ރާއްޖޭގެ ޒަކާތުގެ ނިޒާމު ތާރީޚީ ކާމިޔާބީއެއް ހާސިލުކޮށްފި: މިނިސްޓަރު ޝަހީމް

ރާއްޖޭގެ ތާރީޚުގައި އެންމެ ގިނައިން ޒަކާތް ދައްކާފައިވަނީ މިއަހަރު ކަމަށާއި، ރާއްޖޭގެ ޒަކާތުގެ ނިޒާމަކީ ގާނޫނަކުން ރައްކާތެރިކަން ލިބިފައިވާ ހަރުދަނާ ނިޒާމެއް ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

މިނިސްޓަރު ޝަހީމް މިހެން ވިދާޅުވީ އެކްސްގައި ކުރެއްވި ޕޯސްޓެއްގަ އެވެ. އެކްސްގައި ކުރެއްވި ޕޯސްޓުގައި، ޒަކާތުގެ ނިޒާމު ހިންގާ ގޮތާއި އޭގެ ހަރުދަނާކަމުގެ މައްޗަށް ވަނީ އަލިއަޅުވާލައްވާފަ އެވެ.

މިނިސްޓަރު ފާހަގަކުރެއްވި ގޮތުގައި، ޒަކާތުގެ ގޮތުގައި ލިބޭ ފައިސާ ބަލަހައްޓަމުންދަނީ މަރުކަޒީ ބޭންކު (އެމްއޭއެމްއޭ) މެދުވެރިކޮށެވެ. އަދި އެ ފައިސާ ހޭދަކުރެވެނީ އިސްލާމީ ޝަރީއަތުގެ ހަމަތަކާ އެއްގޮތަށް އާންމުކޮށްފައިވާ ޝަރީއާ ގައިޑްލައިނާ އެއްގޮތްވާ ގޮތުގެ މަތިން ކަމަށާއި، ހަރަދުކުރެވޭ ގޮތުގެ ތަފްސީލު މަހުން މަހަށް އާންމުކޮށް ހާމަކުރަމުންދާ ކަމަށް މިނިސްޓަރު ވިދާޅުވި އެވެ. ޒަކާތާ ގުޅޭ ނިންމުންތައް ނިންމުމުގައި ޒަކާތު ކައުންސިލާއި ޝަރީއާ ކޮމިޓީގެ ފަންނީ ލަފާ ހޯދަމުންދާކަންވެސް އެމަނިކުފާނު ފާހަގަކުރެއްވި އެވެ.

ފާއިތުވި ދެ އަހަރަކީ ރާއްޖޭގެ ޒަކާތުގެ ނިޒާމަށް ތާރީޚީ އަދި ހެޔޮ ބަދަލުތަކެއް އައި، އަދި އެންމެ ގިނައިން ޒަކާތުގެ އާމްދަނީ ލިބުނު ދެ އަހަރުކަން ފާހަގަކުރައްވަމުން މިނިސްޓަރު ވިދާޅުވީ، ފަގީރުންގެ ދަފްތަރުގައި ހިމެނޭ ފަރާތްތަކަށް އެންމެ ބޮޑަށް ހޭދަކުރެވުނީވެސް މި މުއްދަތުގައި ކަމަށެވެ. އެގޮތުން، ފަގީރުންނަށް މާލީ އެހީތެރިކަން ދިނުމުގެ އިތުރުން، އެފަރާތްތަކުގެ ތައުލީމާއި ސިއްހަތަށްވެސް ބޮޑެތި ހޭދަތަކެއް ކުރެވިފައިވާ ކަމަށް ޝަހީމް ވިދާޅުވި އެވެ.

މީގެއިތުރުން، ޝަރީއާ ހުއްދަކުރާ މަގުން ޒަކާތު ފަންޑު އިތުރުކުރުމަށް ގިނަ މަސައްކަތްތަކެއް ފެށި، ޒަކާތަށް ހާއްސަ ވަކި އިދާރާއެއް ގާއިމުކުރެވިގެންދިޔަކަންވެސް މިނިސްޓަރު ފާހަގަކުރެއްވި އެވެ.

ދިވެހި ރައްޔިތުން ރާއްޖޭގެ ޒަކާތުގެ ނިޒާމަށް ދެމުންދާ ބޮޑު އިތުބާރަށްޓަކައި އިސްލާމިކް މިނިސްޓަރު ވަނީ ރައްޔިތުންނަށް ޝުކުރު އަދާކުރައްވާފަ އެވެ. އަދި ގާނޫނެއްގެ މައްޗަށް ރާއްޖޭގެ ޒަކާތުގެ ނިޒާމު ތަރައްގީކޮށް، ވަރުގަދަ ބިންގަލެއް އަޅުއްވައިދެއްވި ކަމަށްޓަކައި ރައީސުލްޖުމްހޫރިއްޔާ ޑރ. މުހައްމަދު މުއިއްޒަށްވެސް މިނިސްޓަރު ޝަހީމް ވަނީ ހާއްސަ ޝުކުރެއް އަދާކުރައްވާފަ އެވެ.

ރާއްޖޭގެ ޒަކާތުގެ ނިޒާމު ހަރުދަނާކޮށް، އިސްލާމީ ޝަރީއަތުގެ އަސްލުތަކާ އެއްގޮތަށް ޒަކާތް ނެގުމާއި ދޫކުރުމުގެ މުޅި ނިޒާމު އާ ހަރުފަތަކަށް ގެންދިއުމަށްޓަކައި ސަރުކާރުން ވަނީ ގިނަގުނަ އިސްލާހީ ފިޔަވަޅުތަކެއް އަޅާފަ އެވެ. އެގޮތުން، ރައީސް މުއިއްޒުގެ ގަރާރަކުން ވަނީ "މޯލްޑިވްސް ޒަކާތު ހައުސް" ގެ ނަމުގައި ޒަކާތަށް ހާއްސަ ވަކި އިދާރާއެއް އުފައްދަވައި، އެ އިދާރާގެ ހިންގުން ހަރުދަނާކުރައްވާފަ އެވެ.