ހޯޕް އައިލެންޑް ނިންމުން 2027 ގެ ނިޔަލަށް!
ކުށުގެ ވެށީގައި އުޅޭ ކުދިން ރިހިބިލިޓޭޓް ކުރުމުގެ ޕްރޮގްރާމް ކުރިއަށްގެންދާ ރަށް, ހޯޕް އައިލެންޑް 2027 ވަނަ އަހަރު ނިމުމުގެ ކުރިން ނިންމަން ސަރުކާރުން އަމާޒު ހިފައިފިއެވެ. ހޯމް މިނިސްޓަރ އަލީ އިހުސާން ދައުލަތުގެ މީޑިޔާގައި ވިދާޅުވީ ހޯޕް އައިލެންޑުގެ މަސައްކަތް ނިމި 2017 ވަނަ އަހަރުގެ ނިޔަލަށް ކުޑަކުދިންނަށް ލިބެންޖެހޭ ފަރުވާގެ ކަންކަން ފެށިގެން ދިޔުން ކަމަށް އުއްމީދު ކުރައްވާ ކަމަށެވެ.
ހޯޕް އައިލެންޑަކީ ކުށުގެ ވެށީގައި އުޅޭ ކުދިން ރިހެބިލިޓޭޓްކޮށް އަނބުރާ މުޖުތަމަޢަށް ނެރުމަށް ބޭނުންވާ މަސައްކަތްތަކަށް ޤާއިމުކުރާ ތަނެކެވެ. މި މަޝްރޫޢުތައް ކުރިއަށްގެންދިއުމަށް ސަރުކާރުން ނިންމާފައިވަނީ ކޮންޓްރެކްޓަރ ފައިނޭންސް އުސޫލުންނެވެ.
މިނިސްޓަރ އިހުސާން ވިދާޅުވީ ހޯޕް އައިލެންޑް ހެދުމުގެ މަސައްކަތް މިހާރު ވަނީ ފަށާފައި ކަމަށެވެ. މިހާތަނަށް އެ ރަށް ހެދުމަށްޓަކައި ޝައުގުވެރިކަން ފާޅުކޮށްފައިވާ ފަރާތްތަކުގެ ބިޑްތަކުގެ ތަފްސީލްތައް މި މަހުގެ 25 ވަނަ ދުވަހު ލިބޭނެ ކަމަށް ވަޒީރު ވިދާޅުވިއެވެ.
"އެ އިވެލުއޭޓް ކުރުމަށް ފަހު އަޅުގަނޑުމެން މަސައްކަތް ބަޔަކާ ހަވާލުކުރާނަން. ޓާގެޓަކީ 2027ވަނަ އަހަރު ނިމެންވާއިރަށް މި ރަށް ގާއިމްކޮށް ކުޑަކުދިންނަށް ލިބެންޖެހޭ ޚާއްސަ ފަރުވާ ފެށުން." ވަޒީރު އިހުސާން ވިދާޅުވިއެވެ.
ހޯޕް އައިލެންޑަށް ގެންދާ ކުދިން އުމުރުން 18 އަހަރު ވަންދެން އެތަނުގައި އުޅޭނެ ކަމަށް ސަރުކާރުންވަނީ ކުރިން ވިދާޅުވެފައެވެ. އެތަނުގައި ކުދިންގެ އަޚުލާގު ރަނގަޅުކުރުމަށް ހިންގާ ޕްރޮގްރާމްތަކާއި ތަޢުލީމާއި ތަމްރީން ދިނުމާއި އަދި ވަކި އުމުރަކަށް ދިއުމަށް ވަޒީފާގެ ތަޖުރިބާ އާއި ފުރުސަތުތައް ހޯދައިދޭނެއެވެ.
ރިއެކްޝަންސް
