ޤައުމު ތަރައްޤީކުރުމުގައި ޒުވާނުން އިސްނެގުން މުހިއްމު: ނައިބު ރައީސް

ދިވެހިރާއްޖެ ތަރައްޤީވެފައިވާ ޤައުމަކަށް ހެދުމަށް ކުރެވޭ މަސައްކަތުގައި ޒުވާނުން އަމިއްލަ އިސްނެގުމަށް ބައިވެރިވެ މަސައްކަތްކޮށްދިނުމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ގޮވާލައްވައިފިއެވެ.

އެމަނިކުފާނު މިކަމަށް ގޮވާލެއްވީ މިއަހަރުގެ ވިލާ ކޮލެޖުގެ ސްޓޫޑެންޓް އެޗީވްމެންޓްސް އެވޯޑްސް ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުންނެވެ. ވިލާ ކޮލެޖުން ދަސްވެނިވި ދަރިވަރުންގެ ތެރެއިން ޚާއްސަ އެވޯޑުތައް ހާސިލުކުރި ދަރިވަރުންނަށް އެވޯޑު ދިނުމަށް ބޭއްވި މި ރަސްމިއްޔާތުގައި ނައިބު ރައީސްގެ ވާހަކަފުޅު މައިގަނޑު ގޮތެއްގައި ބިނާކުރެއްވީ ދަސްވެނިވި ދަރިވަރުން މުޖުތަމަޢަށް ބޭނުންތެރި ބަޔަކަށް ވުމުގެ މައްޗަށެވެ. އެމަނިކުފާނުގެ ވާހަކަފުޅު ފައްޓަވަމުން ވަނީ އެވޯޑުތައް ހާސިލުކުރި ދަރިވަރުންނަށް މަރުޙަބާ ވިދާޅުވެފައެވެ.

ނައިބު ރައީސް ވިދާޅުވީ، ދަސްވެނިވި ދަރިވަރުން ހާސިލުކުރި ޢިލްމާއި ހުނަރުތައް ބޭނުންކޮށްގެން ޤައުމަށް ބޭނުންތެރި ދާއިރާތަކުން މައްސަލަތަކަށް ހައްލު ހޯދައި، އީޖާދީ ވިސްނުން އިސްކުރަންޖެހޭ ކަމަށެވެ. އަދި މުޅި މުޖުތަމަޢަށް ބޭނުންވެފައިވާ ކަންކަމަށް ދާއިމީ ހައްލުތައް ހޯދުމަށް ދަރިވަރުން ވިސްނުން އިސްކުރަންޖެހޭ ކަމަށާއި، އެ މަގަށް ދަރިވަރުން މަސައްކަތް ކުރައްވާނެކަމުގެ ޔަޤީންކަން އެބައޮތް ކަމަށް ވިދާޅުވިއެވެ.

މީގެއިތުރުން، މަސައްކަތުގެ މާހައުލުގައި މިހާރުވެސް ދަސްވެނިވި ބައެއް ދަރިވަރުން ޒިންމާދާރު މަޤާމުތަކުގައި މަސައްކަތްކުރަމުންދާކަން ފާހަގަކުރައްވައި، އަލަށް ވަޒީފާގެ މާހައުލަށް ނިކުންނަ ދަސްވެނިންވެސް މުއައްސަސާތަކުގެ ޚިދުމަތުގެ ފެންވަރު ރަނގަޅު ކުރުމަށް އެފަރާތްތަކުގެ އީޖާދީ ވިސްނުން ބޭނުންކުރަން ޖެހޭނެ ކަމަށް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާގެ ނައިބުގެ ވާހަކަފުޅުގައި، ރާއްޖެ ތަރައްޤީވެފައިވާ ޤައުމަކަށް ހެދުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ތަޞައްވުރު ފާހަގަކުރައްވައި، މިއީ ކޮންމެ ރައްޔިތެއްގެވެސް އުއްމީދާ ގުޅިފައިވާ ކަމެއް ކަމަށް ވިދާޅުވިއެވެ.

"ރައީސް ވަނީ މި ތަޞައްވުރަށް ވާސިލުވުމަށް މަސައްކަތް ފަށާފައި. އެއީ، 2040 ވަނަ އަހަރު ދިވެހިރާއްޖެ ފުރިހަމައަށް ތަރައްޤީވެފައިވާ ޤައުމަކަށް ހެދުމުގެ ތަޞައްވަރު. މި ތަޞައްވުރު ހާސިލުކުރަން ތިޔަ އެންމެހާ ބޭފުޅުންގެ އެހީތެރިކަން ބޭނުންވޭ. ޚާއްސަކޮށް ޒުވާނުން އިސްނަގައިގެން އީޖާދީ ވިސްނުންތައް ބޭނުން ކުރައްވައިގެން މިމަސައްކަތުގައި އަމިއްލަފުޅަށް ބައިވެރިވާނެ،" ނައިބު ރައީސް ވިދާޅުވިއެވެ.

ތަޢުލީމީ ނިޒާމުގެ މުހިންމުކަމަށް އަލިއަޅުއްވާލައްވަމުން، ގިނަ އަދަދެއްގެ ދަރިވަރުން ދަސްވެނިވެގެންދާތަން ފެނުމަކީ ޤައުމުގެ މައްސަލަތައް ހައްލުކުރުމަށް ދެވޭ އަހައްމިއްޔަތުކަން ފެނިގެންދާ ކަމެއްކަމުގައި އެމަނިކުފާނު ވިދާޅުވިއެވެ. އަދި ކުރިމަގުގައި މަސައްކަތް ކުރާއިރު ޒަމާނީ ވަސީލަތްތަކަށް ހުނަރުވެރިވުމަށް އިސްކަންދިނުމަށް އެދިވަޑައިގެންނެވިއެވެ.
ނައިބު ރައީސްގެ ވާހަކަފުޅު ނިންމަވާލެއްވީ، ވިލާ ކޮލެޖުން ހޯދާފައިވާ ކުރިއެރުންތަކާއި ކާމިޔާބީތައް ފާހަގަކުރައްވައި، އެ ކޮލެޖުގެ ބާނީ ޤާސިމް އިބްރާހީމާއި ކޮލެޖުގެ އިސްވެރިން ކުރައްވާ މަސައްކަތްތަކަށް ޝުކުރު އަދާކުރައްވަމުންނެވެ.
މި ރަސްމިއްޔާތުގައި، "ޤާސިމް އިބްރާހީމް އެވޯޑް ފޯރ އެކްސެލެންސް" ހާސިލުކުރި ދަރިވަރުންނަށް އެވޯޑު ހަވާލުކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފެވެ.