މާލެ ސަރަހައްދުގެ ހޫނުމިން މިއަދު 39 ޑިގްރީ ސެލްސިއަސް އަށް އަރައިފި

މާލެ ސަރަހައްދުގައި އިޙުސާސްކުރެވޭ ފިނިހޫނުމިން 39.2 ޑިގްރީ ސެލްސިއަސް އަށް މައްޗަށް ގޮސްފިއެވެ. މިއީ ފާއިތުވި ދުވަސްތަކުގެ ތެރޭގައި މާލޭ ސަރަހައްދުގެ ފިނިހޫނުމިން މިހާ މައްޗަށް އެރި ފުރަތަމަ ފަހަރެވެ.

މޫސުމާބެހޭ ޤައުމީ އިދާރާ (މެޓް) އިން ހާމަކުރައްވާފައިވާ ގޮތުގައި، މިއަދަކީ މާލެ ސަރަހައްދަށް އާދަޔާޚިލާފަށް ހޫނުގަދަ ދުވަހެކެވެ. އެގޮތުން މާލެ ސަރަހައްދުގައި ހޫނުމިން އިޙުސާސްކުރެވޭ މިންވަރު ނުވަތަ "ފީލްސް ލައިކް" ޓެމްޕަރޭޗަރ ވަނީ 39.2 ޑިގްރީ ސެލްސިއަސް އަށް އަރާފައެވެ.

މާލޭގެ އިތުރުން ރާއްޖޭގެ ބައެއް އެހެން އަތޮޅުތަކުގައިވެސް އިޙުސާސްކުރެވޭ ފިނިހޫނުމިން ވަނީ މައްޗަށް ގޮސްފައެވެ. މެޓް އޮފީހުގެ ހިސާބުތައް ދައްކާގޮތުން، ލ. ކައްދޫގައި އިޙުސާސްކުރެވޭ ފިނިހޫނުމިން 37.4 ޑިގްރީ ސެލްސިއަސްގައި ހުރިއިރު، ހދ. ހަނިމާދޫގައި މި މިންވަރު ހުރީ 37.2 ޑިގްރީ ސެލްސިއަސްގައެވެ.

އެހެން ނަމަވެސް، ރާއްޖޭގެ އެހެން ބައެއް ސަރަހައްދުތަކުގައި އިޙުސާސްކުރެވޭ ފިނިހޫނުމިން ހުރީ ނިސްބަތުން އާދައިގެ މިންވަރެއްގައެވެ. އެގޮތުން ނ. މާފަރުގައި 36.1 ޑިގްރީ ސެލްސިއަސް އަދި ގދ. ކާޑެއްދޫގައި 36.3 ޑިގްރީ ސެލްސިއަސްގައި ހުރިއިރު، އައްޑޫ ސިޓީ ގަމުގައި އިޙުސާސްކުރެވޭ ފިނިހޫނުމިން ހުރީ 35.6 ޑިގްރީ ސެލްސިއަސްގައެވެ.

މި ދުވަސްވަރަކީ ރާއްޖެއަށް އާންމުކޮށްވެސް ހޫނުގަދަ ދުވަސްވަރަކަށް ވުމާއެކު، އާދަޔާޚިލާފަށް ހޫނުގަދަވާ ވަގުތުތަކުގައި ސިއްހީ ގޮތުން ރައްކާތެރިކަމުގެ ފިޔަވަޅުތައް އެޅުމަށް ކަމާބެހޭ ފަރާތްތަކުން އިލްތިމާސްކުރައްވައެވެ.