އުޅަނދުފަހަރުގެ ފީތަކުން ލިބޭ ފައިސާ ބޭނުންކުރާނީ ޓްރެފިކް މައްސަލަތައް ހައްލުކުރަން: ބަންޑާރަނައިބު

އެއްގަމު އުޅަނދުފަހަރާ ގުޅިގެން ނަގާ އެކި ފީތަކުން ދައުލަތަށް ލިބޭ ފައިސާ، ކުރިއަށް އޮތް ތަނުގައި ބޭނުންކުރެވޭނީ ހަމައެކަނި މަގުތަކުގެ ޓްރެފިކް މައްސަލަތައް ހައްލުކުރުމަށް ކަމަށް ބަންޑާރަނައިބު އަޙްމަދު އުޝާމް ވިދާޅުވެއްޖެއެވެ.

ބަންޑާރަނައިބު މިހެން ވިދާޅުވީ، ސަރުކާރުގެ ވުޒާރާތަކުން ކުރަމުންދާ މަސައްކަތްތަކާ ގުޅޭ މައުލޫމާތު ރައްޔިތުންނާ ހިއްސާކޮށް، ސުވާލުކުރުމަށް ފުރުސަތު ދިނުމަށް ބޭއްވި "އަހާ" ފޯރަމުގައި ވާހަކަދައްކަވަމުންނެވެ. އެ ފޯރަމުގައި، ކުރިން ކައުންސިލުތަކަށް ޖަމާކުރަމުން އައި ފީތަކެއް ކައުންސިލުތަކަށް ނުލިބޭ ގޮތަށް ގާނޫނަށް ގެނައި ބަދަލާ ގުޅޭ ގޮތުން އާންމު ރައްޔިތަކު ކުރި ސުވާލަކަށް ޖަވާބުދެއްވަމުން އުޝާމް ވަނީ އެ ބަދަލު ގެންނަން ޖެހުނު ސަބަބު ތަފުސީލުކޮށްދެއްވާފައެވެ.

އުޝާމް ވިދާޅުވީ، ކުރިން އަމަލުކުރަމުން އައި އެއްގަމު ދަތުރުފަތުރާ ބެހޭ ގާނޫނުގައި ގިނަ މައްސަލަތަކެއް ހުރުމުން، މަގުމަތީގެ ރައްކާތެރިކަން ކަށަވަރުކުރުމަށްޓަކައި މުޅިން އައު ގާނޫނެއް އެކުލަވައިލަން ޖެހުނު ކަމަށާއި، މިހާރު އެ ގާނޫނު އެކުލަވާލައި އަމަލުކުރަން ފަށާފައިވާ ކަމަށެވެ.

ޚާއްޞަކޮށް މާލޭގައި ދިރިއުޅޭ ރައްޔިތުންގެ އެންމެ ބޮޑު އެއް ކަންބޮޑުވުމަކީ މަގުމަތީގެ ރައްކާތެރިކަމާ ގުޅުންހުރި މައްސަލަތައްކަން ފާހަގަކުރައްވަމުން އުޝާމް ވިދާޅުވީ، އެ މައްސަލަތައް ހައްލުކުރުމަށް މީގެ ކުރިން އެކަށީގެންވާ މަސައްކަތްތަކެއް ކުރެވިފައިވާ ކަމަށް ރައްޔިތުން ގަބޫލުނުކުރާ ކަމަށެވެ. އެހެންކަމުން، އައު ގާނޫނުގެ ދަށުން އެކުލަވާލެވޭ ރޯޑް ސޭފްޓީ ކައުންސިލްގެ ޒަރީއާއިން މި މައްސަލަތަކަށް ދާއިމީ ހައްލެއް ހޯދުމުގެ މަސައްކަތް ކުރިއަށްދާނެ ކަމަށް ވިދާޅުވިއެވެ.

ބަންޑާރަނައިބު އިތުރަށް ވިދާޅުވީ، ސަރުކާރުގެ ސިޔާސަތަކީ އެއްގަމު ދަތުރުފަތުރުގެ ގާނޫނުގެ ދަށުން ނަގާ ރަޖިސްޓްރޭޝަން ފީއާއި އެހެނިހެން ފީތަކުން ލިބޭ އާމްދަނީ، ސީދާ މަގުމަތީގެ ރައްކާތެރިކަން އިތުރުކުރުމަށާއި ޓްރެފިކް މައްސަލަތައް ހައްލުކުރުމުގެ ކަންކަމަށް އެކަނި ޚަރަދުކުރުން ކަމަށެވެ.