ފުލުހުންގެ ތަރުޖަމާނަކަށް އިންސްޕެކްޓަރ އަޙްމަދު ޝިޔާމް ހަމަޖައްސައިފި
ދިވެހި ފުލުހުންގެ ޚިދުމަތުގެ ރަސްމީ ތަރުޖަމާނުގެ މަގާމަށް އިންސްޕެކްޓަރ އޮފް ޕޮލިސް އަޙްމަދު ޝިޔާމް މިއަދު ހަމަޖައްސަވައިފިއެވެ.
ފުލުހުންގެ އިދާރާއިން ވިދާޅުވީ، އިންސްޕެކްޓަރ އޮފް ޕޮލިސް އަޙްމަދު ޝިޔާމް މި މަގާމާ ހަވާލުވެވަޑައިގަތީ، މީގެ ކުރިން ތަރުޖަމާނުގެ މަސްއޫލިއްޔަތު އަދާކުރެއްވި ސުޕްރިންޓެންޑެންޓް އޮފް ޕޮލިސް ޔޫނުސް ޞަބާޙް އާރިފްގެ ބަދަލުގައި ކަމަށެވެ. އަދި މިއަދުން ފެށިގެން އެ މަގާމުގެ މަސްއޫލިއްޔަތުތައް އަދާކުރައްވަމުން ގެންދަވާނީ ޝިޔާމް ކަމަށް ވެސް ފުލުހުން ހާމަކުރެއެވެ.
މި ބަދަލާ ގުޅިގެން، ދިވެހި ފުލުހުންގެ ޚިދުމަތުގެ ފަރާތުން މީޑިއާތަކަށް މައުލޫމާތު ދެއްވުމާއި، އާންމު ހޭލުންތެރިކަން އިތުރުކުރުމުގެ އެންމެހައި މުއާމަލާތްތަކުގައި އެންމެ އިސްކޮށް ދެން ހަރަކާތްތެރިވެވަޑައިގަންނަވާނީ ޝިޔާމެވެ.
އިންސްޕެކްޓަރ އޮފް ޕޮލިސް އަޙްމަދު ޝިޔާމަކީ މީގެ ކުރިންވެސް ފުލުހުންގެ މީޑިއާ ޑިޕާޓްމަންޓް ހިންގުމުގައި އިސް ދައުރެއް އަދާކުރައްވައި، މީޑިއާގެ ދާއިރާގައި ގިނަ ތަޖުރިބާތަކެއް ހޯއްދަވާފައިވާ ބޭފުޅެކެވެ.
މީގެ އަހަރުތަކެއް ކުރިން ފުލުހުންގެ ވަޒީފާއިން އޭނާ ވަކިކޮށްފައިވަނިކޮށް، ކޯޓަށް ހުށަހެޅުނު މައްސަލަ ކާމިޔާބުވުމާ ގުޅިގެން، ކޯޓުގެ ހުކުމާ އެއްގޮތަށް ދާދި ފަހުން ވަނީ އޭނާއަށް އަލުން ވަޒީފާ އިޔާދަކޮށްދީފައެވެ.
ރިއެކްޝަންސް
