ފުވައްމުލައް އަދި އައްޑޫގެ ފެނާއި ނަރުދަމާގެ ޚިދުމަތްތައް އެމްޑަބްލިއުއެސްސީއައި ރަސްމީކޮށް ހަވާލުކޮށްފި
ފުވައްމުލައް އަދި އައްޑޫ ސިޓީގެ ފެނާއި ނަރުދަމާގެ ޚިދުމަތް ދިނުމާ ގުޅޭ ހުރިހާ އިންފްރާސްޓްރަކްޗަރަކާއި ވަސީލަތްތައް ފެނަކަ ކޯޕަރޭޝަނުން މާލޭ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) އާއި ރަސްމީކޮށް ހަވާލުކޮށްފިއެވެ.
މި މަރުހަލާ ނިންމާލާފައިވަނީ މި ބަދަލު ގެނައުމަށްޓަކައި ފެނަކަ އަދި އެމްޑަބްލިއުއެސްސީއާ ދެމެދު މިދިޔަ ހަފުތާގެ ތެރޭގައި އެއްބަސްވުމެއްގައި ސޮއިކުރުމަށް ފަހުގައެވެ.
މިކަމާ ގުޅޭގޮތުން އެމްޑަބްލިއުއެސްސީގެ މެނޭޖިންގ ޑިރެކްޓަރު ޙުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ކޯޕަރޭޓް ދާއިރާ އިޞްލާޙުކުރުމުގެ ސިޔާސަތުގެ ދަށުން ކުރިއަށް ގެންދެވުނު މުހިންމު މަސައްކަތެއް ކަމަށެވެ. އަދި ރާއްޖޭގެ އެންމެ ދެކުނުގެ ދެ ސިޓީގެ ފެނާއި ނަރުދަމާގެ ނިޒާމުތަކާ ގުޅޭ އެންމެހައި ވަސީލަތްތަކެއް މިހާރު ފެން ކުންފުންޏާ ރަސްމީކޮށް ހަވާލުކުރެވިފައިވާ ކަމަށްވެސް ފަހުމީ ފާހަގަކުރެއްވިއެވެ.
އެމްޑަބްލިއުއެސްސީން ހާމަކުރި ގޮތުގައި، މި ނިޒާމުތައް އިތުރަށް ހަރުދަނާކޮށް، ދެ ސިޓީގެ ރައްޔިތުންނަށް މެދުކެނޑުމެއް ނެތި އިތުބާރު ހުރި އަދި ފެންވަރު ރަނގަޅު ޚިދުމަތެއް ކަށަވަރުކޮށްދިނުމަށް ގިނަ މަސައްކަތްތަކެއް ދަނީ ކުރެވެމުންނެވެ. އެގޮތުން، މިހާތަނަށް ހެދިފައިވާ ފަންނީ އެސެސްމަންޓްތަކަށް ބިނާކޮށް، ޚިދުމަތުގެ ފެންވަރު މަތިކުރުމަށާއި އޮޕަރޭޝަނަލް ހިންގުން ހަރުދަނާކުރުމުގެ ޢަމަލީ މަސައްކަތްތައް މިހާރުވެސް ބާރަށް ކުރިއަށްދާ ކަމަށް އެ ކުންފުނިން ވަނީ ބުނެފައެވެ.
ރިއެކްޝަންސް
