭ, އެހެނެއް ނޫން މިފަދަ ފަރާތްތައް ޒިންމާގެ ދަށުގައި ތިބި ނަމަ ގަވާއިދުގެ ތެރެއަށް ވައްދަވާ." ޝަމްއާން ވިދާޅުވިއެވެ.
ކޮންޓްރޯލަރ ވިދާޅުވީ ގަވާއިދާ ހިލާފަށް އުޅޭ ބިދޭސީން ގެންގުޅެ, އެފަދަ ބިދޭސީންނަށް އެއްބާރުލުން ދޭ ފަރާތްތަކާމެދު މިހާރުވެސް ފިޔަވަޅު އަޅުއްވާ ކަމަށެވެ. އެފަދަ ފަރާތްތައް ޖޫރިމަނާ ކުރެވޭނެކަން ތަކުރާރުކުރައްވާ ވިދާޅުވީ އެއީ އެދިވަޑައިގަންނަވާ ގޮތް ނޫން ކަމަށެވެ. މަސައްކަތަށް ބޭނުންވާ ބިދޭސީންގެ ޑިމާންޑް އެބައޮތްކަން ފާހަގަކުރައްވާ ކޮންޓްރޯލަރ އިލްތިމާސްކުރެއްވީ ގަވާއިދާ އެއްގޮތަށް ބިދޭސީން ގެންގުޅުމަށެވެ.
ގަވާއިދާ ހިލާފަށް އުޅޭ ބިދޭސީން ހޯދުމަށް, ޚާއްޞަކޮށް ގަވާއިދާ ހިލާފަށް ވިޔަފާރި ކުރާ ބިދޭސީން ހޯދުމަށް އިމިގްރޭޝަނުން ކުރިއަށް ގެންދާ އޮޕަރޭޝަނަށް ގިނަބަޔަކު ދަނީ ތައުރީފް ކުރަމުންނެވެ. އިމިގްރޭޝަނުން ބުނީ ބިދޭސީންގެ މައްސަލަ ތިން އަހަރުގެ ތެރޭގައި ހައްލު ކުރެވޭނެ ކަމަށެވެ. އެއޮޕަރޭޝަން އަތޮޅުތެރެއަށް ފުޅާކުރަން އިމިގްރޭޝަނުން ދަނީ މަސައްކަތް ކުރަމުންނެވެ.
ރިއެކްޝަންސް
