އަމީނީ މަގުގެ މަރާމާތުކުރި ސަރަޙައްދު ހުޅުވާލަފި

އަމީނީ މަގުގައި ހަލާކުވެގެން މަރާމާތުކުރި ސަރަޙައްދުތަކުގެ މަސައްކަތް ނިންމައި، އާންމު ދަތުރުފަތުރަށް އަލުން ހުޅުވާލާފައިވާ ކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ވިދާޅުވެއްޖެއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ޖޫން މަހުގެ 15 ވަނަ ދުވަހު ހަވާލުކޮށްގެން ކުރިއަށްގެންދިޔަ މި މަސައްކަތުގެ ތެރެއިން މިހާރު ނިންމާލާފައިވަނީ ފުރަތަމަ ދެ ސެގްމަންޓެވެ. އެއީ ސެގްމަންޓް 1 ގެ ގޮތުގައި ހިމެނޭ ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އޮތް ސަރަޙައްދާއި، ސެގްމަންޓް 2 ގެ ގޮތުގައި ހިމެނޭ ދިވެހިރާއްޖޭގެ އަޑު ކުރިމަތިން އޮންނަ ހަތަރުއަނގޮޅި ކަންމައްޗެވެ.

ސެގްމަންޓް 1 ގެ ދަށުން ކުރިން އަޅާފައިވާ އެގްރިކޭޓް ބޭސް ކޯސް (އޭބީސީ) އަދި ތާރު ނެގުމަށްފަހު، 2794.062 އަކަމީޓަރުގެ ސަރަޙައްދެއްގައި ސަބްގްރޭޑް، ސަބްބޭސް، އޭބީސީ އަދި ތާރު އެޅުމުގެ މަސައްކަތް ވަނީ ކޮށްފައެވެ. އަދި ސެގްމަންޓް 2 ގެ ދަށުން 133.64 އަކަމީޓަރުގެ ސަރަޙައްދެއްގައި ކުރިން އަޅާފައިވާ ތާރު ނަގައި، އަލުން އޭބީސީ އަދި ތާރު އެޅުމުގެ މަސައްކަތް ވަނީ ފުރިހަމަކޮށްފައެވެ.

ފުރަތަމަ ދެ ސެގްމަންޓް ނިމުމާއެކު، ދެން ފެށުމަށް ހަމަޖެހިފައިވަނީ ސެގްމަންޓް 3 ގެ މަސައްކަތެވެ. މިއީ އިއްޒުއްދީން މަގުން ފެށިގެން ކޯރުކެނޑި ހިނގުމާ ހަމައަށް އޮންނަ ސަރަޙައްދެވެ. މި ސެގްމަންޓުގެ މަސައްކަތް އާދީއްތަ ދުވަހު ފެށުމަށް ވަނީ ހަމަޖެހިފައެވެ. މި މަސައްކަތް ފެށުމަށްޓަކައި، މިރޭ ދަންވަރު 12:00 އިން ފެށިގެން އެ ސަރަޙައްދުގެ ޓްރެފިކް ފްލޯއަށް ބަދަލު ގެނައުމަށް ފުލުހުން ވަނީ ނިންމާފައެވެ. އަދި މަގު މަރާމާތުކުރާ ސަރަޙައްދުގައި ޕާކްކޮށްފައިވާ އުޅަނދުތައް ނެގުމަށްވެސް ފުލުހުން ވަނީ އިލްތިމާސްކޮށްފައެވެ.

އެމްޓީސީސީން ހާމަކުރި ގޮތުގައި، ސެގްމަންޓް 3 ގެ ދަށުން 1924.77 އަކަމީޓަރުގެ ސަރަޙައްދެއްގެ ތާރު ނެގުމަށްފަހު، އަލުން އޭބީސީއާއި ތާރު އެޅުމުގެ އިތުރުން މަގުމަތީގެ ނިޝާންތައް ކުރެހުމުގެ މަސައްކަތް ކުރިއަށްދާނެއެވެ.

މީގެއިތުރުން، ކުރިއަށް އޮތް ސެގްމަންޓް 4 ގެ މަސައްކަތް ކުރިއަށްދާނީ ކޯރުކެނޑި ހިނގުމުން ފެށިގެން ޣިޔާސުއްދީން އިންޓަރނޭޝަނަލް ސްކޫލާ ހަމައަށެވެ. އެ ސެގްމަންޓުގެ ދަށުން 1148.91 އަކަމީޓަރުގެ ސަރަޙައްދެއްގައި ކުރިން އަޅާފައިވާ ތާރު ނަގައި، އަލުން އޭބީސީއާއި ތާރު އެޅުމުގެ އިތުރުން މަގުމަތީގެ ނިޝާންތައް ކުރެހުމުގެ މަސައްކަތް ކުރިއަށްގެންދިއުމަށް ވަނީ ހަމަޖެހިފައެވެ.